လားရှိုးမြို့ ရပ်ကွက်(၁) နယ်မြေ(၇) တွင် ဖြစ်ပွားနေသော ရေကြီးရေလျှံမှုအား ဇူလိုင် ၂၇ ရက်နေ့က မြင်တွေ့ရစဉ်
မိုးဆက်တိုက် ရွာသွန်းမှုကြောင့် လားရှိုးမြို့အ၀င် နားမခေါ်ကျေးရွာ၊ စက်သုံးဆီ အရောင်းဆိုင်များအနီး ပြည်ထောင်စုလမ်းမကြီးပေါ်တွင် ဇူလိုင်လ ၂၆ ရက်နေ့ နံနက်မှစတင်ကာ လမ်းရေကျော်မှုကြောင့် မန္တလေး၊ ရန်ကုန် ခရီးသည်တင်ကားများ လားရှိုးမြို့ဝင် နောက်ကျခဲ့ပြီး၊ လားရှိုးမှ ထွက်ခွာမည့် ခရီးသည်တင်ယာဉ်များလည်း ထွက်ချိန်နောက်ကျခဲ့ကြောင်း သိရသည်။
"ဒီနေရာကို ရေမကျော်တာ တော်တော်ကြာပါပြီ။ ဒီနှစ်တော့ ဟိုမန်အိုင်၊ ကုန်းညောင်၊ နမ့်ကျန်ရွာတွေဖက်ကနေ မိုးတွေအရမ်းရွာတော့ အဲဒီဖက်က တောင်ကျရေတွေက ဒီဘက်ကို အဓိက စီးဝင်တော့ ဒီလမ်းပေါ်ကို ရေတွေလျှံကုန်တာပေါ့"ဟု ဒေသခံတစ်ဦးက ပြောပါသည်။
အဆိုပါရေများသည် နမ့်ခိုက်၊ နားမခေါ်ရွာများမှ လားရှိုးမြို့ရပ်ကွက်(၁)၊ ရပ်ကွက်(၁၀)၊ ရပ်ကွက်(၁၁)၊ ရပ်ကွက်(၉)များသို့ ရေမြောင်းများမှ တဆင့် စီးဝင်ပြီး မြေနိမ့်ပိုင်းကျသော နေအိမ်များအတွင်းသို့ ရေ၀င်ရောက်မှုများကြောင့် လူနေအိမ်အချို့မှ ဒေသခံများ ဘေးကင်းရာသို့ ရွေ့ပြောင်းခဲ့ရကာ ရပ်ကွက်နှင့် စေတနာရှင်များမှ ထမင်းထုပ်များ ပေးဝေလှူဒါန်းခဲ့ကြကြောင်း သိရသည်။
"တောင်ကျရေကြောင့် ဒီချောင်းမှာ ရေကြီးရင် ရပ်ကွက်(၁)နယ်မြေ(၇)ကတော့ အဆိုးဆုံးပဲ။ မြေနိမ့်ပိုင်းလည်ဖြစ်နေတယ်၊ ရေမြောင်းနဲ့လည်း နီးတော့ ဒီနားကအိမ်တွေထဲကို ရေတွေအရင်ဝင်တာပေါ့။ တချို့အိမ်တွေဆို အုတ်တံတိုင်းတွေ ပြိုတယ်။ လမ်းထိပ်က တံတားလည်း ရေမြုပ်တော့ သွားရလာရတာကအစ အခက်အခဲတွေ ဖြစ်ကုန်တယ်" ဟု ရပ်ကွက်(၁)မှ ဒေသခံတစ်ဦးက ပြောပါသည်။
အလားတူရပ်ကွက်(၉)၊ နယ်မြေ(၃)တွင်လည်း နေအိမ်များအတွင်းသို့ ရေ၀င်ရောက်မှုကြောင့် နေအိမ်(၅၀) မှ ဒေသခံလူဦးရေ (၂၅၀)ခန့်ကို သက်ဆိုင်ရာ ရပ်ကွက် အုပ်ချူပ်ရေးမှူးရုံးမှ တာဝန်ရှိသူများနှင့် စေတနာရှင်များက ထမင်းထုပ်များ ပေးဝေခြင်း၊ ဘေးကင်းရာသို့ ရွေ့ပြောင်းပေးခြင်းများ ဆောင်ရွက်ပေးခဲ့ရကြောင်း သိရသည်။
လားရှိုးမြို့အ၀င် ပြည်ထောင်စုလမ်းရေကျော် နေသည်ကို ဇူလိုင် ၂၇ ရက်နေ့က မြင်တွေ့ရစဉ်
ဇူလိုင်လ(၂၇)ရက်နေ့ နံနက်ပိုင်းတွင်လည်း လားရှိုးမှ မူဆယ်သို့အထွက် အေတီတံတားအနီး နမ့်ယောင်ချောင်းမှ ရေများ မြင့်တက်လာမှုကြောင့် လားရှိုး၊ မူဆယ် ပြည်ထောင်စုလမ်းမကြီးပေါ်သို့ ရေများ တက်လာရာ ယာဉ်ငယ်များအား လူအားဖြင့် တွန်း၍ ဖြတ်သန်းနေရပြီး၊ မော်တော်ဆိုင်ကယ်များကိုလည်း ထမ်းကာ ဖြတ်သန်းနေရကြောင်း သိရသည်။
"ကုန်တင်ကားကြီးတွေတော့ ဖြတ်လို့ရပါတယ် ကားလေးတွေကတော့ ရေစီးအရှိန်ထဲပါမသွားအောင် လူတွေ တွန်းပေးရတယ်။ ဒီထက် ရေပိုတက်လာမယ်ဆိုရင်တော့ ကုန်ကားတွေလည်း ဖြတ်ဖို့မလွယ်ဘူး။ အရင်တစ်ခေါက်ကဆိုရင် ကုန်ကားတစ်စီးရေစီးအရှိန်နဲ့ လမ်းဘေးဘက်ကျသွားတယ်"ဟု ယာဉ်မောင်း တစ်ဦးက ပြောပါသည်။
ဇူလိုင်လ(၉)ရက် (၁၀)ရက်နေ့များတွင် ပထမအကြိမ်လမ်း ရေကျော်မှုဖြစ်ပွားခဲ့ပြီး ယခုအကြိမ်သည် ဇူလိုင်လအတွင်း ဒုတိယအကြိမ် လမ်းရေကျော်မှုဖြစ်ကြောင်း သိရသည်။
Eleven Media Group
No comments:
Post a Comment