မြောက်ကိုရီးယားနိုင်ငံမှာ စက်တင်ဘာ ၁၀ ရက်နေ့က လက်နက်စမ်းသပ်မှုကို ခေါင်းဆောင်ကင်ဂျုံအန်း ကိုယ်တိုင် စောင့်ကြည့်နေတဲ့ ရုပ်ပုံတွေကို မြောက်ကိုရီးယား နိုင်ငံပိုင်ရုပ်သံ သတင်းဌာန KRT က စက်တင်ဘာ ၁၁ ရက်မှာ ဖော်ပြခဲ့ပါတယ်။
ကင်ဂျုံအန်းဟာ အင်မတန်ကြီးမားတဲ့ ဘက်စုံသုံး ဒုံးကျည်ပစ် လောင်ချာ စမ်းသပ်ပစ်လွှတ်တာကို ကြီးကြပ်နေတာလို့ KRT သတင်းဌာနက ပြောပါတယ်။
စက်တင်ဘာ ၁၀ ရက်မှာ မြောက်ကိုရီးယားက တာတိုပစ်ဒုံးကျည်နှစ်စင်းကို ပစ်လွှတ်စမ်းသပ်ခဲ့တယ်လို့ တောင်ကိုရီးယား အရာရှိတွေကလည်း ပြောခဲ့ပါတယ်။
မြောက်ကိုရီးယားအနေနဲ့ အမေရိကန်နဲ့ နျူကလီးယားဆိုင်ရာဆွေးနွေးပွဲတွေ ပြန်စဖို့ ဆန္ဒရှိတယ်လို့ မြောက်ကိုရီးယား ဒုနိုင်ငံခြားရေးဝန်ကြီး ချွဲဆန်းဟွေက ကြေညာပြီး နာရီအပိုင်းအကြာမှာပဲ အခုလို ဒုံးကျည် ပစ်ခတ်စမ်းသပ်ခဲ့တာပါ။
စမ်းသပ်ခဲ့တဲ့ ဘက်စုံသုံး လောင်ချာဟာ တိုက်ခိုက်ရေး စစ်ဆင်ရေးတွေမှာ စွမ်းဆောင်နိုင်တယ်ဆိုတာ အတည်ပြုခဲ့ပြီး ဒီထက်မြန်မြန်ဆန်ဆန် ပစ်ခတ်နိုင်အောင် စမ်းသပ်ဖို့ ကျန်သေးတယ်လို့ ကင်ဂျုံအန်းက ပြောကြောင်း KRT က ဖော်ပြပါတယ်။
မြောက်ကိုရီးယားရဲ့ လက်နက်စမ်းသပ်မှုတွေဟာ နည်းပညာ တီထွင်စမ်းသပ်တာနဲ့ ကာကွယ်ရေး အာမခံချက် စတဲ့ရည်ရွယ်ချက်တွေကြောင့် ဖြစ်တယ်လို့ လေ့လာသူတွေက ပြောပါတယ်။
ဒါပေမယ့် စက်တင်ဘာ ၁၀ ရက်နေ့ စမ်းသပ်မှုကတော့ အမေရိကန်အနေနဲ့ မြောက်ကိုရီးယားနဲ့ ဆွေးနွေးပွဲမလုပ်ရင် ဘယ်လိုအခြေအနေ ဖြစ်သွားနိုင်တယ်ဆိုတာကို အသိပေးတဲ့လုပ်ရပ် ဖြစ်ပုံရတယ်လို့ လေ့လာသူတွေက ပြောပါတယ်။
DVB
No comments:
Post a Comment