ပြန်လည်ထူထောင်ရေးကောင်စီ (RCSS/SSA) အဖွဲ့က ဖေဖော်ဝါရီ ၁၈ ရက်တွင် တိုက်ခိုက် သိမ်းပိုက်နိုင်ခဲ့ကြောင်း နှစ်ဖက်အသိုင်းဝိုင်းများထံမှ သိရသည်။ စခန်းကုန်းသိမ်း တိုက်ပွဲတွင် အကျအဆုံးများခဲ့ပြီး TNLA ဘက်က ထွက်ပြေး ဆုတ်ခွာ သွားကြောင်း TNLA တံဆိပ်ပါ အလောင်း ၁၀ လောင်းနှင့် လက်နက်ခဲယမ်းများကို သိမ်းဆည်းရမိကြောင်း RCSS/SSA က ထုတ်ပြန်သည်။
တအာင်းအမျိုးသား လွှတ်မြောက်ရေး တပ်မတော် (PSLF/TNLA ) မှ ပြောရေးဆိုခွင့်ရှိသူ မိုင်အိုက်ကျော် အား The Ladies က မေးမြန်းရာ ၎င်းတို့အနေဖြင့် ကျေးရွာများတွင် မိုဘိုင်း(ရွေ့လျားတပ်) အဖြစ်သာ အခြေချထားခြင်း ဖြစ်သည်ဟု ပြန်လည်ဖြေကြားခဲ့သည်။
“ကျွန်တော်တို့တပ်တွေက မိုဘိုင်းအဖြစ်ပဲရှိတာပါ။ စခန်းတွေဘာတွေ မရှိဘူး ” ဟု TNLA ပြောရေးဆိုခွင့်ရှိသူ မိုင်အိုက်ကျော်က ပြောသည်။ စစ်ရေးနိုင်ငံရေး အကဲခတ်တစ်ဦးကလည်း တအာင်းပလောင်စခန်းများ သိမ်းပိုက်ခံရသည်မှာ မှန်ကန်ပြီး RCSS ဘက်မှ လက်နက်ကြီး အမြောက် အမြား အသုံးပြုခဲ့သောကြောင့် အစိုးရစစ်တပ်ဘက်မှ လက်နက်ကြီးပစ်ကူ များ ပစ်ပေးသည်ဟု သံသယ၀င်စရာ ဖြစ်နေကြောင်း သုံးသပ်ပြောဆိုသည်။
ရှမ်းပြည်မြောက်ပိုင်း တော့ဆန်၊တောင်ပလို့၊ စာတီဟောင်း၊ စာတီစမ်း၊ ပန်မက်မိုင်း၊ မိုင်လုံ အစရှိသည့် ကျောက်မဲမြို့နယ် အတွင်းရှိ နေရာများအား RCSS/SSA တပ်ဖွဲ့များက TNLA တပ်ဖွဲ့များထံမှာ တိုက်ခိုက် ထိန်းချုပ်ထား လိုက်နိုင်ပြီဖြစ်ကြောင်း RCSS/SSA တာဝန်ရှိသူတစ်ဦးကလည်း The Ladies News သို့ ပြောသည်။
ကိုယ်ပိုင်အုပ်ချုပ်ခွင့်ရ ဒေသအဖြစ် သတ်မှတ်ခံထားရသည့် တအာင်း ပလောင် ဒေသအား ပြည်နယ်အဆင့် တိုးမြှင့် သတ်မှတ်ပေးရန်နှင့် လက်ရှိဒေသအပြင် တအာင်းပလောင် လူမျိုးအချို့ ရှိနေသော နမ့်ခမ်း ၊ မူဆယ်ကဲ့သို့ ဒေသများကိုပါ ပြည်နယ်သတ်မှတ်မှု အတွင်း ထည့်သွင်းပေး ရန် ပြည်ထောင်စုငြိမ်းချမ်းရေး ညီလာခံတွင် တင်ပြခဲ့ပြီး နောက်ပိုင်း ရှမ်းလက်နက်ကိုင် တပ်ဖွဲ့ဖြစ်သည့် RCSS/SSA နှင့် တအာင်းပလောင် တပ်ဖွဲ့တို့အကြား တိုက်ပွဲများမှာ ပြင်းထန်လာခဲ့ခြင်းဖြစ်သည်။
ရှမ်းပြည် ပြန်လည်ထူထောင်ရေး ကောင်စီ RCSS/SSA မှာ ရှမ်းပြည်တောင် ပိုင်း ထိုင်းနယ်စပ်အခြေစိုက် လက်နက်ကိုင် အဖွဲ့စည်းဖြစ်ပြီး အစိုးရနှင့် နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးထားကာ တအာင်း ပလောင်အဖွဲ့မှာ ရှမ်းမြောက်ဒေသ တရုတ်နယ်စပ် အနီးတွင် လှုပ်ရှားနေ သော အဖွဲ့စည်းဖြစ်ကာ ကေအိုင်အို ၊ ကိုးကန့် ၊ ၀ စသော တပ်ဖွဲ့များနှင့် ရင်းနှီးသော ဆက်ဆံမှုရှိသည့် အဖွဲ့စည်းဖြစ်သည်။
သတင်း - ဇော်မင်းထွန်း
The Ladies News
No comments:
Post a Comment