ဘင်လာဒင်ရဲ့ သားဖြစ်သူ အိုမာ အိုစမာ ဘင်လာဒင်နဲ့ ညီအစ်ကိုတွေက သူတို့အဖေ ဘင်လာဒင်ကို အမေရိကန် စီးနင်း သတ်ဖြတ်တာနဲ့ ပတ်သက်လို့ “ရှိတ်ခ် အိုစမာ ဘင်လာဒင် မိသားစု ကြေညာချက်”
ဆိုပြီး ကြေညာချက်တစောင် မေလ ၁၀ ရက် ရက်စွဲနဲ့ ထုတ်ပြန်ခဲ့ပါတယ်။
ကြေညာချက် စစချင်းမှာပဲ သူတို့ အဖေသေတယ်လို့ ရုပ်အလောင်း၊ ဓာတ်ပုံ၊ ဗီဒီယို
အထောက်အထားတွေ မတွေ့ရတာမို့ မယုံခဲ့ဘူးလို့ အစချီထားပါတယ်။မီဒီယာတိုင်းရဲ့
သတင်းဖော်ပြချက်အရ အမေရိကန် ကွန်မန်ဒို အထူးတပ်တွေ ဝင်ရောက်စီးနင်းပြီး
ထိပ်တိုက်တွေ့ချိန်မှာ အိုစမာ ဘင်လာဒင်ဟာ လက်နက်ကိုင်ဆောင်ထားခြင်း
မရှိဘူးလို့ ဆိုတာမို့ ဘာကြောင့် အရှင်ဖမ်းပြီး ဥပဒေအရ
ရုံးတင်စစ်ဆေးတာမျိုး၊ ကမ္ဘာကသိအောင် အမှန်တရားကို ဖော်ထုတ်တာမျိုး
မလုပ်ခဲ့ပါသလဲလို့ မေးခွန်းထုတ်ထားပါသေးတယ်။ သတ်ဖြတ်ပြလိုက်တာဟာ နိုင်ငံရေး
ပြဿနာတွေအတွက် အဖြေမဟုတ်ဘူး၊ ပြစ်မှုကို ပြစ်မှုအတိုင်း စီရင်သင့်ပါတယ်လို့
ဖော်ပြထားပါတယ်။မျက်မြင်သက်သေမရှိ၊ ပင်လယ်ထဲ ရေချ သင်္ဂြိုဟ်ခြင်းကိုလည်း ဘာသာရေးအရ အခွင့်အရေး ချိုးဖောက်ခံရတာလို့ ဆိုပါတယ်။ ကြေညာချက် အဆုံးမှာတော့ ဒီကိစ္စတွေကို ကြေညာချက်ထုတ်အပြီး ရက် ၃၀ အတွင်း ဖြေရှင်းခြင်းမပြုရင် ဗြိတိန်နဲ့ နိုင်ငံတကာက ရှေ့နေ အကျော်အမော်တွေနဲ့ တိုင်ပင်ပြီး နိုင်ငံတကာ ဥပဒေလမ်းကြောင်းနဲ့ ဘင်လာဒင်မိသားစုက လုပ်ဆောင်မယ်လို့ ရေးသားထား ပါတယ်။
ဘင်လာဒင်နဲ့ ပတ်သက်လို့ နောက်ထပ် လူဖတ်များနေတဲ့ သတင်းကတော့ ဘင်လာဒင်ရဲ့ ပါကစ္စတန်က အိမ်ထဲမှာ သဘာဝ လိင်အားတိုးဆေး ဗိုင်ရာဂရာအဖြစ် သုံးနေကြတဲ့၊ ပရဆေးပင်က ထုတ်လုပ်တဲ့ Avena syrup တွေ့ရှိမှုပါ။ အယ်လ်ကေးဒါး ခေါင်းဆောင်ရဲ့ လိင်မှုဘဝကလည်း မေးမြန်းစရာ ဖြစ်နေပါတယ်။
နောက် သတင်းတခုကတော့ ပါကစ္စတန်မှာ ဘင်လာဒင်ရဲ့အိမ်ကို ဝင်ရောက်စီးနင်းတာနဲ့ ပတ်သက်လို့ အမေရိကန် အစိုးရက အထောက်အထားတွေ ထုတ်ဖော်မပြဘဲ နှုတ်ဆိတ်နေပေမယ့် မီဒီယာတွေနဲ့ နိုင်ငံရေးသမားတွေကတော့ “သိနိုင်၊ မြင်နိုင်ခွင့် ရှိရေး” ဆိုတာနဲ့ ကိုင်ပေါက်ပြီး ဆက်လက် တောင်းဆိုနေကြပါတယ်။ တဖက်မှာလည်း ဒီ ဘင်လာဒင် လုပ်ကြံရေး အော်ပရေးရှင်းမှာ ပါဝင်ပတ်သက်ခဲ့သူတွေနဲ့ သူတို့ရဲ့ မိသားစုဝင်တွေအတွက် အန္တရာယ်ကလည်း ရှိနေပါတယ်။
အိုစမာ ဘင်လာဒင်ရဲ့ အလောင်းဓာတ်ပုံတွေကို သီသန့်ရွေးချယ်ထားတဲ့ ဥပဒေပြုလွှတ်တော် အမတ်တချို့ကို အမေရိကန် အစိုးရက ပြသခဲ့ပါတယ်။ ပါကစ္စတန်နိုင်ငံ အဘော့တာဘက်မြို့ ဘင်လာဒင်ခိုအောင်းရာ အိမ်မှာ အမေရိကန် ကွန်မန်ဒိုတွေ ဝင်စီးပြီးနောက် ရိုက်ခဲ့တဲ့ ဘင်လာဒင်ရဲ့ ရုပ်အလောင်းဓာတ်ပုံ ၁၅ ပုံလောက်ကို ကြည့်ရှုခဲ့ရကြောင်း ရီပတ်ဘလီကန် အမတ် ဂျမ်းစ် အင်ဟော့ဖ်က CNN သတင်းဌာနကို ပြောထားပါတယ်။
ဓာတ်ပုံတွေက ကြည့်ရတာ အော်ဂလီဆန်စရာ၊ ဦးနှောက်ကထွက်၊ မျက်လုံး ဟောက်ပက်နဲ့ ကျည်ဆန် ဝင်သွားတာလား၊ ထွက်သွားတာလား မသိ၊ ဒဏ်ရာ က နားရွက်နားလောက်မှာ တွေ့တယ်လို့ အဲဒီအမတ်က ပြောပါတယ်။ သူမှသူ အစစ်ပါပဲ၊ ကိစ္စပြတ်သွားပါပြီလို့ အင်ဟော့ဖ်က အတည်ပြုပါတယ်။
No comments:
Post a Comment