ကချင်ပြည်နယ်ငြိမ်းချမ်းရေးနှင့်မြစ်ဆုံအရေးကိစ္စများအတွက်ဘာသာပေါင်းစုံ၊တိုင်းရင်းသားပေါင်းစုံပါဝင်သောဆုတောင်းပွဲတစ်ရပ်ကို၂၀၁၂ခုနှစ်မတ်လ၂၇ရက်နေ့ကရန်ကုန်မြို့ပြည်လမ်းရှိယုဒဿန်ဗိမာန်တော်တွင်ပြုလုပ်ခဲ့ပါသည်။
ဆုတောင်းပွဲကိုညနေ၄နာရီအချိန်တွင်စတင်ခဲ့ပြီးဗုဒ္ဓဘာသာ၊ခရစ်ယာန်၊အစ္စလာမ်၊ဟိန္ဒူစသည့်ဘာသာကြီးလေးခုမှတက်ရောက်လာသူများ၊ကချင်ပြည်နယ်ဒေသခံများ၊ကရင်၊ရှမ်း၊ချင်း၊မွန်၊ရခိုင်စသည့်တိုင်းရင်းသားများ၊၈၈မျိုးဆက်ကျောင်းသားများစသူတို့ပါဝင်တက်ရောက်ခဲ့ကြပြီးဆုတောင်းပွဲဖြစ်မြောက်ရန် ကရုဏာရှင်အမျိုးသမီးများအဖွဲ့မှစီစဉ်ခဲ့ခြင်းဖြစ်သည်။
“ဒီနေ့ကတော့ဒုတိယမြောက်လုပ်ဖြစ်တဲ့ဆုတောင်းပွဲပါ။ပထမအကြိမ်ကိုမတ်လဆန်းမှာလုပ်ခဲ့ပါတယ်။ ဒီနေ့ကကချင်ပြည်နယ်တွင်းမှာလက်ရှိဖြစ်နေတဲ့အခြေအနေတွေကြောင့်ခံစားနေရတဲ့ဒေသခံတွေအတွက်၊နောက်ပြီးမြစ်ဆုံအတွက်၊လာမယ့်ရွေးကောက်ပွဲအတွက်ဆုတောင်းချင်ပါတယ်”ဟုကရုဏာရှင်အမျိုးသမီးများအဖွဲ့မှတာဝန်ရှိသူတစ်ဦးကပြောပြသည်။
အဖွင့်မိန့်ခွန်းကိုယုဒဿန်နှစ်ခြင်းအသင်းတော်မှဒေါက်တာအာသာကိုလေးကပြောကြားခဲ့ပြီးကြိုဆိုနှုတ်ဆက်စကားကိုကရုဏာရှင်အမျိုးသမီးများအဖွဲ့မှဒေါ်နန်ပူကပြောကြားခဲ့ပါသည်။
ထို့နောက်ကချင်ပြည်နယ်ဒေသခံဒေါ်နန်ရော်ကအမျိုးသမီးနှင့်ငြိမ်းချမ်းရေးခေါင်းစဉ်ဖြင့်စစ်ကြောင့်အမျိုးသမီးများသက်ရောက်ခံစားရခြင်း၊ငြိမ်းချမ်းရေးလုပ်ငန်းများဆောင်ရွက်ရာတွင်မေ့မထားသင့်သောအမျိုးသမီးများ၏အခန်းကဏ္ဍစသည်တို့ကိုဆွေးနွေးပြောကြားခဲ့သည်။
၈၈မျိုးဆက်ကျောင်းသားခေါင်းဆောင်တစ်ဦးဖြစ်သူကိုမင်းကိုနိုင်ကငြိမ်းချမ်းရေးနှင့်ပွင့်လင်းလူ့အဖွဲ့အစည်းခေါင်းစဉ်ဖြင့်ပြောကြားခဲ့ရာတွင်ငြိမ်းချမ်းရေးအတွက်ကချင်ပြည်နယ်သို့ရောက်ရှိခဲ့ကြောင်း၊ပြည်တွင်းစစ်သည်မိမိတို့မမွေးဖွားမီကပင်ရှိနေခဲ့ကြောင်း၊နှစ်၅၀ခန့်ဆွေးနွေးသော်လည်းမအောင်မြင်ဘဲစတေးခံရသည်မှာအမျိုးသမီးများ၊ကလေးငယ်များ၊ဒေသခံများဖြစ်ကာခေါင်းဆောင်များအနေဖြင့်ရလဒ်ကောင်းပေါ်ထွက်အောင်ဆွေးနွေးနိုင်ခြင်းမရှိပါကပြည်သူသာခံစားရကြောင်း၊မြစ်ဆုံအရေးဖြစ်ပေါ်စဉ်က ပြည်သူလူထုကယုံကြည်ကြသူများနှင့်နယ်ပယ်အသီးသီးကပါဝင်ခဲ့မှုကြောင့်အောင်မြင်ခဲ့ကာငြိမ်းချမ်းရေးဖော်ဆောင်မှုတွင်လည်းအဆိုပါနည်းဖြင့်ကြိုးစားသင့်ကြောင်း၊၀တ်ပြုဆုတောင်းမှုကဲ့သို့ငြိမ်းချမ်းသောလှုပ်ရှားမှုများရှိသင့်ကြောင်း၊ကျောင်းဝင်းထဲမှဒေါင်းအလံကိုင်လျက်ထွက်သွားပြီးနောက်ပထမဆုံးအကြိမ်ပြန်လည်ရောက်ရှိလာခြင်းဖြစ်ကာပွင့်လင်းသောလူ့အဖွဲ့အစည်းအတွက်ပေးဆပ်ခဲ့ရသူများများပြားခဲ့ကြောင်းစသည်ဖြင့်ပြောကြားခဲ့ပါသည်။
ထို့နောက်ကချင်ပြည်နယ်ဒေသခံဒေါ်ခွန်ဂျာကလက်ရှိအချိန်အထိကချင်ပြည်နယ်တွင်းဒေသခံများနေရပ်မှစွန့်ခွာတိမ်းရှောင်နေရမှုများ၊မငြိမ်းချမ်းသေးသောအခြေအနေများကိုတင်ဆက်ရှင်းပြခဲ့သည်။
နောက်ဆုံးအစီအစဉ်အဖြစ်ဆုတောင်းရာတွင်အစိုးရ၊စီးပွားရေး၊ပညာရေး၊ဘာသာရေး၊မိသားစု၊အနုပညာ၊အားကစားနှင့်ဖျော်ဖြေရေး၊လူထုဆက်သွယ်ရေးစသောနယ်ပယ်အသီးသီးအတွက်တက်ရောက်လာသူများကဖယောင်းတိုင်မီးထွန်းညှိဆုတောင်းခဲ့ကြကာအခမ်းအနားကို၈၈မျိုးဆက်ကျောင်းသားများ၏ ‘မြန်မာပြည်ကို ချစ်ပါ’ သီချင်းဖြင့် ပိတ်သိမ်းခဲ့ပါသည်။
No comments:
Post a Comment