ပြည်ထောင်စုရွေးကောက်ပွဲကော်မရှင်ကကြားဖြတ်ရွေးကောက်ပွဲအတွက်ကြေညာသောမဲစာရင်းများတွင်မမှန်ကန်မှုများရှိနေကြောင်းနိုင်ငံရေးပါတီများ၏တင်ပြမှုများရှိလာသောကြောင့်မဲစာရင်းမှန်ကန်အောင်ဆောင်ရွက်ရန်သက်ဆိုင်ရာကော်မရှင်ရုံးများသို့ပြည်ထောင်စုရွေးကောက်ပွဲကော်မရှင်ကညွှန်ကြားချက်ပေးပို့ထားကြောင်းသတင်းရရှိသည်။
“ သက်ဆိုင်ရာကော်မရှင်တွေကိုရော၊နိုင်ငံရေးပါတီတွေကိုရောမတ်လ၈ရက်မှာအကြောင်းကြားစာပေးပို့ထားပါတယ်” ဟုပြည်ထောင်စုရွေးကောက်ပွဲကော်မရှင်ဌာနညွှန်ကြားရေးမှူးဦးသောင်းလှိုင်ကမဲစာရင်းမှန်ကန်ရေးအတွက်ဆောင်ရွက်ရန်ညွှန်ကြားစာပေးပို့ထားကြောင်းပြောသည်။ထုတ်ပြန်ထားသောမဲစာရင်းနှင့်ပတ်သက်၍နိုင်ငံရေးပါတီအချို့ကတိုင်ကြားမှုများရှိခဲ့ပြီး၊အဆိုပါတိုင်ကြားမှုများကိုချက်ချင်းလက်ခံဆောင်ရွက်ပေးခြင်းဖြစ်ကြောင်း၎င်းကပြောသည်။
“မဲစာရင်းတွေကိုလည်းသက်ဆိုင်ရာကိုယ်စားလှယ်လောင်းတွေကိုတစ်စုံစီအခမဲ့ကူးခွင့်ပေးထားတော့မဲစာရင်းနဲ့ပတ်သက်လို့မမှန်ကန်စရာအကြောင်းသိပ်မရှိဘူး။မမှန်ကန်ဘူးလို့ထင်ရင်ဒါကမမှန်ကန်ဘူးလို့ထင်ရင်ဒါကမမှန်ကန်ဘူးလို့သူတို့ကသက်သေပြပေါ့။အဲဒီလိုသာပြောရင်ကော်မရှင်အဆင့်ဆင့်ကမပါရမယ့်ဟာကိုပါရမယ့်ဟာလို့တော့ဘယ်သူမှမပြောဘူး။ပြင်ပေးမှာပဲ။ကျွန်တော်တို့ဘက်ကတော့အချိန်နဲ့တစ်ပြေးညီတိတိကျကျလုပ်ပေးနေပါပြီ။ဥပမာဆိုပါစို့မောင်ဖြူဆိုတာမရှိဘူးဆိုရင်ကော်မရှင်ကလိုင်းလေးတားလိုက်ရင်ပြီးသွားပြီ။မဲစာရင်းမှာမပါသေးတဲ့လူဆိုလည်းအချက်အလက်နဲ့တင်ပြရင်ပါသင့်ပါထိုက်တဲ့သူဆိုရင်ပါမှာပဲ။အဲဒီကိစ္စကိုကော်မရှင်ခွဲအဆင့်ဆင့်ကိုလည်းညွှန်ကြားပြီးပြီ။ပါတီတွေကိုလည်းပြောပြီးပြီ” ဟုဦးသောင်းလှိုင်ကမတ်လ၁၂ရက်တွင်ပြောသည်။
မတ်လ၈ရက်ရက်စွဲဖြင့်ပြည်ထောင်စုရွေးကောက်ပွဲကော်မရှင်ကကော်မရှင်အဖွဲ့ခွဲအဆင့်ဆင့်သို့ပေးပို့သောညွှန်ကြားချက်တွင်”သက်ဆိုင်ရာကော်မရှင်အဖွဲ့ခွဲအဆင့်ဆင့်အနေဖြင့်မိမိတို့၏မဲဆန္ဒနယ်အလိုက်ထုတ်ပြန်ကြေညာထားသောမဲစာရင်းများတွင်မဲဆန္ဒရှင်များထပ်နေခြင်း၊ပါဝင်သင့်သူ(အသက်ပြည့်သူ)များမပါဝင်သေးခြင်း၊ပြောင်းရွှေ့/ကွယ်လွန်သွားသူများကိုမနုတ်ပယ်ရသေးခြင်း၊အသစ်ပြောင်းရွှေ့ရောက်ရှိလာသူများကိုဥပဒေနှင့်အညီထည့်သွင်းပေးခြင်းတို့ကိုဖော်ပြပါဥပဒေပုဒ်မ၁၉၊နည်းဥပဒေ၁၃၊၁၄တို့နှင့်အညီတိကျစွာလိုက်နာဆောင်ရွက်၍ပြည့်စုံမှန်ကုန်သည့်မဲစာရင်းဖြစ်စေရေးအလေးထားကြပ်မတ်ဆောင်ရွက်ရန်အကြောင်းကြားပါသည်” ဟုဖော်ပြထားသည်။
လွှတ်တော်ရွေးကောက်ပွဲဥပဒေပုဒ်မ၁၉အရမဲစာရင်းတွင်ပါဝင်ခွင့်ရှိလျက်ပါဝင်ခြင်းမရှိကြောင်းတွေ့ရှိလျှင်ထိုအမည်များကိုနောက်ဆက်တွဲမဲစာရင်းတွင်ထည့်သွင်းရမည်ဟုဖော်ပြထားပြီးနည်းဥပဒေ၁၃တွင်မဲစာရင်းတွင်မဲပေးခွင့်ရှိသူများ၏အမည်များအစုအဝေးလိုက်ကျန်ရစ်ခဲ့လျှင်နေပြည်တော်ကော်မရှင်အဖွဲ့ခွဲသက်ဆိုင်ရာကော်မရှင်အဖွဲ့ခွဲသို့မဟုတ်ခရိုင်ကော်မရှင်အဖွဲ့ခွဲတို့သို့ရွေးကောက်ပွဲမကျင်းပမီ၇ရက်ထက်နောက်မကျစေဘဲနောက်ဆက်တွဲမဲစာရင်းတွင်ထည့်သွင်းစေရန်ခွင့်ပြုနိုင်သည်ဟုဖော်ပြထားသည်။
ထို့ကြောင့်မဲစာရင်းမှားယွင်းမှုများရှိလျှင်သက်ဆိုင်ရာရပ်ကွက်၊ကျေးရွာအုပ်စုနှင့်မြို့နယ်ကော်မရှင်ရုံးများသို့သွားရောက်တင်ပြနိုင်သည်ဟုဆိုသည်။မဲစာရင်းအချက်အလက်မှားယွင်းပါကပြင်ဆင်ရန်အချိန်၇ရက်ပေးထားခြင်းမှာမဲဆန္ဒရှင်များအတွက်ဖြစ်ပြီး၊နိုင်ငံရေးပါတီများအတွက်မဟုတ်ဘဲ၊ မမှန်ကန်မှုများရှိပါကသက်ဆိုင်ရာကော်မရှင်များသို့တင်ပြပူးပေါင်းဆောင်ရွက်နိုင်ကြောင်း၎င်းကဆက်လက်ပြောသည်။
ကြားဖြတ်ရွေးကောက်ပွဲအတွက်မဲစာရင်းများကို၂၀၁၀ရွေးကောက်ပွဲတွင်အသုံးပြုခဲ့သည့်မူလမဲစာရင်းများကိုအခြေခံပြီးရွေးကောက်ပွဲဥပဒေ၊နည်းဥပဒေများနှင့်အညီမှန်ကန်ပြည့်စုံသောမဲစာရင်းများပြုစုရန်ညွှန်ကြားထားပြီးဖြစ်ကြောင်းပြည်ထောင်စုရွေးကောက်ပွဲကော်မရှင်ဥက္ကဋ္ဌဦးတင်အေးကမတ်လ၈ရက်တွင်ဝန်ကြီးဌာနနှင့်အဖွဲ့အစည်းများတာဝန်ရှိသူများနှင့်တွေ့ဆုံစဉ်ပြောကြားခဲ့သည်။
ကြားဖြတ်ရွေးကောက်ပွဲအတွက်မဲပေးပိုင်ခွင့်ရှိသူများစာရင်း(မဲစာရင်း)ကိုဖေဖော်ဝါရီ၂၉ရက်မှစတင်၍သက်ဆိုင်ရာမဲဆန္ဒနယ်အသီးသီးရှိရပ်ကွက်ကျေးရွာအုပ်စုကော်မရှင်အဖွဲ့ခွဲရုံးများတွင်ကြေညာထားပြီးဖြစ်သည်။
မဲဆန္ဒနယ်အချို့တွင် တွေ့ရသောမဲစာရင်းမမှန်ကန်မှုများတွင်မှတ်ပုံတင်နံပါတ်မှားယွင်းနေခြင်း၊နေရပ်လိပ်စာမရှိသော်လည်းမဲပေးရမည့်စာရင်းထဲပါနေခြင်း၊ကွယ်လွန်ပြီးသူများမှာမဲပေးရမည့်စာရင်းတွင်ပါဝင်နေခြင်း၊မဲပေးရမည့်သူအချို့မှာမဲစာရင်းတွင်ပါဝင်လာခြင်းမရှိခြင်း၊လူတစ်ဦးတည်းမှတ်ပုံတင်တစ်ခုထက်မကပိုရှိနေခြင်း၊မဲပေးရမည့်သူမှာအမှန်နေထိုင်နေသည့်ကျေးရွာတွင်မဟုတ်ဘဲအခြားကျေးရွာမဲစာရင်းတွင်ပါဝင်နေခြင်း၊မဲပေးမည့်သူ၏ဖခင်နှင့်မိခင်အမည်မှားယွင်းနေခြင်း၊တစ်ဦးတည်းမှအမည်ထပ်နေခြင်းစသည်တို့ဖြစ်ကြောင်းနိုင်ငံရေးပါတီများမှတာဝန်ရှိသူများကပြောသည်။
No comments:
Post a Comment