အန်အယ်လ်ဒီ အမျိုးသားဒီမိုကရေစီအဖွဲ့ချုပ် အစိုးရမှ ဦးဆောင်ဖွဲ့စည်းမည့် လူ့အခွင့်tရေးကော်မရှင် အပါအ၀င် အခြား ကော်မရှင်များတွင် ထင်ရှား သည့် ဒီမိုကရေစီအင်အားစုဖြစ်သည့် ၈၈ မျိုးဆက် ငြိမ်းချမ်းရေးနှင့် ပွင့်လင်း လူ့အဖွဲ့အစည်းမှထိပ်သီးခေါင်းဆောင်များက တာဝန်ယူပေးရန်အန်အယ်လ်ဒီ ပါတီဘက်မှ ကမ်းလှမ်းမှုအပေါ် ၈၈ မျိုးဆက်ဘက်မှ ငြင်းပယ်ထားကြောင်း နှစ်ဖက်အသိုင်းအ၀ိုင်းတွင်ရှိသော The Ladies News ၏ ယုံကြည်စိတ်ချရ သည့် သတင်းရင်းမြစ်များထံမှ သိရသည်။
အန်အယ်လ်ဒီ အစိုးရအား အတိုက်အခံမလုပ်ဘဲ ကူညီမည်ဟု ဆိုထားသော ၈၈ မျိုးဆက်အနေဖြင့် မည်သည့် အကြောင်းပြချက်ဖြင့် ငြင်းပယ်ခဲ့သည်ကိုမူ သေချာစွာ မသိရဘဲ အန်အယ်လ်ဒီအစိုးရ၏ လုပ်ဆောင်ချက်များကိုမူ စောင့်ကြည့်လေ့လာသွားမည် ဖြစ်ကြောင်းလည်း သိရသည်။
၈၈ မျိုးဆက် ပွင့်လင်းအဖွဲ့မှ ဆောင်ရွက်နေသည့် လုပ်ငန်းများဖြစ်သော အရပ်ဘက် လူမှုအဖွဲ့အစည်းဆိုင်ရာ လုပ်ငန်းများကိုမူ အန်အယ်လ်ဒီအစိုးရ လက်ထက်တွင် ဆက်လက် ဆောင်ရွက်သွားမည်ဖြစ်ပြီး အလုပ်သမား ၊ လယ်သမားအရေးနှင့် လူ့အခွင့်ရေးဆိုင်ရာ ကိစ္စရပ်များ ပြသ၁နာများ ပေါ်ပေါက်လာပါက အန်အယ်လ်ဒီအစိုးရနှင့် ပူးပေါင်းဖြေရှင်း ဆောင်ရွက်သွားမည် ဖြစ်ကြောင်းလည်း ၈၈ မျိုးဆက် အသိုင်းအ၀ိုင်းမှ ယခင်ကတည်းကပင် The Ladies News ကို ပြောဆိုထားသည်။
မြန်မာပြည်မ နိုင်ငံရေး အဖွဲ့အစည်းများအနက် အန်အယ်လ်ဒီပြီးလျှင် လူထုထောက်ခံမှု အများဆုံးရရှိထားသည့် ကိုမင်းကိုနိုင် ၊ ကိုကိုကြီး တို့ဦးဆောင်သည့် ၈၈ မျိုးဆက်မှာ အစဉ်အလာအားဖြင့် အန်အယ်လ်ဒီ အမျိုးသား ဒီမိုကရေစီအဖွဲ့ချုပ်အား နှစ်ကာလတာရှည် ၀န်းရံလာခဲ့သူများ ဖြစ်သော်လည်း ရွေးကောက်ပွဲအကြို ကာလက ကိုယ်စားလှယ်လောင်း စာရင်း ထုတ်ပြန်ရာတွင် အန်အယ်လ်ဒီနှင့် ပူးပေါင်းခဲ့သော ၈၈ မျိုးဆက် အဖွဲ့ဝင် အများအပြားမှာ စာရင်းမှ ချန်လှပ်ခံခဲ့ရပြီးနောက်ပိုင်း အန်အယ်လ်ဒီနှင့် ၈၈ မျိုးဆက်တို့အကြား ဆက်ဆံရေးမှာ အနည်းငယ် အေးခဲလာခဲ့သည်ဟု နီးစပ်သူများကဆိုကြပါသည်။
အန်အယ်လ်ဒီ၏ ကာလရှည် မဟာမိတ်ဖြစ်သည့် ရှမ်းတိုင်းရင်းသားများ ဒီမိုကရေစီအဖွဲ့ချုပ်မှလည်း အန်အယ်လ်ဒီမှ ကမ်းလှမ်းခဲ့သည့် တိုင်းရင်း သားရေးရာ ပြည်ထောင်စုဝန်ကြီး ရာထူးကို ငြင်းပယ်ခဲ့ပြီး ၈၈ မျိုးဆက် များ၏ ငြင်းပယ်မှုမှာ အန်အယ်လ်ဒီ၏ ကာလရှည် မဟာမိတ်များအနက် ဒုတိယမြောက်အဖွဲ့အစည်း၏ ငြင်းပယ်မှု ဖြစ်လာသည်။
“အခု ဒီမိုကရေစီအင်အားစုတွေ အကြားမှာက ယုံကြည်မှု ပြန်တည်ဆောက် ဖို့ လိုနေတဲ့ သဘောလိုလို ဖြစ်နေတယ်။ ၈၈ နဲ့ အန်အယ်လ်ဒီ အကြားမှာ ဆိုရင် ပြီးခဲ့တဲ့ ရွေးကောက်ပွဲ အကြိုကာလကတည်းက ကိုယ်စားလှယ် လောင်း ရွေးချယ်မှုမှာ အန်အယ်လ်ဒီဘက်က ရွေးချယ်မှုက အမျိုးသား ပြန်လည်သင့်မြတ်ရေးဆိုတဲ့ မူကို အခြေမခံခဲ့ဘူး။ ဒါ့အပြင် ကာလရှည် တိုင်းရင်းသား မဟာမိတ်တွေနဲ့လည်း ဒီအတိုင်းပဲ ။ အခုအနေထားက ထင်းစည်းတွေ အရင်ကတည်းက ပေါင်းရမယ့်ဟာ အဖျားချင်းပဲ စည်းထား သလို ဖြစ်နေတယ်။ အခုက ချက်ချင်းပေါင်းဖို့ ခက်နေတဲ့ အခြေအနေ ဖြစ်နေတယ်။ အခြေအနေ ပြန်ပေးလာခဲ့ရင်တော့ စုစည်းညီညွတ်အောင် မဖြစ်မနေ လုပ်ရလိမ့်မယ်” ဟု ၈၈ မျိုးဆက်ဟောင်းတစ်ဦးဖြစ်ပြီး နှစ်ရှည်နိုင်ငံရေး အကျဉ်းသားဟောင်းတစ်ဦးဖြစ်ခဲ့ကာ သတင်းမီဒီယာ သမား တစ်ဦးလည်းဖြစ်သူ ကိုလကျာ်ထွန်းက ဒီမိုကရေစီအင်အားစုများ အကြား ညီညွတ်ရေးနှင့် ပတ်သက်၍ မှတ်ချက်ပြုပြောဆိုသည်။
The Laides News
No comments:
Post a Comment