KIO ထိန်းချုပ်နယ်မြေ မဟုတ်သော ရှမ်းတိုင်းရင်းသားကျေးရွာများတွင်ပါ သန်းခေါင်စာရင်း မကောက် ရန် KIA အဖွဲ့က ခြိမ်းခြောက်တားမြစ်

Wednesday, April 2, 2014
ကချင်ပြည်နယ်၊ မန်စီမြို့နယ်ရှိ KIO ထိန်းချုပ်နယ်မြေ မဟုတ်သော ရှမ်းတိုင်းရင်းသားကျေးရွာများ၌ မတ်လ ၂၉ ရက်နေ့မှစ၍ သန်းခေါင်စာရင်းကောက်ရန် ရောက်ရှိနေသော မြို့နယ် လ၀က ၀န်ထမ်းများအား KIA အဖွဲ့မှ ခြိမ်းခြောက်တားမြစ်မှုများ ပြုလုပ်လာကြောင်း ယင်းဒေသခံများထံမှ သိရသည်။
`` မန်ဝိန်းကြီးမှာရောက်နေတဲ့ လက်ထောက်ဦးစီး ၂ ယောက်လည်း မနေ့ကထိ သန်းခေါင်စာရင်း မကောက်ယူ နိုင်သေးဘူး၊ KIA အဖွဲ့ကလာပြီး တားမြစ်ထားလို့ မကောက်နိုင်ဘူး ဖြစ်နေတယ် ´´ ဟု မြို့နယ် လ၀က ရုံးမှ ၀န်ထမ်း တစ်ဦးက ပြောသည်။
မြန်မာနိုင်ငံတွင် မတ်လ ၃၀ ရက်နေ့မှ ဧပြီလ ၁၀ ရက်နေ့အထိ ပြည်လုံးကျွတ်သန်းခေါင်စာရင်း ကောက်ယူလျက်ရှိရာ KIO/KIA ထိန်းချုပ်နယ်မြေများတွင် သန်းခေါင်စာရင်းကောက်ယူရန် ညှိနှိုင်းမှုကို ငြင်းပယ်ခဲ့မှုကြောင့် အဆိုပါ နယ်မြေများ၌ သန်းခေါင်စာရင်းကောက်ယူမှု မပြုလုပ်ကြောင်း သိရသည်။
`` သမ္မတကြီး ခရီးစဉ်မှာ ၀န်ကြီး ဦးခင်ရီ ကိုယ်တိုင် PCG ကတစ်ဆင့် KIO/KIA ခေါင်းဆောင်တွေကို သန်းခေါင်စာရင်းကောက်ယူဖို့ ညှိနှိုင်းခဲ့တာပါ၊ ဒါပေမယ့် ခွင့်မပြုလို့ သွားမကောက်ပါဘူး၊ မန်ဝိန်းကြီး ဒေသမှာ က ရှမ်းရွာတွေများတယ်၊ KIO ထိန်းချုပ်နယ်မြေထဲ မပါဘဲနဲ့ လာပြီး ခြိမ်းခြောက်တာကတော့ အပြုသဘော မဆောင်ဘဲ အဖျက်သဘောလို့ပဲ မြင်ပါတယ် ´´ ဟု မြစ်ကြီးနားမြို့ခံ လ၀ကရုံးမှ ဦးစီးအရာရှိတစ်ဦးက ဆိုသည်။

မန်ဝိန်းကြီးကျေးရွာတွင် မတ်လ ၂၉ ရက်နေ့မှစ၍ မြို့နယ်လ၀ကမှ လက်ထောက်ဦးစီး ဦးမြင့်ကြည်နှင့် ဦးစိုင်းအိုက်အေး တို့ ရောက်ရှိနေပြီး ကျေးရွာအုပ်ချုပ်ရေးမှူး၏ လာရောက်တောင်းပန်မှုကြောင့် ဧပြီလ ၁ ရက်နေ့အထိ သန်းခေါင်စာရင်း မကောက်ယူနိုင်သေးကြောင်း သိရသည်။

`` အုပ်ချုပ်ရေးမှူးကို KIA အဖွဲ့က ဖုန်းနဲ့လှမ်းပြီး ခြိမ်းခြောက်တယ်လို့ကြားတယ်၊ ရွာမှာ သန်းခေါင်စာရင်း မကောက်ဖို့နဲ့ ပြောထားရက်သားနဲ့ ကောက်မယ်ဆိုရင် တိုက်ပွဲတွေ ပြန်ဖြစ်လာနိုင်တယ်ဆိုပြီး ခြိမ်းခြောက် ထား တော့ အုပ်ချုပ်ရေးမှူးလည်း ကြောက်နေတာပေါ့´´ ဟု မန်ဝိန်းကြီး ရွာသားတစ်ဦးက ဆိုသည်။

လက်ထောက်ဦးစီးနှစ်ဦးအား နေရေးထိုင်ရေး ကူညီဆောင်ရွက်ပေးနေသော ရှမ်းတိုင်းရင်းသားရွာသား တစ်ဦး က `` အုပ်ချုပ်ရေးမှူးက ရှိခိုးမတတ် လာတောင်းပန်လို့ ဦးစီးတွေလည်း သန်းခေါင်စာရင်း မကောက်ဘဲ နေရ တာပါ၊ သန်းခေါင်စာရင်းကောက်မယ်ဆိုရင် အုပ်ချုပ်ရေးမှူးက ဒီရွာမှာ မနေဘဲ ထွက်ပြေးတော့မယ်လို့ ပြောတယ်၊ KIA အဖွဲ့က သူ့ကို ဘယ်လောက်တောင် ခြိမ်းခြောက်ထားမှန်း မသိဘူး၊ ဒီ ရှမ်းရွာတွေအထိ လာပြီး သန်းခေါင်စာရင်း မကောက်ရဘူးလို့ ပြောနေတဲ့ KIA ဟာ အစိုးရက အလျှော့ပေးမှန်း သိလို့ အတင့်ရဲနေတာဗျ ´´ ဟု ပြော ကြားခဲ့သည်။

မန်ဝိန်းကြီးဒေသတွင် မန်ဝိန်ကြီးကျေးရွာအုပ်စု၊ နောင်စွမ်းကျေးရွာအုပ်စု၊ ပန်ခမ်းကျေးရွာအုပ်စု၊ လဂါတ်ဒေါ့ ကျေးရွာအုပ်စု၊ မန်မွန်းကျေးရွာအုပ်စုနှင့် နမ့်ခါးပါကျေးရွာအုပ်စုများ ပါဝင်ပြီး KIA ၏ ခြိမ်းခြောက် တားမြစ်မှု ကြောင့် သန်းခေါင်စာရင်း ကောက်ယူမည့် လ၀က ၀န်ထမ်းများမှာ အခက်ကြုံနေ ရကြောင်း သိရသည်။

ညီသစ်(မြစ်ကြီးနား)
Shan News