သံလွင်

တရုတ်နိုင်ငံ ဗုဒ္ဓစွယ်တော်တိုက် ဆရာတော် လယ်ယာသုံး စက်ကိရိယာများ လှူဒါန်း
Wednesday, June 26, 2013

တရုတ်ပြည်သူ့ သမ္မတနိုင်ငံ ပေကျင်းမြို့ လီကွမ်းဗုဒ္ဓ စွယ်တော်တိုက် ဆရာတော် Ven.Shi Chang Zang က လယ်ယာ စိုက်ပျိုးရေးနှင့် ဆည်မြောင်း ဝန်ကြီး ဌာနသို့ ပထမအသုတ် အနေဖြင့်ထွန်စက်ကြီး နှစ်စီး၊ လက်တွန်း ထွန်စက် ၁၅ စီး၊ ရိတ်သိမ်း ခြွေလှေ့စက် တစ်စီး၊ လက်တွန်း ကောက်စိုက်စက် တစ်စီးနှင့် လယ်ယာသုံး သယ်ပို့ယာဉ် သုံးစီးတို့ကို လှူဒါန်းခဲ့ပြီး ဒုတိယအသုတ် အနေဖြင့် လယ်ယာသုံး လေးဘီးထွန်စက်ငယ် အစီး ၃ဝ ကို ပေးအပ် လှူဒါန်းခဲ့သည်။

ဒက္ခိဏ သီရိမြို့နယ် ဟိုတယ်ဇုန် အနီး စက်မှုလယ်ယာ မြေဧက ၃ဝဝဝ စိုက်ကွင်း ရှင်းလင်းဆောင်၌ ယနေ့နံနက်ပိုင်း တွင် တရုတ်နိုင်ငံမှ ဗုဒ္ဓစွယ်တော်တိုက် ဆရာတော် Ven.Shi Chang Zang နှင့် ဆရာတော် ၁၇ ပါးတို့က လယ်ယာသုံး စက်ကိရိယာများ ပေးအပ် လှူဒါန်းခြင်း အခမ်းအနားကို ကျင်းပရာ ပြည်ထောင်စု ဝန်ကြီး ဦးမြင့်လှိုင်က လယ်ယာသုံး စက်ကိရိယာ များနှင့် ပတ်သက်သည့် ဂုဏ်ပြု မှတ်တမ်းလွှာနှင့် သစ်သီးများကို ဗုဒ္ဓ စွယ်တော်တိုက် ဆရာတော်အား ဆက်ကပ် လှူဒါန်းသည်။

ထို့နောက် ဗုဒ္ဓစွယ်တော်တိုက် ဆရာတော်က လှူဒါန်းရခြင်း ရည်ရွယ်ချက် နှင့် မြန်မာနိုင်ငံ လယ်ယာကဏ္ဍ ဖွံ့ဖြိုး တိုးတက်ရေး အတွက် လယ်ယာသုံး စက်ကိရိယာများ ဆက်လက် လှူဒါန်းမည့် အစီအစဉ်ကို မိန့်ကြားသည်။ ယင်းနောက် လေးဘီး ထွန်စက်ငယ် များကို ကြည့်ရှု စစ်ဆေး ကြသည်။

ထို့နောက် ဗုဒ္ဓစွယ်တော်တိုက် ဆရာတော်နှင့် ပြည်ထောင်စု ဝန်ကြီးတို့သည် စက်မှု လယ်ယာမြေ ဧက ၃ဝဝဝ နွေစပါး စိုက်ခင်းနှင့် ထွန်စက်ကြီးများ၊ လက်တွန်း ထွန်စက်များဖြင့် ထွန်ယက် နေမှုများကို ကြည့်ရှု အားပေး ကြသည်။

ယင်းနောက် ချိုင်းကျေးရွာ အနီး လယ်ယာထွက်ကုန် များနှင့် မျိုးစေ့ အရောင်းဆိုင်များ၊ ပျဉ်းမနား မြို့နယ် အနီး အလျင်လို ကျေးရွာရှိ သစ်သီးဝလံ အဆင့်မြင့် ထုပ်ပိုး သန့်စက်ရုံ၌ ပျားလိမ္မော်များ ထုပ်ပိုးနေမှုနှင့် ဘက်စုံသုံး လက်တွန်း ထွန်စက်များ၊ မျိုးစေ့သန့်စင် စက်များ၊ ရိတ်သိမ်းခြွေလှေ့စက် များကို ကြည့်ရှု အားပေးကြသည်။

ဗုဒ္ဓစွယ်တော်တိုက် ဆရာတော်သည် မြန်မာနိုင်ငံ ခရီးစဉ်၌ မန္တလေး၊ နေပြည်တော်၊ ရန်ကုန်မြို့တို့၌ ဗုဒ္ဓစွယ်တော်ပွား သုံးဆူနှင့် ရတနာ ရွှေကျောင်းဆောင် တို့ကို ဘုရား အနေကဇာတင် လှူဒါန်း ရေစက်ချခြင်း၊ မန္တလေးမြို့ရှိ သာသနာ့ တက္ကသိုလ်၌ သာသနိက အဆောက်အအုံများ ဆောက်လုပ် လှူဒါန်းခြင်း၊ ပုဂံမြို့၌ ရှေးဟောင်း စေတီတော်အား မွမ်းမံ ပြင်ဆင်ခြင်းနှင့် ဧရာဝတီတိုင်း ဒေသကြီး အတွင်း၌ သောက်သုံးရေ ရရှိရေး လှူဒါန်းခြင်း တို့ကို ဆောင်ရွက်လျက် ရှိကြောင်း သတင်း ရရှိသည်။