မြန်မာနိုင်ငံမှာ
အပြောင်းအလဲ တွေက အခုတလော ဆင့်ကဲဆင့်ကဲဖြစ်လာတာ သတိထားမိပါတယ်။
အစိုးရအဖွဲ့အတွင်းအပြောင်းအလဲ၊ အာဏာရပါတီထဲက အပြောင်းအလဲ စတာတွေနဲ့ အတူ
မြန်မာနိုင်ငံရဲ့ အကြီးဆုံး အတိုက်အခံ ပါတီကြီး ဖြစ်တဲ့ NLD မှာလည်း
အပြောင်းအလဲ တွေ လုပ်လာပါတယ်။အထူးခြားဆုံး တွေ့ရတာကတော့ ပါတီ ဥက္ကဋ္ဌ ဒေါ်အောင်ဆန်းစုကြည်နားက အပြောင်းအလဲပါပဲ။
ဒေါ်အောင်ဆန်းစုကြည် ဥရောပ ခရီးစဉ်က အပြန်မှာ ပုဂ္ဂိုလ်ရေးဆိုင်ရာ ရုံးအဖွဲ့ကို ဖျက်သိမ်းလိုက်တယ်လို့ နေအိမ်နဲ့ နီးစပ်သူတွေဆီက သတင်းတွေ ထွက်ပေါ်လာခဲ့ပါတယ်။
နေအိမ်ခြံဝင်းအတွင်းက ကူညီဝန်းရံသူများကို မကြာသေးခင်က တာဝန်ကနေ အနားပေးလိုက်တယ်လို့ သိရပါတယ်။
ဒေါ်အောင်ဆန်းစုကြည်က သူတို့ကို တက္ကသိုလ်ရိပ်သာလမ်းနေအိမ်မှာ ဆက်လက် တာဝန်ယူဖို့ မလိုတော့ကြောင်း ပြောဆိုလိုက်တယ်လို့ သတင်းများက ဆိုပါတယ်။
ဒီကိစ္စနဲ့ပတ်သက်ပြီး NLD ပါတီထဲက လူကြီးပိုင်း တချို့ကို မေးကြည့်ပေမယ့် သူတို့က မှတ်ချက် တစုံတရာ ပေးဖို့ ငြင်းဆန်ကြပါတယ်။
တာဝန်က အနားပေးခံရသူ အရေအတွက် စုစုပေါင်း ၂၀ ၀န်းကျင်ရှိပြီး အဲဒီထဲမှာ ဒေါ်အောင်ဆန်းစုကြည်ရဲ့ လုံခြုံရေးအရာရှိ ဦးခွန်သာမြင့်လည်း ပါဝင်နေပါတယ် တဲ့။ သူဟာ စာရေးဆရာ ဦးသိန်းဖေမြင့်ရဲ့ သားတဦး ဖြစ်ပါတယ်။
မေလကုန် ဒေါ်အောင်ဆန်းစုကြည်ရဲ့ ထိုင်းနိုင်ငံခရီးစဉ်မှာ ဦးခွန်သာမြင့်လည်း လိုက်ပါသွားပါတယ်။ သူက ခရီးစဉ်ကို အသုံးချပြီး ထိုင်း စီးပွားရေး လုပ်ငန်းရှင် တချို့နဲ့ ဆက်သွယ် ညှိနှိုင်းမှုတချို့ ပြုလုပ်ခဲ့တဲ့ အတွက် ဒေါ်အောင်ဆန်းစုကြည်နဲ့ ဆက်ဆံရေး တင်းမာသွားတာလို့ ပြောဆိုကြတာတွေလည်း ရှိပါတယ်။
သိပ်မကြာခင် ဒေါ်အောင်ဆန်းစုကြည် ဥရောပခရီးထွက်ရာမှာ ဦးခွန်သာမြင့် ပါဝင်ပါတယ်။ အဲဒီခရီးအတွက် အစစ အရာရာ စီစဉ်ပြီးသား ဖြစ်တဲ့အတွက်သာ သူ လိုက်ပါခွင့် ရသွားတာ ဖြစ်တယ်လို့ဆိုပါတယ်။
ဒေါ်အောင်ဆန်းစုကြည်ကို ကူညီသူတွေ အများအပြား ရှိပါတယ်။ သူ့ရဲ့ လုံခြုံရေးအတွက် လိုအပ်တဲ့ အင်အားကို NLD ကလည်း တာဝန်ယူ ဖြည့်တင်းပေးပါတယ်။ ဒီလို ၀န်းရံသူ အများအပြားဟာ တခြားသော NLD ပါတီဝင်တွေ လိုပဲ ကိုယ့်စားရိတ်နဲ့ကိုယ် နှစ်ပေါင်း ၂၀ ကျော်ကြာ ရပ်တည်လာသူတွေ ဖြစ်ပါတယ်။
သူတို့ထဲက တချို့ဟာ ပတ်ဝန်းကျင်နဲ့ သဟဇာတ မဖြစ်ဘူး ဆိုတဲ့ အသံ ထွက်နေတာတော့ ကြာပါပြီ။ အခုမှ ဒေါ်အောင်ဆန်းစုကြည်နားမှာ နေတဲ့ တာဝန်တွေကနေ ရုပ်သိမ်းခံလိုက်ရတာပါ။
ပြီးခဲ့တဲ့ အနှစ် ၂၀ ကျော်အတွင်း ဒေါ်အောင်ဆန်းစုကြည် နဲ့ သူ့ကို အနီးကပ် ၀န်းရံသူတွေဟာ ဆက်တိုက် သို့မဟုတ် မကြာခဏ အထိန်းသိမ်းခံခဲ့ရပါတယ်။ လက်ရှိနိုင်ငံရေးအခြေအနေက အရင်နဲ့ မတူတော့ တာကြောင့် ဒေါ်အောင်ဆန်းစုကြည်ဟာ သူ့လူတွေကို ဟာမိုနီဖြစ်အောင် စီမံဖို့ အချိန်ပိုရနိုင်၊ အခြေအနေ ပိုပေးလာနိုင်ပါပြီ။
"အရပ်သား" အစိုးရအဖွဲ့ထဲမှာလည်း ပတ်ဝန်းကျင်နဲ့ သဟဇာတ မဖြစ်ဘူး ဆိုတဲ့ ၀န်ကြီးတွေ အနားပေးခံရမယ် လို့ လေသံ ထွက်နေတာတော့ ကြာပါပြီ။ အဲဒီ ပြုတ်မယ် ဆိုတဲ့ ၀န်ကြီးတွေ ခုထိတော့ ဘာမှ မဖြစ်သေး မပြောင်းလဲသေးပါဘူး။
သို့သော်လည်း အမှတ် ၅၄ တက္ကသိုလ်ရိပ်သာလမ်း နေအိမ်မှာတော့ အပြောင်းအလဲတွေက ဆိုခဲ့သလိုပဲ ထူးထူးခြားခြား ဖြစ်ပေါ်နေပါတယ်။
ဧရာဝတီ(Blog)
No comments:
Post a Comment