ဂျာမနီ-ရန်ကုန်တိုက်ရိုက်လေကြောင်းအပတ်စဉ်အင်္ဂါနေ့တိုင်းပျံသန်းမည်

ဂျာမနီနိုင်ငံအခြေစိုက်Condor လေကြောင်းလိုင်းကနိုဝင်ဘာလ၁ရက်မှစ၍ဂျာမနီနိုင်ငံဖရန့်ဖတ်မြို့မှရန်ကုန်မြို့သို့အပတ်စဉ်အင်္ဂါနေ့တိုင်းပျံသန်းမည်ဟုသတင်းရရှိသည်။

“ဖရန့်ဖတ်-ရန်ကုန်-ဖူးခက်-ဖရန့်ဖတ်ခရီးစဉ်ကိုအပတ်စဉ်အင်္ဂါနေ့တိုင်း ဘိုရင်း-၇၆၇နဲ့ပျံသန်းမယ်လို့ ITB ကပြောသွားတယ်” 

ဟုဂျာမနီနိုင်ငံဘာလင်မြို့တွင်ကျင်းပနေသောနိုင်ငံတကာခရီးသွားပြပွဲတွင်သွားရောက်ပြသနေသောChartium ဟိုတယ်မှလက်ထောက်အထွေထွေမန်နေဂျာဒေါ်မေမြတ်မွန်ဝင်းကအီးမေးလ်မှတစ်ဆင့်ပြောသည်။

အဆိုပါလေကြောင်းလိုင်းသည်၂၀၁၂ နှစ်ဆန်းပိုင်းမှစ၍မြန်မာနိုင်ငံမှပျံသန်းရန်မြန်မာနိုင်ငံမှEPGခရီးသွားကုမ္ပဏီနှင့်ဆွေးနွေးမှုများရှိခဲ့သည်။

ထို့အပြင်အရှေ့အလယ်ပိုင်းအခြေစိုက်Qatar လေကြောင်းလိုင်းကလည်းမေလမှစ၍နောက်ခြောက်လအတွင်းခရီးစဉ်ငါးခုတိုးချဲ့ရာတွင်မြန်မာနိုင်ငံပါဝင်ကြောင်းလည်းITBဖွင့်ပွဲနေ့တွင်လေကြောင်းလိုင်းအကြီးအကဲကပြောသွားခဲ့သည်ဟုသတင်းရရှိသည်။

Qatar  လေကြောင်းလိုင်းကမေလမှစ၍တိုးချဲ့ပျံသန်းမည့်ခရီးစဉ်ငါးခုတွင်အီရတ်၊တန်ဇန်းနီးယား၊ဆားဘီးယားတို့လည်းပါဝင်သည်ဟုအဆိုပါလေကြောင်းလိုင်း၏ထုတ်ပြန်ချက်ကိုကိုးကား၍Gulf-Time သတင်းစာတွင်ဖော်ပြထားသည်။

Qatar  လေကြောင်းလိုင်းသည်၂၀၀၈ခုနှစ်မှစ၍မြန်မာနိုင်ငံခရီးစဉ်အားဖျက်သိမ်းခဲ့သည်။အဆိုပါလေကြောင်းလိုင်းပျံသန်းစဉ်ကဥရောပမှ မြန်မာနိုင်ငံသို့လာရောက်သောခရီးသွားများအတွက်အဆင်ပြေခဲ့သည်။

ထိုကဲ့သို့လေကြောင်းလိုင်းများတိုးချဲ့လာလျှင်ရန်ကုန်လေဆိပ်ဝန်ဆောင်မှုများအလုပ်ရှုပ်သွားနိုင်ကြောင်းနှင့်ယခုလက်ရှိတွင်လေယာဉ်၃စီးဆင်းသက်ချိန် လေဆိပ်တွင်ပျာယာခတ်နေကြောင်းလေကြောင်းလိုင်းတာဝန်ရှိသူတစ်ဦးကပြောကြားသည်။

          “ လေကြောင်းလိုင်းတွေတိုးလာတာကတော့ခရီးသွားလုပ်ငန်းပိုကောင်းလာမှာပေါ့။ဒါပေမယ့်အခုတောင်နေရာတိုင်းမှာဟိုတယ်၊ကားနဲ့တိုးဂိုက်တွေမလောက်ဖြစ်နေတာ၊ တိုးလာရင်ဘယ်လိုရှင်းမလဲ`” ဟု Tour De Myanmar ခရီးသွားလုပ်ငန်းမှအုပ်ချုပ်မှုဒါရိုက်တာမဒါလီကပြောသည်။

          လက်ရှိအခြေအနေတွင်နိုင်ငံတကာမှမြန်မာနိုင်ငံသို့လေကြောင်းလိုင်း၉လိုင်းပျံသန်းနေပြီး၂၀၁၁ခုနှစ်တွင်ရန်ကုန်လေဆိပ်မှနိုင်ငံခြားသားခရီးသည်၄၃၈,၀၀၀ဦးဝင်ရောက်ခဲ့ပြီးထိုအထဲတွင်ဂျာမနီနိုင်ငံသား၁၃,၂၄၅ဦးဝင်ရောက်ခဲ့သည်။