သြစတြေးလျနိုင်ငံ ကွင်းစ်လန်းပြည်နယ်နဲ့ နယူးဆောက်သ်ဝေးပြည်နယ်တွေမှာ မြေနေရာပေါင်း ၁၄၀ ကျော် မီးလောင်နေတာကြောင့် ရာချီတဲ့ဒေသခံတွေ ဘေးလွတ်ရာ ထွက်ပြေးခဲ့ကြတယ်လို့ အရာရှိတွေက စက်တင်ဘာ ၁၀ ရက်နေ့မှာ ပြောပါတယ်။
စက်တင်ဘာ ၉ ရက်နေ့ကတည်းက အဲဒီပြည်နယ်နှစ်ခုမှာ လေပြင်းတွေ တိုက်ပြီး ချုံပုတ်တွေ မီးလောင်တာကြောင့် ဧရိယာဟက်တာ ထောင်ချီတဲ့ မြေတွေ ထိန်းမနိုင် သိမ်းမရ မီးလောင်ကျွမ်းခဲ့ပါတယ်။
အဲဒီထဲက မီးလောင်မှု ၈ ခုထက်မနည်းဟာ သဘာဝကြောင့် မဟုတ်ဘူးလို့ သံသယ ရှိတဲ့အတွက် စုံစမ်းစစ်ဆေးသွားမယ်လို့ ကွင်းစ်လန်းပြည်နယ် ရဲမင်းကြီးက သတင်းထောက်တွေကို ပြောပါတယ်။
ကွင်းစ်လန်းပြည်နယ်မှာ စိုထိုင်းဆ လျော့နည်းပြီး လေပြင်းတွေ တိုက်ခတ်တာကြောင့် စိုက်ခင်းမြေနေရာ ၈၅ နေရာ မီးလောင်ခဲ့ပြီး ပြည်နယ်တလွှား နေအိမ်အလုံး ၈၀ ကျော် ပျက်စီးခဲ့တယ်လို့ မီးသတ်ဌာနက ပြောပါတယ်။ ဒါ့အပြင် လူပေါင်း ၄၀၀ ကျော်ဟာလည်း ခိုလှုံရေးစင်တာမှာ နေကြရပါတယ်။
နယူးဆောက်သ်ဝေးပြည်နယ်မှာတော့ မီးသတ်သမားတွေဟာ မီးလောင်တဲ့နေရာ ၅၅ နေရာမှာ မီးငြှိမ်းသတ်နေပြီး အဆောက်အအုံ ၅ ခု မီးထဲပါသွားခဲ့တယ်လို့ နယူးဆောက်သ်ဝေး ကျေးလက်မီးသတ်ဌာနက ပြောပါတယ်။
အဲဒီပြည်နယ်နှစ်ခုမှာ ဒီဇင်ဘာလကနေ ဖေဖော်ဝါရီလအတွင်း နွေရာသီ ချုံပုတ်မီး သတိပေးချက်တွေ ထုတ်ပြန်လေ့ရှိပေမယ့် အခု မီးလောင်မှုကတော့ ပုံမှန်ရာသီထက် စောနေတယ်လို့ ရိုက်တာသတင်းဌာနက ဖော်ပြပါတယ်။
စက်တင်ဘာ ၁၀ ရက်နေ့ တနေ့လုံး လေတိုက်နှုန်း ပြင်းထန်နိုင်တယ်လို့ သြစတြေးလျ မိုးလေဝသဌာနက ထုတ်ပြန်ကြေညာထားပါတယ်။
DVB
DVB
No comments:
Post a Comment