ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာအထူးကိုယ်စားလှယ် Ms.Christine Schraner Burgener ဟာ ရခိုင်ပြည်နယ်ခရီးစဉ်ကို နိုဝင်ဘာ(၁၇)ရက်ကနေ (၁၉)ရက်အထိ (၃)ရက်ကြာ သွားရောက်ခဲ့ပါတယ်။ အထူးကိုယ်စားလှယ်ဟာ ရခိုင်ပြည်နယ်ခရီးစဉ်အတွင်း ပြည်နယ်လွှတ်တော်ဥက္ကဋ္ဌ ၊ ပြည်နယ်အစိုးရအဖွဲ့ဝင်တွေ၊ လူမှုအဖွဲ့အစည်းတွေနဲ့ တွေ့ဆုံမှုတွေပြုလုပ်ခဲ့တယ်လို့ တာဝန်ရှိသူတွေက ပြောပါတယ်။ နိုဝင်ဘာလ(၁၈)ရက်မှာတော့ အထူးကိုယ်စားလှယ်နဲ့ ရခိုင်ပြည်နယ်လွှတ်တော်ဥက္ကဋ္ဌ၊ ဒုဥက္ကဋ္ဌတို့ကို တွေ့ဆုံခဲ့ပြီး တိုက်ပွဲတွေနဲ့ ငြိမ်းချမ်းရေးကိစ္စ၊ (၂၀၂၀)ရွေးကောက်ပွဲ အခြေနေတွေ စတဲ့အကြောင်းအရာတွေ ဆွေးနွေးခဲ့တယ်လို့ ရခိုင်ပြည်နယ်လွှတ်တော်ဥက္ကဋ္ဌ ဦးစံကျော်လှက ပြောပါတယ်။
" သူတို့မေးတာတွေကတော့ စုံတော့ စုံပါတယ်။ လက်ရှိဖြစ်ပေါ်နေတဲ့အခြေအနေတွေကို သဟဇတ ကြကြပြောပြတာပေါ့။ တဘက်ကလည်း စိတ်ဝင်စားပါတယ်" လို့ ဦးစံလှကျော်က ပြောပါတယ်။
ကုလအထူးကိုယ်စားလှယ်ဟာ စစ်တွေမြို့နယ်ရှိ လူမှုအဖွဲ့အစည်းတွေနဲ့ နိုင်ငံရေးပါတီကို နိုဝင်ဘာ (၁၈)ရက်မှာ တွေ့ဆုံခဲ့ပြီး စစ်တွေဟိုတယ်မှာ ပြုလုပ်တဲ့ လူမှုအဖွဲ့အစည်းတွေနဲ့ တွေ့ဆုံပွဲမှာတော့ ရွေးကောက်ပွဲဆိုင်ရာကိစ္စရပ်တွေကို အဓိကမေးမြန်းခဲ့တယ်လို့ တွေ့ဆုံပွဲကိုတက်ရောက်ခဲ့တဲ့ ဝံလက်ဖောင်ဒေးရှင်းရဲ့ ဒါရိုက်တာဦးခိုင်ကောင်းစံက ပြောပါတယ်။
" ကျွန်တော်တို့နဲ့တွေ့တဲ့အချိန်မှာတော့ ရွေးကောက်ပွဲကိစ္စတွေပဲ မေးမြန်းသွားတာပါ။ နောက် ဒုက္ခသည်တွေ ရွေးကောက်ပွဲမှာ ဘယ်လိုပါဝင်မလဲ ဆိုတာတွေကိုမေးမြန်းသွားပါတယ်" လို့ ဦးခိုင်ကောင်းစံက ပြောပါတယ်။
မြန်မာနိုင်ငံဆိုင်ရာအထူးကိုယ်စားလှယ်ဟာ ရခိုင်ပြည်နယ်အစိုးရအဖွဲ့ဝင်ဝန်ကြီးတွေကို နိုဝင်ဘာ (၁၉)ရက်မှာ သွားရောက်တွေ့ဆုံခဲ့ပါတယ်။ အထူးကိုယ်စားလှယ်ရဲ့ ခရီးစဉ်အတွင်း မောင်တောမြို့နယ်ကိုသွားရောက်ပြီး နှစ်ဖက် အသိုက်အဝန်းခေါင်းဆောင်တွေ၊ ဘင်္ဂလားဒေ့ရှ်နိုင်ငံကနေ ပြန်လည်ဝင်ရောက်လာသူတွေ၊ မောင်တောဒေသအာဏာပိုင်တွေနဲ့ သီးခြားစီတွေဆုံခဲ့သလို ပေါက်တောမြို့နယ်ရှိ(IDP Camp)ကိုလည်း သွားရောက်ခဲ့ပါတယ်။
သတင်း - ကျော်လွင်
No comments:
Post a Comment