ထိုင်းနိုင်ငံ အိမ်ရှေ့မင်းသား၏ ကြင်ယာတော် တာချီလိတ်သို့ လာရောက် ဘုရားဖူး
19-12-2013
ယနေ့
၂၀၁၃ခုနှစ် ဒီဇင်ဘာလ(၁၉)ရက် နံနက်ပိုင်းတွင် ထိုင်းနိုင်ငံ
အိမ်ရှေ့မင်းသား မဟာဝချိရာလုံကွန်၏ ကြင်ယာတော် ဆရီရတ်မင်းသမီး နှင့်
မိသားစုဝင်များ၊ လုံခြုံရေးအဖွဲ့ဝင်များအပါအ၀င် ထိုင်းနိုင်ငံ တပ်မတော်(ကြည်း) စစ်ဦးစီးအရှိများ၊ သင်တန်း အမှတ်စဉ်(၉၂)မှ သင်တန်းနည်းပြများနှင့် သင်တန်းသားအရာရှိများ ပါဝင်သည့်
အဖွဲ့သည် မယ်ဆိုင်မြို့မှတဆင့် ထိုင်း-မြန်မာ အမှတ်(၁) ချစ်ကြည်ရေးတံတားမှ
တာချီလိတ်မြို့သို့ လာရောက်၍ တာလော့ဈေးအတွင်း လှည့်လည်
လေ့လာကြည့်ရှုခြင်းနှင့် တာချီလိတ်ရွှေတိဂုံစေတီတော်အား ဖူးမျှော်ကြည်ညိုခြင်းအပြင်
နဂါးနှစ်ကောင် ဆရာတော်ဘုရားကြီးအား ဖူးမျှော်ကြည်ညို၍ အဆိုပါ
နံနက်ပိုင်းမှာပင် တာချီလိတ်မြို့မှ ထိုင်းနိုင်ငံသို့ ပြန်လည်
ထွက်ခွာသွားခဲ့ကြသည်။
ဦးစွာပထမ ထိုင်းနိုင်ငံ
တပ်မတော်(ကြည်း)မှ စစ်ဦးစီးအရှိများ၊ သင်တန်း အမှတ်စဉ်(၉၂)မှ
သင်တန်းနည်းပြများနှင့် သင်တန်းသားအရာရှိများ စုစုပေါင်း ( ၁၄၂ )ဦးတို့က
ရောက်နှင့်နေကာ တာလော့ဈေးအတွင်း လေ့လာကြည့်ရှုခဲ့ကြပြီး
တာချီလိတ်ရွှေတိဂုံစေတီတော်သို့ ရောက်ရှိလာခြင်းဖြစ်သည်။
ယင်းနောက် ထိုင်းနိုင်ငံ အိမ်ရှေ့မင်းသား၏ ကြင်ယာတော် ဆရီရတ်မင်းသမီး
နှင့် မိသားစုဝင်များ ပါဝင်သော လုံခြုံရေးအဖွဲ့ဝင်များ စုစုပေါင်း
(၉၉)ဦးတို့သည် နံနက်(၁၀း၃၀)နာရီအချိန်မှာ တာချီလိတ်သို့ ၀င်ရောက်လာရာ
မြန်မာနိုင်ငံဘက်မှ စစ်ဘက်၊ နယ်ဘက် နှင့် ဌာနဆိုင်ရာ တာဝန်ရှိသူများက
ကြိုဆိုခဲ့ကြပြီး မော်တော်ယာဉ်များဖြင့် ဆက်လက်၍
တာချီလိတ်ရွှေတိဂုံစေတီတော်သို့ အဆိုပါအဖွဲ့မှ ရောက်ရှိခဲ့ကြသည်။
တာချီလိတ်ရွှေတိဂုံစေတီတော်ပေါ်သို့
ရောက်ရှိလာပြီးနောက် ထိုင်းနိုင်ငံ တပ်မတော်(ကြည်း) စစ်ဦးစီးအရှိများ၊
သင်တန်း အမှတ်စဉ်(၉၂)မှ သင်တန်းနည်းပြများနှင့် သင်တန်းသားအရာရှိများမှ
ကြင်ယာတော် ဆရီရတ်မင်းသမီးအတူ အမှတ်တရဓါတ်ပုံများ ရိုက်ကူးခဲ့ကြသည်။
ဆက်လက်၍ ကြင်ယာတော် ဆရီရတ်မင်းသမီးသည် ရွှေတိဂုံစေတီတော်အား တပတ် ပတ်၍
ဖူးမျှော်ကာ ကြာသာပတေးထောင့်တွင် ပန်း၊ ဆီမီး၊ အမွှေးနံ့သာတိုင်များ
ထွန်းညှိပူဇော်ကန်တော့ပြီး ဓမ္မာရုံ၌ နဂါးနှစ်ကောင်ဆရာတော်ဘုရားကြီးအား ဖူးမျှော်ကြည်ညိုခဲ့ကြသည်။
အဆိုပါအဖွဲ့တို့သည် နံနက် (၁၁း၁၀)နာရီအချိန်တွင် ရွှေတိဂုံစေတီတော်ပေါ်မှ
ပြန်လည်ထွက်ခွာသွားပြီး အမှတ်(၁) ချစ်ကြည်ရေးတံတားအနီးရှိ
ရွှေနန်းတော်ကုန်တိုက်အတွင်း ၀င်ရောက်၍ အချိန် (၃၅)မိနစ်အကြာ လှည့်လည်ကြည့်ရှုခဲ့ကြပြီးနောက် ထိုင်းနိုင်ငံ မယ်ဆိုင်မြို့သို့ ပြန်လည် ထွက်ခွာသွားခဲ့ကြောင်း သိရသည်။
ယခုလာရောက်သော အဖွဲ့သည် တာချီလိတ်မြို့တွင် ယခုလထဲ၌ ပြုလုပ်မည်ဖြစ်သော
နဂါးနှစ်ကောင် ဆရာတော်ဘုရားကြီး၏ မွေးနေ့ပူဇော်ပွဲသို့လည်း ထပ်မံ၍
လာရောက်နိုင်ဖွယ်ရှိကြောင်း အတည်မပြုနိုင်သေးသော ပြောစကားအရ သိရှိရသည်။
Tachileik Online News
No comments:
Post a Comment