ကချင်ပြည်နယ်တွင်း ရှမ်းမျိုးနွယ်စုများသည် ပြည်နယ်လူဦးရေ၏ ၆၀ ရာခိုင်နှုန်းခန့်ရှိကြောင်း ခန့်မှန်း ငြိမ်းချမ်းရေးရရှိရန် ပြည်နယ်တွင်းမှ လူမျိုးအားလုံး၏ မျက်နှာကို အဓိကထား၍ ကြည့်ကာ စဉ်းစားရမည်ဟု တိုင်းလိုင်(ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ အတွင်းရေးမှူး ပြောကြား
ကချင်ပြည်နယ်အတွင်း နေထိုင်သော တိုင်းရင်းသားလူမျိုးများအနက် ရှမ်းမျိုးနွယ်စုများသည် ပြည်နယ်လူဦးရေ၏ ၆၀ ရာခိုင်နှုန်းခန့်ရှိသည်ဟု ခန့်မှန်းထားကြောင်းနှင့် ငြိမ်းချမ်းရေးရရှိရန်အတွက် ပြည်နယ်တွင်းမှ တိုင်းရင်းသားလူမျိုးအားလုံး၏ မျက်နှာကို အဓိကထား၍ ကြည့်ကာ ဆွေးနွေးရမည်ဖြစ်ကြောင်း တိုင်းလိုင် (ရှမ်းနီ)အမျိုးသားများ ဖွံ့ဖြိုးတိုးတက်ရေးပါတီမှ အတွင်းရေးမှူးက ပြောကြားခဲ့သည်။
ကချင်ပြည်နယ်တွင်း လက်ရှိဖြစ်ပေါ်နေသော အခြေအနေများ၊ ငြိမ်းချမ်းရေးရရှိရန် လိုအပ်နေမှုများ စသည်တို့နှင့်ပတ်သက်၍ သဘောထားအမြင်ကို မေးမြန်းရာတွင် တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီမှ အတွင်းရေးမှူး ဦး စောဝင်းထွန်းက ပြန်လည်ဖြေကြားခဲ့သည်။
''အခုလက်ရှိ ကချင်ပြည်နယ် ငြိမ်းချမ်းရေးရဖို့ဆိုရင် တပ်မတော်ရယ် လက်ရှိအစိုးရပေါ့ဗျာ၊ လက်ရှိတိုက်ပွဲဖြစ်နေတဲ့ ကချင်အဖွဲ့အစည်းပေါ့။ သူတို့ရဲ့ သဘောတူညီချက်ရရင်၊ ငြိမ်းချမ်းရေးရရင် အကောင်းဆုံးပေါ့။ သို့သော်လည်း အမြဲတမ်း တည် တံ့တဲ့ ငြိမ်းချမ်းရေးရဖို့ဆိုရင်တော့ ကချင်ပြည်နယ်တွင်းမှာ နေထိုင်ကြတဲ့ လူမျိုးအားလုံးပေါ့။ ဒေသခံလူမျိုး အားလုံးတို့ရဲ့ သဘောထားဆန္ဒကိုလည်း ထည့်သွင်းစဉ်းစားပေးမယ်ဆိုရင်တော့ ဒါဟာပိုမိုပြီး ကောင်းမွန်တဲ့ ငြိမ်းချမ်းရေးကို ရရှိမယ်လို့ ယုံကြည်ထားပါတယ်''ဟု ဦးစောဝင်းထွန်းက ပြောကြားခဲ့သည်။
ကချင်ပြည်နယ်တွင်း တပ်မတော်နှင့် ကေအိုင်အေအဖွဲ့တို့အကြား တစ်ကျော့ပြန်တိုက်ပွဲများသည် ၂၀၁၁ ခုနှစ် ဇွန်လ ၉ ရက်နေ့က စတင်ခဲ့သည်။
ပြည်ထောင်စု ငြိမ်းချမ်းရေးဖော်ဆောင်ရေးကော်မတီနှင့် ကချင်လွတ်မြောက်ရေးအဖွဲ့(ကေအိုင်အို) မှ တာဝန်ရှိသူများသည် ပြည်နယ်အဆင့် သုံးကြိမ်၊ ပြည်ထောင်စုအဆင့် သုံးကြိမ်တွေ့ဆုံခဲ့ပြီးဖြစ်သော်လည်း ဆွေးနွေးပြေလည်ခြင်း မရှိခဲ့သေးကြောင်း သိရှိရသည်။
ကချင်ပြည်နယ်အတွင်း တိုက်ပွဲများမှာ စက်တင်ဘာလဆန်းပိုင်းအထိ ဆက်လက်ဖြစ်ပွားမှု ရှိနေသည်။
''ပါတီအမြင်ဆိုတာထက် ကျွန်တော့်ရဲ့ အမြင်ပေါ့။ ကျွန်တော်လည်း ဒေသခံပါ။ ကိုယ့်မြေ ကိုယ့်ရေအကြောင်း ပိုသိပါတယ်။ အဓိက မရနိုင်ရခြင်းအကြောင်းက တစ်ဖက်နဲ့တစ်ဖက်ရယ်လို့ မပြောလိုပါဘူး။ ငြိမ်းချမ်းရေး ဆွေးနွေးနေကြတဲ့အထဲမှာ သူ့အယူအဆ၊ ကိုယ့်အယူအဆဆိုတာ ရှိကြမှာပါ''ဟု ဦးစောဝင်းထွန်းက ပြောကြားသည်။
''သို့သော်လည်း ဆွေးနွေးနေကြတဲ့ နှစ်ဖွဲ့လုံး အဓိကအားဖြင့် ပြောရင်တော့ ပြည်သူလူထုရဲ့ မျက်နှာ၊ ကချင်ပြည်နယ်တွင်းမှာ နေထိုင်ကြတဲ့ တိုင်းရင်းသားလူမျိုးတွေအားလုံးရဲ့မျက်နှာကို အဓိကထားကြည့်ပြီးမှ စဉ်းစားကြမယ်ဆိုရင်တော့ ငြိမ်းချမ်း ရေးရမယ်၊ ထာဝရငြိမ်းချမ်းရေးလည်း ဖြစ်မယ်။ ငြိမ်းချမ်းရေးမရနိုင်တဲ့ အချက်ကတော့ ဆွေးနွေးနေကြတဲ့ အချက်တွေမှာ အဓိကကအရေးတကြီးအဖြစ် သူတို့ မထည့်သွင်း မစဉ်းစားသေးတဲ့အတွက်ကြောင့် ငြိမ်းချမ်းရေး မရခြင်းလို့ပဲ ယူဆပါတယ်''ဟု ၎င်းက သုံးသပ်သည်။
၂၀၁၂ ခုနှစ် စက်တင်ဘာလ ၆ ရက်နေ့က ပြုလုပ်ခဲ့သော အမျိုးသားလွှတ်တော် အစည်းအဝေးတွင် ကချင်ပြည်နယ် မဲဆန္ဒနယ်အမှတ် (၁)မှ အမျိုးသားလွှတ်တော်ကိုယ်စားလှယ် ဦးခက်ထိန်နန်၏ အပစ်အခတ်ရပ်စဲ ရေး/ငြိမ်းချမ်းရေးနှင့် စပ်လျဉ်းသည့် မေးခွန်းအား ကာကွယ်ရေးဝန်ကြီးဌာနဒုတိယ၀န်ကြီး ဗိုလ်မှူးချုပ်အောင်သော်က ဖြေကြားရာတွင် KIA အဖွဲ့အနေဖြင့် အပစ်အခတ်ရပ်စဲရေး လုပ်ငန်းစဉ်ကို လုံးဝညှိနှိုင်း ဆွေးနွေးခြင်းမရှိဘဲ နိုင်ငံရေးအရ ဆွေးနွေး ညှိနှိုင်းမှု ပြုလုပ်ပြီးမှသာ အပစ်အခတ် ရပ်စဲမည်ဆိုသည့်အချက်ကို ကိုင်စွဲထားသဖြင့် လတ်တလော ပစ်ခတ်မှုများ ဖြစ်ပေါ်နေရခြင်းဖြစ်သည်ဟု ထည့်သွင်းဖြေကြားခဲ့သည်။
သမ္မတကြီး၏ ညွှန်ကြားချက် ရရှိပြီးနောက်ပိုင်း တပ်မတော်အနေဖြင့် ကေအိုင်အေတပ်စခန်းများကို ထိုးစစ်ဆင်ခြင်းကို လုံးဝပြုလုပ်ခဲ့ခြင်း မရှိကြောင်း၊ အများပြည်သူ အသုံးပြုလျက်ရှိသော လမ်းကြောင်းနှင့် နယ်မြေလုံခြုံရေး ဆောင်ရွက်စဉ် တစ်ဖက်မှ တိုက်ခိုက်လာမှုများအား ပြည်သူလူထု၏ အကျိုးစီးပွားကို အစဉ်စောင့်ရှောက်ရန် တာဝန်ရှိသည်နှင့်အညီ ယင်းတာဝန်ကိုသာ ထမ်းဆောင်နေခြင်းဖြစ်ကြောင်း ဗိုလ်မှူးချုပ်အောင်သော်က မေးခွန်းဖြေကြားရာတွင် ထည့်သွင်း ပြောကြားခဲ့သည်။
No comments:
Post a Comment