အိန္ဒိယနိုင်ငံ မဏိပူရပြည်နယ်မှ ကသည်းသူပုန်များသည် ချင်းပြည်နယ်မြောက်ပိုင်း နယ်စပ်ဒေသဖြစ်သည့် ကဘော်ချိုင့်ဝှမ်း တမူးဒေသတွင် မြေယာများဝယ်ယူကာ လူနေအိမ်နှင့် စခန်းများဆောက်လုပ်ကာ လက်နက်၊ မူးယစ်ဆေးဝါးများပြုလုပ်ပြီး ချမ်းသာလျက်ရှိကြောင်း ချင်းပြည်နယ် မဲဆန္ဒနယ်အမှတ် ၇ မှ ဦးနိန်းခင်းပေါင်က ဇန်န၀ါရီ ၂၀ ရက်တွင်ကျင်းပသည့် အမျိုးသားလွှတ်တော်၌ ဆွေးနွေးခဲ့သည်။
ဦးနိန်းခင်းပေါင်က “အဲဒီကသည်းသူပုန်တွေကို လွန်ခဲ့တဲ့ ၁၃ နှစ်က ကဘော်ချိုင့်ဝှမ်း တမူးဒေသမှာ ဒေသအာဏာပိုင်တွေက ခိုလှုံခွင့်ပြုခဲ့ပါတယ်။ သူတို့တွေက မြေယာတွေဝယ်၊ အိမ်တွေဆောက်၊ စခန်းတွေဆောက်ပြီး နေကြပါတယ်။ လက်နက်ရောင်းဝယ်ခြင်း၊ မူးယစ်ဆေးဝါး ရောင်းဝယ်ခြင်းတွေနဲ့ ချမ်းသာနေကြပါတယ်။ သူတို့အချင်းချင်း ပြဿနာဖြစ်လို့ လူနေအိမ်နဲ့ ရပ်ကွက်ထဲမှာ သေနတ်ဖောက်တဲ့အခါမှာ ပတ်ဝန်းကျင်ပြည်သူတွေရဲ့ လုံခြုံမှုကို ထိခိုက်စေပါတယ်။ တွန်းဇန်မြို့မြောက်ပိုင်း အိန္ဒိယ-မြန်မာ နယ်စပ်တစ်လျှောက်မှာ ဗုံးတွေထောင်ထားလို့ အသက်ဆုံးရှုံးမှုတွေ ဖြစ်ခဲ့ရပါတယ်” ဟု ပြောကြားသည်။
ကသည်းသူပုန်များ၏ ပစ်ခတ်မှုများကြောင့် အိန္ဒိယအစိုးရအား ဆန့်ကျင်မှုအသွင်ဆောင်နေကြောင်း၊ တစ်ဖက်နိုင်ငံသို့ ဈေးဝယ်သွားသူများအား တင်းကျပ်စွာ စစ်ဆေးခြင်းခံရကြောင်း၊ သက်ဆိုင်ရာ စစ်ဘက်အာဏာပိုင်များအား အကြောင်းကြားသော်လည်း ထူးခြားမှုမရှိကြောင်း၊ ၂၀၀၅ ခုနှစ်တွင် တွန်းဇန်မြို့နယ် လေသာတောင်အရှေ့ဘက်ခြမ်း ထန်ကိုင်ဒေသတွင် နေထိုင်ကြသည့် ထာဒိုတိုင်းရင်းသားများအား ငွေချေးပေးပြီး ဘိန်းစိုက်ခိုင်းကြောင်း၊ ဘိန်းစိုက်ပျိုးမှု များလာသည့်အတွက် ဘိန်းစွဲသူများလာကြောင်း ဦးနိန်းခင်းပေါင်က ပြောကြားသည်။
အိမ်နီးချင်းနိုင်ငံများသည် လုံခြုံရေးစနစ် ဖော်ဆောင်ရာတွင် မူးယစ်ဆေးဝါးတိုက်ဖျက်ရေး၊ မြန်မာအလုပ်သမားများကိစ္စ၊ လူကုန်ကူးမှု တိုက်ဖျက်ရေး၊ အကြမ်းဖက်မှု ပပျောက်ရေး၊ လက်နက်ရောင်းဝယ်မှု ဟန့်တားပိတ်ပင်ရေး၊ နယ်စပ်ဒေသ သောင်းကျန်းမှု ချုပ်ငြိမ်းရေး ကိစ္စများကို ပူးပေါင်းဆောင်ရွက်လျက်ရှိကြောင်း၊ နယ်စပ်ဒေသမှတစ်ဆင့် မြန်မာနိုင်ငံအတွင်း စိမ့်ဝင်ပျံ့နှံ့ ကြီးထွားလာမည်ကို အချိန်မီကာကွယ်နိုင်မည့် အထူးစီမံချက် တစ်ရပ်အနေဖြင့် ကြိုတင်တားဆီး ဟန့်တားနိုင်ရန် အစီအစဉ် ရှိမရှိနှင့် ပတ်သက်၍ မေးမြန်းစဉ် ထည့်သွင်းပြောကြားခဲ့သည်။
ယင်းကဲ့သို့ မေးမြန်းမှုများနှင့် ပတ်သက်၍ လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာန ဒုတိယ၀န်ကြီး ဦးကျော်ကျော်ဝင်းက “ပြည်ထဲရေးဝန်ကြီးဌာန၏ ပေးပို့ချက်အရ လွန်ခဲ့တဲ့ငါးနှစ်ခန့်က အိန္ဒိယနိုင်ငံဘက်မှာ အခြေစိုက်လှုပ်ရှားနေတဲ့ ကသည်းလက်နက်ကိုင်အဖွဲ့အား အိန္ဒိယနိုင်ငံက ရှင်းလင်းစဉ်မှာ ချင်းပြည်နယ် တွန်းဇံမြို့နယ်ထဲ ၀င်ရောက်ခိုအောင်းခဲ့ပါတယ်။ သတင်းရရှိတဲ့အတွက် တပ်မတော်စစ်ကြောင်းများမှ သွားရောက်ရှင်းလင်းခဲ့ရာမှာ အိန္ဒိယနိုင်ငံဘက်သို့ ပြန်လည်ဝင်ရောက်သွား
ပါတယ်။ ကျွန်တော်တို့ဘက်က ဒေသအာဏာပိုင်တွေက ကသည်းလက်နက်ကိုင်တွေကို ခိုလှုံခွင့်ပေးထား ခဲ့ခြင်း မရှိပါဘူး။ ဝေးလံခေါင်းပါးသည့်အတွက် နယ်စပ်လုံခြုံရေးကို လုံခြုံရေး အဖွဲ့အစည်းတွေက စနစ်တကျ ဂရုပြု ထိန်းသိမ်းလျက်ရှိပါတယ်” ဟု ဖြေကြားပါသည်။
ဆက်လက်၍ ဒုတိယ၀န်ကြီးက ချင်းပြည်နယ် တွန်းဇံမြို့နယ်တွင် ၂၀၁၁-၂၀၁၂ ခုနှစ်တွင် ဘိန်းစိုက်ဧက ၂၉၁ ဒသမ ၆ ဧက၊ ၂၀၁၂-၂၀၁၃ ခုနှစ်တွင် တွန်းဇံမြို့နယ် အတွင်းတွင် ၇၈ ဧက ဖျက်ဆီးခဲ့ကြောင်း၊ ၂၀၁၁ ခုနှစ်တွင် မူးယစ်ဆေးဝါးမှု ငါးမှု၊ တရားခံငါးဦး၊ ၂၀၁၂ ခုနှစ်တွင် မူးယစ်ဆေးဝါးမှု ၁၃ မှု တရားခံ ၄၁ ဦး၊ ၂၀၁၃ ခုနှစ်တွင် ၁၉ မှု တရားခံ ၆၂ ဦးအား အရေးယူခဲ့ကြောင်း၊ ထို့အပြင် ၂၀၁၂ ခုနှစ်တွင် တစ်မှု တရားခံနှစ်ဦး၊ ၂၀၁၃ ခုနှစ်တွင်နှစ်မှု တရားခံသုံးဦးအား လက်နက်မှောင်ခို ရောင်းဝယ်မှုများဖြင့် အရေးယူ ခဲ့ကြောင်း ပြောကြားသည်။
ပြည်သူ့လွှတ်တော်ကိုယ်စားလှယ် ဒေါ်ခင်မွှေးလွင်က “တမူးနယ်စပ် မိုးရေးမြို့မှာဆိုရင် မူးယစ်ဆေးဝါး ရောင်းဝယ်မှုဟာ ကြောက်ခမန်းလိလိ ဖြစ်နေပါတယ်။ နယ်စပ်ကလည်း ခြံစည်းရိုးမရှိတဲ့အတွက် အချိန်မရွေး ၀င်ထွက်သွားလာနေတယ်လို့ သိရပါတယ်။ မြန်မာပြည်ဘက်က နယ်စပ်တာဝန်ရှိသူ ၀န်ထမ်းတွေကိုယ်တိုင် မူးယစ်ဆေးဝါးရောင်းဝယ်ခြင်း၊ ဘိန်းခန်းနေအိမ်တွေကို သွားသုံးနေကြတာတွေ ရှိနေပါတယ်။ တရားရေးဝန်ထမ်း အမျိုးသမီးတစ်ဦးဆိုရင် မူးယစ်ဆေးဝါးနဲ့ တရားမ၀င်လက်နက် သယ်ဆောင်လို့ မကြာခင်က ဖမ်းဆီးခံခဲ့ရတာ ရှိပါတယ်” ဟု ဇန်န၀ါရီ ၁၇ ရက်တွင်ကျင်းပသည့် ပြည်ထောင်စုလွှတ်တော်၌ ပြောကြားသည်။
Eleven Media Group
No comments:
Post a Comment