ဆီးရီးယား အစိုးရကို ထောက်ခံတဲ့ လက်နက်ကိုင် တပ်ဖွဲ့တွေဟာ Palmyra မြို့ကို IS အစ္စလာမ်မစ် အဖွဲ့ရဲ့ လက်ထဲကနေ ပြန်လည် ရယူဖို့ ကြိုးစားနေ ပါတယ်။Palmyra ရှေးဟောင်းမြို့ဟာ ယူနက်စကိုက ကမ္ဘာ့အမွေအနှစ် အဖြစ် သတ်မှတ်ထားတာ ဖြစ်ပြီး သဲကန္တာရရဲ့ ပုလဲ လို့ တင်စားခေါ်ဝေါ်ထားတဲ့ မြို့ ဖြစ်ပါတယ်။
အရင်နှစ် မေလတုန်းက IS အဖွဲ့က Palmyra မြို့ကို သိမ်းဆည်းပြီး နှစ်ထောင်ချီ သက်တမ်းရှိတဲ့ ရှေးဟောင်း ပစ္စည်းတွေကို ဖျက်ဆီးတာတွေ၊ ခိုးယူတာတွေ လုပ်ခဲ့ကြပါတယ်။
အခုအခါမှာတော့ ဆီးရီးယား အစိုးရကို ထောက်ခံတဲ့ လက်နက်ကိုင် တပ်က Palmyra မြို့ရဲ့ အပြင်မှာ ရောက်ရှိနေပြီး ရုရှား စစ်တပ်ရဲ့ အကူအညီနဲ့ ထိုးစစ်ဆင်မှာ ဖြစ်ပါတယ်။
မြို့ပြင်မှာ တိုက်ပွဲတွေ ဖြစ်ခဲ့တယ်လို့လည်း ဗြိတိန် အခြေစိုက် ဆီးရီးယား လူ့အခွင့်အရေး စောင့်ကြည့်ရေး အဖွဲ့က ပြောပါတယ်။
Palmyra မြို့ကို ပြန်သိမ်းနိုင်မယ်ဆိုရင် သမ္မတ Bashar al-Assad အတွက် အင်မတန် အားတက်စရာ ဖြစ်သလို Palmyra မြို့ကို ရရှိရင် ကျယ်ပြန့်တဲ့ သဲကန္တာရကို ရရှိမှာ ဖြစ်ပြီး အဲဒီနေရာဟာ အီရတ်နိုင်ငံနဲ့ နယ်စပ်ခြင်း ထိစပ်တဲ့ နေရာဖြစ်လို့ အချက်အခြာကျတဲ့ နေရာလည်း ဖြစ်ပါတယ်။
တဆက်တည်းမှာပဲ ဆီးရီးယားနိုင်ငံ ငြိမ်းချမ်းရေးနဲ့ ပတ်သက်ပြီး အမေရိကန်နဲ့ ရုရှားအဆင့်မြင့် ကိုယ်စားလှယ်တွေ ရုရှား စံတော်ချိန် ကြာသပတေးနေ့မှာ ဆွေးနွေးဖို့ ရှိနေပါတယ်။
အမေရိကန် နိုင်ငံခြားရေး ဝန်ကြီး ဂျွန်ကယ်ရီက ရုရှားနိုင်ငံကို ရောက်ရှိနေပြီး သမ္မတ ဘလာဒီမီယာ ပူတင်နဲ့ နိုင်ငံခြားရေး ဝန်ကြီး Sergie Lavrov နဲ့ တွေ့ဆုံဖို့ ရှိနေပါတယ်။
ဂျီနီဗာမြို့မှာ ကုလသမဂ္ဂက ဦးဆောင်ပြီး ငြိမ်းချမ်းရေး ဆွေးနွေးပွဲ ပြုလုပ်ပေမယ့် ဘာတိုးတက်မှုမှ မရတဲ့အတွက် အမေရိကန်နဲ့ ရုရှားတို့ရဲ့ တွေ့ဆုံမှုကိုပဲ အလေးထား စောင့်ကြည့်နေကြတာ ဖြစ်ပါတယ်။
ABC
No comments:
Post a Comment