မြန်မာအပေါ် ဒဏ်ခတ်ပိတ်ဆို့မှု တချို့ အမေရိကန် (၆)လ လျှော့ချ

မြန်မာနိုင်ငံရဲ့အဓိကဆိပ်ကမ်းတခုမှာ အမေရိကန်ကုမ္ပဏီတွေကူသန်း ရောင်းဝင်ခွင့်ကို (၆)လတာခွင့်ပြုတဲ့အနေနဲ့ မြန်မာအပေါ်ချမှတ်ထားတဲ့ ကုန်သွယ်ရေးပြစ်ဒဏ်ခတ်မှုတချို့ကို အမေရိကန်အစိုးရက တနင်္လာနေ့က ဖြေလျော့ပေးလိုက်ပါတယ်။

မြန်မာနိုင်ငံမှာ ခေတ်အမှီဆုံးဆိပ်ကမ်းတခုဖြစ်တဲ့ Asia World ကုမ္ပဏီပိုင် ဆိပ်ကမ်းမှာ ကုန်သွယ်ရေးအရ ငွေကြေးလွှဲပြောင်းမှုတွေပြုလုပ်နိုင်တဲ့ နည်းလမ်းတွေကိုရှာဖွေနိုင်ဖို့ Clearing House Association နဲ့ (BAFT )Bankers Association of Finance and Trade တို့ဟာ အမေရိကန် ဘဏ္ဍာရေးဌာနကို ဂျူလိုင်လကတည်းက တောင်းဆိုထားတာဖြစ်ပါတယ်။

မအင်ကြင်းနိုင်က အပြည့်အစုံကိုပြောပြမှာပါ။

မြန်မာအပေါ် ကုန်သွယ်ရေးပြစ်ဒဏ်ခတ်မှုတချို့ ဖြေလျော့ဖို့ အမေရိကန် အစိုးရက ပြင်ဆင်နေတယ်ဆိုတဲ့ သတင်းတွေထွက်ပေါ်နေချိန်မှာ မြန်မာနဲ့အမေရိကန်နှစ်နိုင်ငံကုန်သွယ်ရေးပိုမိုချောမွေ့စေဖို့ (၆)လ သက်တမ်းရှိတဲ့ GL 20 ဆိုတဲ့ အထွေထွေလိုင်စင်အမှတ် (၂၀)ကိုချမှတ်ပေးခြင်းအားဖြင့် ဒဏ်ခတ်ပိတ်ဆို့မှုတချို့ကို လျော့ချပေးလိုက်တယ်လို့ အမေရိကန်ဘဏ္ဍာရေးဝန်ကြီးဌာနက တနင်္လာနေ့ကထုတ်ပြန်ကြေညာပါတယ်။

ဒီကြေညာချက်နဲ့ပတ်သက်ပြီး မြန်မာနိုင်ငံအပေါ် ဒဏ်ခတ်ပိတ်ဆို့မှုရေးရာ အမေရိကန်နိုင်ငံခြားရေးဌာနပြောခွင့်ရအမျိုးသမီး Laura Robinson ကဗွီအိုအေကိုအခုလိုပြောပါတယ်။

“GL (20) ဟာ မြန်မာနိုင်ငံကို တင်ပို့တာ၊ မြန်မာနိုင်ငံကနေတင်သွင်းတဲ့ကုန်စည်တွေကိုအဆင်ပြေချောမွေ့စေဖို့ နည်းပညာပိုင်းအရ ပြင်ဆင်ပေးလိုက်တာပဲဖြစ်ပါတယ်။ ဒဏ်ခတ်ပိတ်ဆို့မှုတွေနဲ့ပတ်သက်တဲ့ စိုးရိမ်မကင်းဖြစ်မှုတွေကြောင့် အဓိကရန်ကုန်ဆိပ်ကမ်းတခုနဲ့ မြန်မာနိုင်ငံနဲ့ကုန်သွယ်ရာမှာ မထင်မှတ်ပဲ ဆိုင်းငံထားရတာတွေ ရှိတဲ့သတင်းတွေကို တုန့်ပြန်တဲ့အနေနဲ့ အမေရိကန်ဘဏ္ဍာရေးဌာနက GL (20) ခေါ်အထွေထွေလိုင်စင်အမှတ် (၂၀)ကို ထုတ်ပြန်ပေးလိုက်တာဖြစ်ပါတယ်။ တချိန်တည်းမှာပဲ အမေရိကန်ရဲ့ဒဏ်ခတ်ပိတ်ဆို့မှုတွေကို အခိုင်အမာဆက်လက်ထိန်းသိမ်းချမှတ်သွားဖို့အပြင် SDN ခေါ်အထူးပစ်မှတ်ထားတဲ့ မြန်မာနိုင်ငံသားတွေအပေါ် ဆက်လက်ဖိအားပေးသွားမှာဖြစ်ပါတယ်။”

Asia World ကုမ္ပဏီရဲ့ ဦးဆောင်ညွန်ကြားရေးမှုး စတီဖင်လော်ခေါ် ဦးထွန်းမြင့်နိုင်နဲ့ ကွယ်လွန်သွားပြီဖြစ်တဲ့ သူရဲ့ဖခင် လော်စစ်ဟန်တို့ဟာ မြန်မာစစ်ဗိုလ်ချုပ်တွေနဲ့နီးစပ်မှုရှိပြီး မူးယစ်ဆေးဝါးကူးသန်းရောင်းဝယ်တဲ့လုပ်ငန်းနဲ့ ချမ်းသာလာသူတွေဖြစ်တာကြောင့် အမေရိကန်ပြည်ထောင်စုက ၂၀၀၈ ခုနှစ်မှာ SDN ခေါ် တဦးချင်းပစ်မှတ်ထားပိတ်ဆို့အရေးယူမှုစာရင်းထဲထည့်သွင်းခဲ့တာပါ။

ဒါပေမဲ့ ၂၀၁၁ခုနှစ် သမ္မတဦးသိန်းစိန်အစိုးရတက်လာပြီးနောက် အမေရိကန်လုပ်ငန်းရှင်တွေ မြန်မာနိုင်ငံမှာ ရင်းနှီးမြှုပ်နှံမှုတွေလုပ်လာခဲ့တာပါ။ အဲဒီမှာAsia World ကုမ္ပဏီပိုင်တဲ့ ရန်ကုန်မြို့ဆိပ်ကမ်းဟာ ပြည်ပကုန်သွယ်ရေးအတွက် အရေးကြီးတဲ့ အသက်သွေးကြောသဖွယ်ဖြစ်လာတာကို အမေရိကန်လုပ်ငန်းရှင်တွေဘက်ကတွေ့ရှိခဲ့ရပြီး ဒီဆိပ်ကမ်းကို ဖြတ်သန်းပြီး ငွေကြေးလွှဲပြောင်းမှုတွေကို ခွင့်ပြုပေးဖို့အမေရိကန်ဘဏ္ဍာရေးဌာနရဲ့ နိုင်ငံခြားပိုင်ဆိုင်မှုများထိန်းချုပ်ရေးဌာနခွဲ (OFAC) ကို ပြီးခဲ့တဲ့ဂျူလိုင်လက စာရေးသားပေးပို့တောင်းဆိုခဲ့တာဖြစ်ပါတယ်။

GL (20) လိုင်စင်ကြောင့် Asia World ဆိပ်ကမ်းကို အသုံးပြုခ၊ သင်္ဘောတင်ပို့ခ၊ ကုန်တင်ကုန်ချခ စတဲ့ကုန်ကျစရိတ်တွေအတွက် အမေရိကန်ဘဏ်တွေ၊ ကုမ္ပဏီတွေအနေနဲ့ ငွေကြေးလွှဲပြောင်းတာကို အမေရိကန်အစိုးရက ခွင့်ပြုမှာဖြစ်ပါတယ်။

အခုလို ကုန်သွယ်ရေးပစ်ဒဏ်ခတ်မှုတချို့ (၆)လကြာဖြေလျော့ပေးလိုက်ပေမဲ့ မြန်မာနိုင်ငံအပေါ် တဦးချင်းပစ်မှတ်ထားပိတ်ဆို့အရေးယူမှုတွေနဲ့ အခြားကျန်နေတဲ့ ကုန်သွယ်ရေးပိတ်ဆို့မှုတွေဟာဆက်ပြီးရှိနေမှာဖြစ်တယ်လို့ Laura Robinson ကပြောပါတယ်။

“ အမေရိကန်ပြည်ထောင်စုအနေနဲ့ မြန်မာနိုင်ငံအပေါ်ချမှတ်ထားတဲ့ အထူးပစ်မှတ်ထားတဲ့ နိုင်ငံသားတွေအပေါ် ပိတ်ဆို့မှုတွေကိုဆက်လက်ဖိအားပေးဆောင်ရွက်သွားမှာဖြစ်ပါတယ်။ GL (20) အနေနဲ့ မြန်မာနိုင်ငံက ပို့ကုန်သွင်းကုန်တို့နဲ့ပတ်သက်တဲ့ သာမန်ငွေပေးချေမှု၊ပြင်ပရောက်တဲ့ စီးပွားရေးလုပ်ကိုင်မှုတွေကိုခွင့်မပြုပါဘူး။ ဥပမာ SDN ချမှတ်ခံထားရသူတွေနဲ့ပတ်သက်တဲ့ သယ်ယူပို့ဆောင်ရေးလုပ်ငန်းတွေကို တိုးချဲ့တာ၊ ခေတ်မှီအောင်ပြုလုပ်တာ အစရှိတဲ့ ရင်းနှီးမြှုပ်နှံမှုအသစ်တွေကို ခွင့်မပြုပါဘူး။ လက်ရှိချမှတ်ထားတဲ့ ဒဏ်ခတ်ပိတ်ဆို့မှုတွေဆက်ပြီးရှိသွားမှာဖြစ်ပါတယ်။ ဒီပိတ်ပင်မှုတွေအနက် ကာကွယ်ရေးဝန်ကြီးဌာအပါအ၀င် SDN စာရင်းမှာပါနေတဲ့သူတွေနဲ့ ရင်းနှီးမြှုပ်နှံမှုအသစ်တွေမလုပ်ရတဲ့အပြင်၊ မြန်မာနိုင်ငံကထွက်တဲ့ ပတ္တမြား၊ ကျောက်စိမ်းနဲ့ အခြားကျောက်မျက်ရတနာတွေကိုလည်း အမေရိကန်ကိုတင်ပို့ခွင့် ပိတ်ပင်ထားတာပါ။”

ဒါအပြင် အခုလို ကုန်သွယ်ရေးဒဏ်ခတ်မှု တချို့ကို ဖြေလျော့ပေးတာဟာ နိုဝင်ဘာလ ရွေးကောက်ပွဲမှာ ဒေါ်အောင်ဆန်းစုကြည်ဦးဆောင်တဲ့ NLD ပါတီအနိုင်ရခဲ့တာကို တုန့်ပြန်တာမဟုတ်ဘူးလို့ သူကအခုလိုပြောပါတယ်။

“GL (20) လိုင်စင်ထုတ်ပြန်ရခြင်းဟာ မကြာမှီက မြန်မာနိုင်ငံရွေးကောက် ပွဲရလဒ်တွေကို တုန့်ပြန်တာမဟုတ်သလို မြန်မာနိုင်ငံအပေါ် အမေရိကန်ရဲ့ ဒဏ်ခတ်ပိတ်ဆို့မှုမူဝါဒပြောင်းလဲမှု အရိပ်လက္ခဏာလဲမဟုတ်ပါဘူး။ ဒီလိုင်စင်ရဲ့သက်တမ်းဟာ (၆)လ ရှိပြီး အသစ်သက်တမ်းတိုးနိုင်သလို ပယ်ဖျက်နိုင်ခွင့်လဲရှိတာဖြစ်ပါတယ်။”

မြန်မာနိုင်ငံမှာ ရွေးကောက်ပွဲအနိုင်ရ NLD ပါတီကို အာဏာအပြည့်အ၀ လွှဲပြောင်းပေးရေး၊ ငြိမ်းချမ်းရေးလုပ်ငန်းစဉ်အောင်မြင်ရေး၊ ရိုဟင်ဂျာတွေ အပါအ၀င် လူနည်းစုတိုင်းရင်းသားတွေရဲ့ အခွင့်အရေးလေးစာရေးနဲ့ ဖွဲ့စည်းပုံအခြေခံဥပဒေပြင်ဆင်ရေးစတဲ့တိုးတက်မှုအခြေအနေတွေကို အမေရိကန်အစိုးရက ဆက်လက်စောင့်ကြည့်သွားမှာဖြစ်တယ်လို့လည်း အမေရိကန်နိုင်ငံခြားရေးဌာနပြောခွင့်ရအမျိူးသမီး Laura Robinson ကပြောပါတယ်။

အခုလို မြန်မာအပေါ် ကုန်သွယ်ရေးဒဏ်ခတ်မှုတချို့ဖြေလျော့ပေးလိုက် တာကို စိုးရိမ်မကင်းဖြစ်မိကြောင်း အမေရိကန်အောက်လွှတ်တော် နိုင်ငံခြားဆက်ဆံရေးကော်မတီဥက္ကဌ ရီပါပလင်ကန် အမတ် Ed Royce က တနင်္လာနေ့က ကြေညာချက်ထုတ်ပြန်ခဲ့ပါတယ်။ မြန်မာနိုင်ငံမှာ လူ့အခွင့်အရေးချိုးဖောက်မှုတွေ၊ မူးယစ်ဆေးဝါးရောင်းဝယ်မှုတွေအပေါ် ပိတ်ဆို့ဒဏ်ခတ်မှုတွေက ထိထိရောက်ရောက်အရေးမယူနိုင်ပဲ အခုလို ကုန်သွယ်ရေးပိတ်ဆိုမှုတချို့ဖြေလျော့တာကို သူ့အနေနဲ့ အလွန်ပဲစိုးရိမ်မကင်းဖြစ်မိကြောင်း Ed Royce ကပြောပါတယ်။

VOA