မြန်မာစစ်သားနှစ်ယောက်ကို အိန္ဒိယရဲ ထိန်းသိမ်းထား

အိန္ဒိယနိုင်ငံ မီဇိုရမ်ပြည်နယ်ထဲကို အိန္ဒိယ-မြန်မာနယ်စပ်ကနေ ခိုးဝင်လာတဲ့ မြန်မာစစ်သားနှစ်ယောက်ကို နယ်စပ်လုံခြုံရေး အာသံရိုင်ဖယ်တပ်ကနေ မနေ့က ဖမ်းထားလိုက်တယ်လို့ ဒေသအာဏာပိုင်ရဲအဖွဲ့ကို ကိုးကားပြီး အိန္ဒိယ ပီတီအိုင်သတင်းက ပြောပါတယ်။

~ အိန္ဒိယ-မြန်မာ ဆက်သွယ်သည့် မီဇိုရမ်ပြည်နယ် နယ်စပ်၊ ချန်ဖိုင်း-ရိဒ်ကထား နယ်စပ်ဂိတ် တနေရာ ~
(ဓာတ်ပုံ - theweatherinindia.com)

မီဇိုရမ်ဖက်ခြမ်း ချန်ဖိုင်းခရိုင်၊ ငေါ်ရွာနားက ဇေလ်ရီဖိုင် ဒေသနားကို ရောက်လာတဲ့ အဲ့ဒီ မြန်မာစစ်သားနှစ်ယောက်နဲ့အတူ AK-47 သေနတ်တလက်၊ ကျည်ကပ်တခု၊ မိုဘိုင်းဖုန်းတလုံး ပါပြီး၊ အဲ့ဒီဒေသက လယ်သမားတွေဆီကနေ မြန်မာငွေ ကျပ်တသိန်းပေးဖို့ အဓမ္မ တောင်းခံနေတုန်း နယ်စပ်လုံခြုံရေး ကင်းလှည့်လာတဲ့ အာသံရိုင်ဖယ်တပ်က ဖမ်းလိုက်တာလို့ ဆိုပါတယ်။

အဲ့ဒီမြန်မာစစ်သားနှစ်ယောက်ကို ချန်ဖိုင်းရဲစခန်းမှာ လောလောဆယ်ထိန်းသိမ်းထားတယ်ဆိုတာပဲ သိရပြီး သူတို့ဟာ ဘာအဆင့်လဲ၊ ဘယ်တပ်ကလဲ၊ သူတို့ကို သက်ဆိုင်ရာ တပ်ကို ပြန်အပ်မှာလား ဆိုတာတွေကိုတော့ မသိရသေးပါဘူး။ 

ဧရာဝတီ(Blog)