ရန်ကုန်မြို့တော် လှိုင်သာယာမြို့နယ်ရှိ ကျူးကျော်နေအိမ်များကို အစိုးရက ဖယ်ရှား ရှင်းလင်းလျက်ရှိရာ ဇန်နဝါရီလ ၂၂ ရက်နေ့ နံနက်အစောပိုင်းက ဒုတိယမြောက်နေ့အဖြစ် (၁၅) ရပ်ကွက်၊ ရွှေလင်ပန်း ချောင်းဘေးရှိ ကျူးကျော်နေအိမ် တစ်ထောင်ကျော်ကို ဖယ်ရှား ရှင်းလင်းခဲ့ကြောင်း နေအိမ် ဖျက်ဆီးခံ ရသော ကျူးကျော် နေထိုင်သူများထံမှ သိရသည်။
ယနေ့ ရှင်းလင်းသည့် နေအိမ်များမှာ လှိုင်သာယာမြို့နယ် (၁၅) ရပ်ကွက်၊ ရွှေလင်ပန်းချောင်းဘေးရှိ စည်ပင်သာယာပိုင် မြေပေါ်မှ ကျူးကျော်နေအိမ်များ ဖြစ်ပြီး စုစုပေါင်း ၁၂၀၀ ဝန်းကျင် ရှိကြောင်း နံနက် ၆ နာရီဝန်းကျင်တွင် လုံခြုံရေး ရဲတပ်ဖွဲ့ဝင် ၅၀၀ ဝန်းကျင်နှင့် စည်ပင်သာယာ ဝန်ထမ်းများ၊ အုပ်ချုပ်ရေး တာဝန်ရှိသူများ စုစုပေါင်း ၇၀၀ ဝန်းကျင်က လာရောက် ရှင်းလင်း ဖယ်ရှားခြင်း ဖြစ်ကြောင်း မျက်မြင်တွေ့ရှိသူများက ပြောဆိုသည်။
ရှင်းလင်းဖယ်ရှား ခံရသူများ၏ အဆိုအရ ကျူးကျော်တဲ ၁၂၀၀ ကျော် ဖျက်ဆီးခံရသည်ဟု သိရသော်လည်း လာရောက် ရှင်းလင်းရာတွင် ကိုယ်တိုင် ပါဝင်သူတစ်ဦး၏ အဆိုအရမူ အိမ် ၂၀၀ ကျော်သာ ရှင်းလင်းခဲ့ကြောင်း သိရသည်။
“စာရင်းရှိတာက ၂၁၆ လုံးပါ။ ဒါပေမဲ့ စာရင်းကောက်တဲ့သူက လမ်းဘေး ရှေ့မျက်နှာစာတန်းကိုပဲ အကြမ်းဖျင်း ကောက်တာ၊ နောက်မှာ ကပ်လျက်ဆောက် ထားတာတွေလည်း ရှိသေးတော့ ၂၅၀ ဝန်းကျင်တော့ ရှိလိမ့်မယ်” ဟု ၎င်းကဆိုသည်။
“မဖျက်ခင်မှာ ၁၅ မိနစ်အတွင်း ပစ္စည်းတွေ သိမ်းပေးဖို့ အသံချဲ့စက်နဲ့ လှည့်အော်တယ်။ လူတော်တော်များများကတော့ ဖျက်မယ်ဆိုတာ ကြိုသိထားလို့ ညကတည်းက လမ်းပေါ်ကို ရွှေ့ထားကြတယ်။ အိပ်တော့လည်း လမ်းပေါ်မှာပဲ” ဟု ၎င်း၏အိမ် ရှင်းလင်းခံရသူ အသက် ၃၅ နှစ်အရွယ် အမျိုးသမီးတစ်ဦးက ပြောကြားသည်။
လုံခြုံရေး ရဲတပ်ဖွဲ့ဝင်များသည် နံနက် ၂ နာရီဝန်းကျင်ကပင် အဆိုပါ နေရာသို့ ရောက်ရှိနေပြီး ကျူးကျော် ရပ်ကွက်ရှိ အဝင်၊ အထွက်လမ်းများကို ပိတ်ဆို့ စောင့်ကြည့်ခဲ့ကြောင်း အဆိုပါ ရပ်ကွက်တွင် နေထိုင်သူများက ပြောကြားသည်။
ကျူးကျော် နေထိုင်သူများသည် ပြီးခဲ့သည့် ဒီဇင်ဘာလ နောက်ဆုံးပတ်မှ စတင်၍ အဆိုပါ နေရာတွင် နေအိမ်များ ဆောက်လုပ်ခဲ့ခြင်း ဖြစ်ပြီး အများစုမှာ လှိုင်သာယာမြို့နယ် (၁၅) ရပ်ကွက်ရှိ အငှားတန်းလျားများတွင် နေထိုင်ခဲ့သူများ ဖြစ်သည်ဟု ဆိုသည်။
“ချုံတွေ၊ တောတွေကလည် အပြည့်ပဲ။ မြွေတွေလည်း တွေ့တယ်။ ပြီးတော့ အမှိုက်တွေကလည်း နံစော်နေတာပဲ။ ကျွန်တော်တို့ ရှင်းခဲ့ရတာ။ အဲဒီတုန်း ကတည်းက နေလို့မရဘူးပြောရင် ဘယ်နေ ပါ့မလဲ။ အခုတော့ လုပ်အားခလည်း ရှုံးတယ်။ အိမ်ဖိုးလည်း ဆုံးတယ်” ဟု လှိုင်သာယာ (၁၅) ရပ်ကွက်တွင် အိမ်ငှားနေထိုင်ခဲ့ရာမှ ကျူးကျော်အိမ် ဆောက်လုပ်နေထိုင်ခဲ့သော ဦးမောင်မြင့်က ဆိုသည်။
အဆိုပါ ကျူးကျော် နေအိမ်များ ရှင်းလင်းရာတွင် စည်ပင်သာယာဝန်ထမ်း ၁၅၀ ဦးခန့်နှင့် ရပ်ကွက်နေပြည်သူ ၂၀၀ ဝန်းကျင် ပါဝင်ပြီး လုံခြုံရေးရဲတပ်ဖွဲ့ အင်အားကိုမူ မသိရှိကြောင်း၊ နေအိမ်များ ဖယ်ရှားရှင်းလင်းမည်ကို ဇန်နဝါရီလ ၁၇၊ ၁၈ နှင့် ၁၉ ရက်နေ့တို့တွင် သတိပေး အကြောင်းကြားခဲ့ကြောင်း လှိုင်သာယာမြို့နယ် အထွေထွေ အုပ်ချုပ်ရေးမှူးက ပြောကြားသည်။
နေအိမ်များ ဖယ်ရှားရန် လာသူများကို ကျူးကျော် နေထိုင်သူ အမျိုးသမီး ၃၀ ဝန်းကျင်က ရပ်ကွက်အတွင်းသို့ ဝင်ရောက်ရာလမ်း၌ ဝါးလုံးများဖြင့် ပိတ်ဆို့ ဟန့်တားခဲ့သော်လည်း နောက်ပိုင်းတွင် ပြန်လည် ရုပ်သိမ်းသွားခဲ့ကြောင်း၊ ယနေ့ ဖယ်ရှားခဲ့သည့် နေအိမ် အရေတွက်မှာ ၂၅၀ ဝန်းကျင်သာရှိပြီး အများစုမှာ နေထိုင်ခြင်းမရှိသည့် နေအိမ်များ ဖြစ်ကြောင်း နေအိမ်များ ရှင်းလင်းဖယ်ရှားရာတွင် ကိုယ်တိုင် ပါဝင်ခဲ့သူတစ်ဦးက The Voice သို့ ပြောကြားသည်။
ဖယ်ရှား ရှင်းလင်းခံရသည့် မိသားစုများအနက် လူဦးရေ ၂၀ ခန့်မှာ ပြောင်းရွှေ့ နေထိုင်ရန် အခက်အခဲများ ဖြစ်နေသဖြင့် အဆိုပါနေရာ အနီးတွင်ပင် ဆက်လက်နေထိုင်လျက် ရှိသေးကြောင်း လုံခြုံရေး တာဝန်ကျ အမျိုးသားတစ်ဦးက ယနေ့ညပိုင်းတွင် ဆက်သွယ် ပြောဆိုသည်။
ယခုနှစ်အတွင်း ကျူးကျော်နေအိမ်များ ရှင်းလင်းဖယ်ရှားမှုများ ဆက်တိုက် ပြုလုပ်လျက်ရှိရာ ဇန်နဝါရီလ ၁၄ ရက်နေ့နှင့် ၁၅ ရက်နေ့များတွင် လှိုင်သာယာမြို့နယ်နှင့် တွံတေးမြို့နယ်အကြားရှိ ပန်းလှိုင်မြစ်ကမ်းဘေး အပါအဝင် လှိုင်သာယာ-တွံတေး ကားလမ်း ဝဲယာရှိ ကျူးကျော်နေအိမ် သုံးထောင်ဝန်းကျင်နှင့် ဇန်နဝါရီလ ၂၁ ရက်နေ့က လှိုင်သာယာမြို့နယ် (၁၉) ရပ်ကွက်ရှိ နေအိမ် ၁၀၀ ဝန်းကျင်တို့ကို ဖယ်ရှား ရှင်းလင်းခဲ့သည်။
The Voice Weekly
No comments:
Post a Comment