တရားဟောဆရာစောဒေးဗစ်လားကို ယနေ့တွင် ရမန် ၂ပါတ်ရယူပြီး အင်းစိန်အကျဉ်းထောင်သို့ ယနေ့ပို့ဆောင်လိုက်ပြီဖြစ်ကြောင်းသိရသည်။
ရဲတပ်ဖွဲ့က ရဲလုပ်ငန်းဆောင်ရွက်စရာများရှိသည်ဆိုပြီး ချုပ်မိန့်လာတောင်းသဖြင့် မရမ်းကုန်းတရားရုံးက ပေးအပ်လိုက်ခြင်းဖြစ်သည်ဟု ယင်းတရားရုံးက ပြောဆိုသည်။
”ဒီနေ့ကနေ ၃၊၆၊၂၀၂၀အထိ ချုပ်ရက်ရမန်ပေးလိုက်ပါတယ်”ဟု တရားရုံးက ပြောသည်။
တရားဟောဆရာစောဒေးဗစ်လားသည် လူစုလူဝေးမလုပ်ရန်တားမြစ်ချမှတ်ထားသည့် စည်းမျဉ်းစည်းကမ်းများအား မလိုက်နာဘဲ ညီအကိုများအသင်းတော်ဝန်းအတွင်းရှိ ပေ ၂၀ပါတ်လည်အခန်းထဲတွင် ဝတ်ပြုဆုတောင်းခြင်းနှင့် ဓမ္မတေးများသီဆိုခြင်း၊လူမှုကွန်ရက်မှတဆင့် တိုက်ရိုက်ထုတ်လွှင့်မှုတို့ကို ပြုလုပ်သဖြင့် ၃နှစ်ထက်မပိုသောထောင်ဒဏ်နှင့်ငွေဒဏ်ပါချမှတ်နိုင်သည့်၂၀၁၃ခုနှစ်သဘာဝဘေးအန္တရာယ်ဆိုင်ရာပုဒ်မ၂၅ဖြင့် အမှုဖွင့်အရေးယူခဲ့သည်ဟုသိရသည်။
အလားတူ သင်းအုပ်ဆရာ ဦးစောကွယ်ဝါးနှင့် အမှုတော်ဆောင် ဦးစောရေဂန်နီတို့အား အင်းစိန်မြို့မှ ရဲစခန်းက (ပ)၊၇၀၆ /၂၀၂၀ဖြင့်လည်းကောင်း၊နဝရတ်တေးသံသွင်းမှဦးဝေထွန်းတို့အား မရမ်းကုန်းမြို့မရဲစခန်းက ပ ၅၈၃/ ၂၀၂၀ ဖြင့် လည်းကောင်း အသီးသီးအမှုဖွင့်အရေးယူခဲ့သည်။
တရားဟောဆရာစောဒေးဗစ်လားအား ယနေ့တွင် အင်းစိန်ထောင်ပို့ခဲ့သလိုပင် စောဒေးဗစ်လားတို့နှင့်အတူ အမှုဖွင့်ခံထားရသော သင်းအုပ်ဆရာ ဦးစောကွယ်ဝါးကို အင်းစိန်တရားရုံးတွင် စစ်ဆေးပြီး ချုပ်ရက်ရမန်ဖြင့် အင်းစိန်ထောင်သို့ ပို့ဆောင်လိုက်ကြောင်းလည်း သိရသည်။
ကိုမင်း/Myanmar Harp
No comments:
Post a Comment