ရန်တွေရှင်းအောင် ချစ်သူ ရွေးမှာပါ

စိုးပြည့်သဇင်

ဘ၀မှာ လှေကားထစ် များစွာ ရှိသလို အချိုးအကွေ့ များစွာလည်း ရှိပါတယ်။ ဘ၀ တိုးတက်ရေး အတွက် လှေကားတွေကို တက်ရတာ လွယ်ကူမှု ရှိနိုင်သလို ခက်ခဲမှုတွေလည်း ရှိမှာပါ။

လှေကားတွေပေါ် တစ်ထစ်ချင်း တက်နိုင်ပြီးရင်တော့ ပြန်ပြုတ် မကျအောင် ဟန်ချက်ညီစွာ ခန္ဓာကိုယ်ကို ထိန်းနိုင်မှ ရမှာဖြစ်ပါတယ်။ ဟန်ချက် ညီညီနဲ့ ကြိုးစားပြီး တက်သွားတဲ့ လှေကားတွေမှာလည်း အချိုးအကွေ့တွေ ရှိမှာပါ။ အချိုးအကွေ့၊ အနိမ့်၊ အမြင့်တွေမှာ အားမလျှော့ဘဲ ဆက်လျှောက်နိုင်မှ အမြင့်ဆုံး ဆိုတဲ့ နေရာကို ရောက်ရှိမှာ ကျိန်းသေပါတယ်။

အနုပညာ သရုပ်ဆောင်ကို ၀ါသနာ ပါတာရယ်၊ အစ်မတွေဖြစ်တဲ့ စိုးမြတ်သူဇာ၊ စိုးမြတ်နန္ဒာတို့ရဲ့လက်တွဲ ခေါ်ယူမှုတွေနဲ့ အနုပညာ လောကထဲ ရောက်လာတဲ့ စိုးပြည့်သဇင်က အခုဆိုရင် အကယ်ဒမီ ဆိုတဲ့ စာလုံးလေးကို ပိုင်ဆိုင် ရပါပြီ။ အကယ်ဒမီ စိုးပြည့်သဇင် ဆိုပြီး ဖြစ်လာတဲ့ နောက်ပိုင်း ရုပ်ရှင်၊ ဗီဒီယို ရိုက်ကူးမှုတွေကို ပိုပြီး ဂရုစိုက် လာပါတယ်။

ဇာတ်ကားရိုက်တွေ ဆက်နေတဲ့ စိုးပြည့်သဇင်ကို ရွှေအမြုတေမဂ္ဂဇင်းအတွက် ဓာတ်ပုံ ရိုက်ကူးဖို့ စီစဉ်ဖြစ်တာပါ။ စိုးပြည့်သဇင်က ဇာတ်ကားတစ်ကား ကြည့်ရင်ပဲ ဖြစ်ဖြစ် ငိုတဲ့ ဇာတ်ဝင်ခန်း ပါပြီဆိုရင် လိုက်ငို တတ်တာကြောင့် ခံစားလွယ်တဲ့ သူလို့ ပြောနိုင်ပါတယ်။ ဒရာမာ ဇာတ်ကား တော်တော်များများမှာ ပါဝင် သရုပ်ဆောင်မှုကို မှတ်တမ်း တင်နိုင်တဲ့ စိုးပြည့်သဇင်က မေးမြန်းသမျှကို ပေါ့ပါး သွက်လက် ပွင့်လင်းစွာ ဖြေဆို ပြောပြခဲ့ပါတယ်။သရုပ်ဆောင် အလုပ်ထက် ဂီတကို ပိုဝါသနာ ပါတဲ့ စိုးပြည့်သဇင်က တစ်ကိုယ်တော် စီးရီးကို ၂၀၁၁ မေလ မှာထွက်ဖို့ စီစဉ် ထားတာပါ။ တစ်ကိုယ်တော် တေးစီးရီးလည်း လုပ်၊ ရုပ်ရှင်၊ ဗီဒီယို တွေလည်း ရိုက်ဖြစ်နေတဲ့ စိုးပြည့်သဇင်ကို မေးမြန်း ဖြစ်တာတွေက...

ရယ်စရာ ဇာတ်ကား တစ်ကားမှာ ဘယ်လို စကားလုံးက ပရိသတ် ရယ်ရတယ်။ ဘယ် Plot က ပရိသတ် ကြိုက်တယ်ဆိုပြီး စိုးပြည့် သိလာတယ်လို့ ပြောတော့ ဘယ်လို အတွေ့အကြုံ လေ့လာမှုတွေကြောင့် သိလာ တာလဲ။

အတွေ့အကြုံ နည်းနည်း ရှိလာတော့ အရင်ကထက် စာရင် သိလာတာပေါ့ နော်။ ဒါပေမဲ့ သမီးတို့ အတွက်က အများကြီး ကြိုးစားဖို့ လိုသေးတယ်။ အနုပညာဝမ်းစာဆိုတာ အမြဲတမ်း ဖြည့်နေရတယ်လေ။ သမီးတို့ အများကြီး လေ့လာ ရမယ်။ အထူးသဖြင့် ဟာသ ကားတွေ ဆိုရင်လည်း လေ့လာရမှာပဲ။ လုပ်လိုက်တဲ့ အိုက်တင်တွေက မျက်နှာမှာ ပေါ်တယ်။ လုပ်လိုက်တဲ့ အိုက်တင်က မျက်နှာမှာ မပေါ်တဲ့ဟာတွေ ရှိတယ်။ အဲဒါကြောင့် အမြဲတမ်း ကြိုးစား ရမှာပါ။

လုပ်လိုက်တဲ့ အိုက်တင်၊ မျက်နှာနဲ့ မျက်လုံးပေါ်မှာ ထင်းခနဲ ပေါ်နေဖို့ ဘာတွေ လိုအပ်မလဲ။

သမီး ထင်တာကတော့ စိတ်ကို Relax ထားရမယ် ထင်တယ်။ ဟာသ လုပ်ရင်လည်း စိတ်ကိုချုပ်တည်း ထားရင် လိုသလို မရတော့ဘူး ထင်တယ်။ စိတ်ကို ပျော့ပျော့လေး ထားမှ ဖြစ်မယ်။
Concentrate ရှိဖို့လည်း လိုအပ်တယ်။ နောက်ပြီး တစ်ယောက်နဲ့ တစ်ယောက် အချိတ်အဆက် မိဖို့လည်း လိုတယ်လေ။

အခု နောက်ပိုင်းမှာ သရုပ်ဆောင် အနုပညာနဲ့ အတတ်ပညာကို ဘယ်လို ခွဲခြား နားလည်ထားလဲ။

အနုပညာကို မြတ်နိုးလို့ လုပ်တယ်။ အနုပညာကို မြတ်နိုးတော့ သရုပ်ဆောင်တာ ၀ါသနာ ပါတယ်။ သရုပ်ဆောင် ၀ါသနာ ပါတော့ အတတ်ပညာတွေ ရလာမယ်လို့ ထင်တယ်။ ၀ါသနာပါလို့ သရုပ်ဆောင် ဖြစ်တယ်။ သရုပ်ဆောင်ရင်း သရုပ်ဆောင်ရင်းနဲ့ အတွေ့အကြုံတွေ တိုးလာမယ်။ တဖြည်းဖြည်းနဲ့ ပညာတွေ ရလာမယ်လို့ ထင်တယ်။
အနုပညာ ဆိုတာ သင်တိုင်းတတ်တဲ့ အရာ မဟုတ်ဘူး။ အဓိကက Talents ပါပဲ။

ကျောင်းသားအားလုံး စာတော် ရမယ်လို့လည်း မဟုတ်ပါဘူး။ တော်တဲ့ သူလည်း ရှိသလို အသင့်တင့်လည်း ရှိတယ်။
ဥပမာ ကျောင်းသား တစ်ယောက်က အရမ်း ဥာဏ်ကောင်းတယ် ဆိုပေမယ့် စာတစ်လုံးမှ မကျက်ရင် စာမေးပွဲ အောင်မှာ မဟုတ်ဘူး။ ဒီမှာ အနုပညာ ၀ါသနာပါတဲ့ သူတွေ အများကြီးပဲ။ Talents ရှိတိုင်းလည်း ကြိုးစားဦးမှ။
တချို့က အရမ်း ကြိုးစားပေမယ့် ကံဆိုတာလည်း ရှိသေးတယ်လေ။ အနုပညာမှာ အများကြီး ရှိပါတယ်။ အကုန်လုံး ပေါင်းစပ်ပြီးမှ အနုပညာသည် တစ်ယောက်အဖြစ် ရပ်တည်ရတာ။
အနုပညာကို လွယ်တယ်လို့ ပြောရင် အဲဒါကို သမီးက မှားတယ်လို့ ပြောရမှာပဲ။ ဘာဖြစ်လို့လဲဆိုတော့ ဒီစကားလုံးတစ်ခုကိုပဲ ပြောကြည့်၊ ဒီစကားရယ်၊ အိုက်တင်ရယ် အဲဒီ အပေါ်မှာမှ ကွန့်သွားတဲ့ အိုက်တင်တွေရယ် အဲဒါတွေက မလွယ်ဘူး။ ရယ်တာတောင်မှ ရယ်နည်း အမျိုးမျိုး ရှိတယ်။
အဲဒီလို ဆိုတော့ အိုက်တင်ကို စလုပ်ကတည်းက လွယ်တယ်လို့ မထင်ဘူး။ ခက်တယ်ဆိုတာ သိတဲ့အတွက် ကြိုးစားချင်တယ်။

စိုးညီအစ်မတွေထဲမှာ စိုးပြည့်သဇင်လည်း အကယ်ဒမီဆိုတဲ့ ထူးချွန်မှုတစ်ခုကို နှစ်တိုတိုလေးမှာ ရယူနိုင်တဲ့အပေါ် ဘာများ ပြောချင်လဲ။

သမီး နေရာလေး တစ်ခု ရလာတာပါ။ ပရိသတ် အနေနဲ့ စိုးပြည့်သဇင်ရယ်လို့ နေရာလေး ပေးလာတဲ့ အတွက် ကျေးဇူးတင်တယ်။
အခုလို ဖြစ်လာရအောင် လုပ်ပေးခဲ့တဲ့ အစ်မတွေ၊ မိဘတွေ၊ သင်ဆရာ၊ မြင်ဆရာ၊ ကြားဆရာတွေရဲ့ ကျေးဇူးကြောင့်လို့ ပြောရမှာပါပဲ။

စိုးပြည့်သဇင်က အကယ်ဒမီ မင်းသမီးတစ်လက် ဖြစ်သွားပြီ ဆိုတော့ ဘယ်လို ပုံစံပဲဖြစ်ဖြစ် သရုပ်ဆောင်နိုင်သွားပြီလား၊ လွယ်ကူသွားပြီလား။

စသရုပ်ဆောင်ခါစကတော့ ပိုပင်ပန်းတယ်။ ဘာဖြစ်လို့လဲ ဆိုတော့ ကားမောင်း တတ်ခါစလိုပဲ။ ကားမောင်း တတ်ခါစမှာ ဘယ်ကွေ့ ရမှာလား၊ ညာကွေ့ ရမှာလား၊ လီဗာကို ဘယ်လို နင်းရမှာလဲ အဲဒီလိုမျိုးလေးတွေ ရှိတယ်။ တကယ် မောင်းတတ်သွားတဲ့ အချိန်မှာ သေချာ ထိန်းချုပ်ပြီး လုပ်နေစရာ မလိုတော့ဘူး။ သူ့ဟာနဲ့သူ ပါသွားတယ်။ ဇာတ်လမ်းထဲမှာ စိတ်နှစ်လိုက်ရင် အိုက်တင်က သူ့ဟာနဲ့သူ ပါသွားတယ်။ အဲဒီလိုမျိုး ဖြစ်လို့ စိတ်ကို လျှော့လိုက်လို့လည်း မရဘူး။
ဘယ်အနုပညာကိုပဲ လုပ်လုပ် တကယ် စိတ်ခံစားပြီး လုပ်မှ အကောင်းဆုံး ဆိုတော့ ဘယ်ကားပဲဖြစ်ဖြစ် သေသေချာချာ လုပ်တယ်။ ဒရာမာ ဆိုရင် ပိုဆိုးတာပေါ့။ ပိုပြီး စိတ်နှစ်ရတယ်။ အရင်က လောက်တော့ မပင်ပန်းတော့ ပေမယ့်လည်း လုပ်ရတာပါပဲ။ ညကျရင် မောသွားတာပါပဲ။

ဇာတ်ကားပဲ ရိုက်ရိုက်၊ ဘာပဲလုပ်လုပ် အခု နောက်ပိုင်းမှာ ကိုယ့်ပရိသတ် အတွက် ဆိုပြီး လုပ်လား ဒါမှမဟုတ် ကိုယ့် အနုပညာ အတွက်ဆိုပြီး လုပ်ဖြစ်လား။

နှစ်ခုစလုံးပါပဲ။ ကိုယ့်ရဲ့အနုပညာ အတွက် ဆိုတာကလည်း ကားကောင်းလေး တွေရဖို့ ဇာတ်လမ်းလေးတွေက အစ သတိထား ရွေးတယ်။ အဲဒီလို ကားကောင်း ရွေးတာကလည်း ပရိသတ် အတွက်ပါ။ ပရိသတ်တွေ ကလည်း ကားကောင်းလေးတွေ ကြည့်ရရင် ကြည့်ရကျိုး နပ်တယ်လို့ ထင်တယ်။

အနုပညာရှင်တိုင်းက ကိုယ့်အနုပညာ အတ္တအတွက် ပိုပြီး ဦးစားပေးသင့်လား။

လူဆိုတာ အတ္တ ရှိကြပါတယ်။ ဒါပေမဲ့လည်း ကိုယ့် အတွက်ချည်းပဲ အတ္တကြီးလို့ မရဘူး။ သမီးတို့သရုပ်ဆောင်တွေအနေနဲ့ ၉၉ ရာခိုင်နှုန်းက အနုပညာ လုပ်ပြီဆို ပရိသတ်ကို ဦးစားပေးရတာပါပဲ။
တချို့ဇာတ်ကားတွေဆို ပရိသတ် မကြိုက်တာ ရှိတယ်။ ဇာတ်လမ်းက ဆန်းသစ်တယ်။ တစ်ခါမှလည်း မရိုက်ဖူးဘူး။ ဒါပေမဲ့ ပရိသတ် သိပ်နားမလည်ဘူး ဆိုတဲ့ ဇာတ်ကားတွေကို ပရိသတ်တွေ သိပ်မကြိုက်ဘူး။ နယ်ပရိသတ်တွေ ကြိုက်တဲ့ ပုံစံသတ်သတ် ရှိတယ်လေ။
ပြောရရင် ကိုယ့်အနုပညာ အတွက် အတ္တ ကြီးချင်ပေမယ့် ၉၉ ရာခိုင်နှုန်းကတော့ ပရိသတ်ကို ဦးစားပေး ဖြစ်ပါတယ်။

အနုပညာရှင်တိုင်းက ကောလာဟလ ဆိုတာနဲ့ ကြုံတွေ့ရပြီး အပြစ် ပြောကြ တာတွေ များတယ်။ စိုးပြည့်သဇင် အနေနဲ့ အဲဒီလိုတွေ မကြုံ တွေ့ရအောင် ဘယ်လိုလုပ်လဲ။

အနုပညာသမားတိုင်းမှာ ကောလာဟလ ဆိုတာ ရှိကြတာပေါ့နော်။ ဒါတွေက လည်း လူစိတ်ဝင်စားတာ ခံရပြီဆိုရင် ကောလာဟလ ဂယက်ကလေးတွေကတော့ ရှိတယ်။
မဟုတ်ဘဲနဲ့ ဟိုသတင်း၊ ဒီသတင်းတွေ ထွက်တော့ ပရိသတ်တွေက စိုးရိမ်ကြရတယ်။ စိုးရိမ်တယ် ဆိုတာကလည်း သူတို့ချစ်တဲ့ အနုပညာရှင်တွေကို အစစ အရာရာ မထိခိုက် စေချင်တာလေ။
ကိုယ်တွေဘက်က ကောလာဟလ ဒဏ်ကို အနည်းနဲ့ အများ ခံရတယ် ဆိုပေမယ့် အကောင်းဆုံး ဖြစ်အောင် နေရတယ်။ ကောလာဟလ ထွက်ရင်လည်း သမီးက ခေါင်းထဲ မထည့်ဘူး။ ဘာဖြစ်လို့လဲ ဆိုတော့ ကောလာဟလက ထွက်နေကျပဲလေ။
ဒီလို သတင်းတွေ ထွက်လာရင်လည်း ခံနိုင်ရည် ရှိတယ်လို့ ကိုယ့်ကိုယ်ကိုယ် ဆုံးဖြတ်ပြီးမှ ဒီလောကထဲကို သမီး ၀င်လာတာ ဆိုတော့ အတတ်နိုင်ဆုံးတော့ သမီးဘက်က မရှိအောင်တော့ နေတယ်။ ဒါပေမဲ့ လုပ်ကြံပြီး ပြောလာရင်လည်း သမီး မမှုပါဘူး။ ပြောသမျှသာ လိုက်ပြီး ခံစားနေရင် ဘာအလုပ်မှလည်း ဆက်လုပ် ဖြစ်မှာ မဟုတ်ဘူးလေ။ ကိုယ် မဟုတ်ရင် ခေါင်းထဲမှာ မရှိအောင် နေတယ်။

မိန်းကလေး တစ်ယောက်ရဲ့ နေထိုင်မှု ပုံစံက သရုပ်ဆောင် အနုပညာရှင် တစ်ယောက် ဖြစ်တဲ့ အတွက် တခြား သူတွေထက် ပိုပြီး ထိန်းသိမ်းရသလား။

မိန်းကလေး တစ်ယောက်ဖြစ်တဲ့ အတွက် ထိန်းသိမ်းရတယ်။ အဓိက ကတော့ အနုပညာရှင် တစ်ယောက်ထက် မိန်းကလေး တစ်ယောက်ရဲ့ တန်ဖိုးကို ပိုထိန်းသိမ်းပါတယ်။ သမီးကတော့ သမီး ကိုယ့်ကိုယ်ကိုယ် ၁၀၀ ရာခိုင်နှုန်း ထိန်းပါတယ်။

ချစ်သူရွေးမယ်လို့ ပေးထားတဲ့ စီးရီး နာမည်ကို ဘာကြောင့်ပေးပြီး ဘယ်သူ ရေးထားတာလဲ။

ချစ်သူရွေးမယ် သီချင်းက ပြောရရင် သမီး သီချင်း မဟုတ်ဘူး။ ကိုဇ၀ါ ဘာသာ ရေးထားတဲ့ သီချင်း၊ ဒီသီချင်းက သမီးနဲ့ လိုက်တယ်ဆိုပြီး ပေးလိုက်တာ။ ခေါင်းစဉ်လေးလည်း လှတယ်ဆိုပြီး စီးရီးခေါင်းစဉ် ရွေးလိုက်တာ။ ဒီသီချင်းက သမီးတို့ အရွယ်နဲ့လည်း လိုက်တယ်။ အဓိပ္ပာယ်က ကောင်လေးတွေက ကောင်မလေးကို ကျောင်းသွားရင်းလည်း ကြည့်၊ အပြင် သွားရင်းလည်း ကြည့်တော့ စိတ်ရှုပ်တယ်။ အဲဒီရန်တွေက ကာကွယ်ဖို့ ချစ်သူ ရွေးတော့မယ် ဆိုတဲ့ အဓိပ္ပာယ်တွေ ဘာတွေပါတယ်။ အချစ်သီချင်း မဟုတ်ဘဲ ကလေးဆန်ဆန်နဲ့ ချစ်စရာ ကောင်းတဲ့ သီချင်းလေးပေါ့။

စီးရီးထဲမှာ ဘယ်လို သီချင်းတွေ ပါသေးလဲ။

အချစ်သီချင်း၊ အလွမ်း သီချင်းတွေလည်း ပါတယ်။ ဘ၀နဲ့ သက်ဆိုင်တာတွေတော့ မပါဘူး။

စိုးပြည့် အနေနဲ့ အနုပညာ အလုပ်တွေကို လောဘ ကြီးနေတာကြောင့် ပညာရေးကို ဦးစားမပေး တော့ဘူးလား။ ဒီနှစ်လည်း ၁၀ တန်း စာမေးပွဲ မဖြေ ဖြစ်ဘူးနော်။

အနုပညာအလုပ်ကို ၁၀ တန်းအောင်ပြီးမှ ၀င်ဖို့ စဉ်းစားထားတာပါ။ ဒါပေမဲ့ လုပ်ရမယ့် ကံပါလာတော့လည်း ဆက်လုပ် ဖြစ်သွားတယ်။ သမီး ၁၀ တန်း စတက်တဲ့ အချိန်မှာ ဒီအလုပ်ကို စလုပ်ဖြစ်တာ။
၁၀ တန်း တစ်နှစ်လုံးလည်း စာမကျက် လိုက်ရဘူး။ ပြောရရင် သမီးက ပေါ့တာပါ။ အေးဆေးပေါ့ ရပါတယ်ဆိုပြီး နေလိုက်တာ။
မှတ်မှတ်ရရ ၁၀ တန်း စာမေးပွဲ ဖြေမယ့် အချိန်မှာ ဖြေသိမ့် မျက်ဖြေဆိုတဲ့ ဇာတ်ကား ရိုက်နေတာ။ စာမေးပွဲ ဖြေဖို့ တစ်ပတ်ပဲ လိုတော့တာနော်။ ဒါရိုက်တာကလည်း ဖြစ်ပါ့မလား မေးတယ်။ ဖြစ်တယ်ပေါ့။ အဲဒီ ကားကလည်း အရမ်း ကောင်းတယ်။ ရိုက်ချင်တယ် ဆိုပြီး ရိုက်တာ။ သွားဖြေတဲ့ အချိန်မှာတော့ ကိုယ့်ကိုယ် ကိုယ်တော့ သိတာပေါ့။ အောင်စာရင်း ထွက်တဲ့ အချိန်မှာ တော်တော် ခံစားရတယ်။ ရှက်တာလေ။ စာမေးပွဲ တစ်ခါမှ မကျခဲ့ဖူးဘူး။ အမြဲတမ်း ၁ ကနေ ၅ အထိ ၀င်ခဲ့တဲ့သူ ဆိုတော့ ကျတဲ့ အချိန်မှာ မေးလိုက်ရင် မျက်ရည်တွေ ကျလာတာ။

ပြန်ဖြေဆိုတဲ့ အချိန်မှာ သမီး တကယ် စာကျက် နိုင်မှာလား၊ သမီး တကယ် ရနိုင်မှာလား၊ တကယ် ကျက်နိုင်မှပဲ ဖြေချင်တယ်။ အခုကလည်း ကားရိုက် ချိတ်ထားတာတွေ ရှိတယ်လေ။ အနုပညာ ဆိုတာကလည်း အရှိန်နဲ့ သွားရတာလေ။ အရမ်း ၀ါသနာ ပါတဲ့ အလုပ်ဆိုတော့ အရှိန်လေး ရှိတုန်း ဆက်ပြီး ကြိုးစားချင်တာ။ သမီး ပြန်ဖြေမှာပါ။ သမီး ပရိသတ်တွေကလည်း ဘယ်တော့ ပြန်ဖြေမှာလဲ မေးတယ်။ ၁၀ တန်းလေး အောင်စေချင်ကြတယ်တဲ့။ သမီး နောက်နှစ်မှာ ပြန်ဖြေမှာပါလို့ စိုးပြည့်သဇင်က ဖြေပေးပါတယ်။

စိုးပြည့်သဇင်ရဲ့ တစ်ကိုယ်တော် စီးရီးအတွက် Lazy Club က တီးခတ် ပေးထားပြီး တေးရေး မြင့်မိုးအောင်၊ ကေအေတီ၊ ဖိုးကာ၊ မင်းချစ်သူ၊ လာဇရု၊ ဇ၀ါနဲ့ ဒိုနီတို့ ရေးပေးထားတဲ့ သီချင်းများ ပါဝင်ပါတယ်။ ရွှေအမြုတေ အတွက် အချိန်ပေး ဓာတ်ပုံ ရိုက်ကူး ပေးသလို အချိန်ပေး ဖြေကြားပေးတဲ့ စိုးပြည့်သဇင်ကို ကျေးဇူး တင်ပါတယ်။ မန္တလေးကနေ အားချင်း ပြန်လာပြီး ဓာတ်ပုံ ရိုက်ကူးပေးတဲ့ ကိုလင်း (Stidio-K) ကိုလည်း ကျေးဇူး အထူးတင် ရှိပါကြောင်း ဆိုပါရစေ။