လူမှုဖူလုံရေးကြေးသွင်းသည့် လုပ်သားမီးဖွားလျှင် တစ်နှစ်စာ အာမခံကြေးရမည်

Tuesday, July 16, 2013
လူမှုဖူလုံရေးကြေး ထည့်သွင်းထားသည့် အမျိုးသမီး အလုပ်သမားများ မီးဖွားလျှင် အာမခံကြေးအဖြစ် နောက်ဆုံး ခြောက်လအတွင်း ရရှိသော ပျမ်းမျှလုပ်ခလစာ၏ ၅၀ ရာခိုင်နှုန်းဖြင့် သက်တမ်း
တစ်နှစ် ခံစားခွင့်ရရှိမည် ဖြစ်ကြောင်း အလုပ်သမား၊ အလုပ်အကိုင်နှင့် လူမှုဖူလုံရေးဝန်ကြီးဌာန လူမှုဖူလုံရေး ဆေးဌာနမှ ဒုတိယညွှန်ကြားရေးမှူး ဒေါက်တာလွင်လွင်ဦးလှိုင်က The Voice သို့ ပြောကြားသည်။
မီးဖွားခွင့် အာမခံစနစ်အရ အကျိုးခံစားခွင့် ရရှိလိုသော အလုပ်သမားများသည် လူမှုဖူလုံရေးကြေးအဖြစ် တစ်လလျှင် နောက်ဆုံးခြောက်လအတွင်း ရရှိသော ပျမ်းမျှလုပ်ခလစာ၏ ၁၂ ရာခိုင်နှုန်း ထည့်ဝင်ရမည်ဖြစ်ကြောင်း၊ ကလေးတစ်ဦး မွေးဖွားပါက လုပ်ခ၏ ၅၀ ရာခိုင်နှုန်း၊ နှစ်ဦး အမြွှာမွေးဖွားပါက ၇၅ ရာခိုင်နှုန်း၊ သုံးဦးအမြွှာမွေးဖွားပါက ၁၀၀ ရာခိုင်နှုန်းထားဖြင့် သက်တမ်းတစ်နှစ် ခံစားခွင့်ရရှိမည် ဖြစ်ကြောင်း၊ မွေးဖွားလာသော ကလေး၏ အထွေထွေရောဂါများကိုပါ အခမဲ့ဆေးကုသခွင့်ရရှိမည် ဖြစ်ကြောင်း ၎င်းကဆိုသည်။
အဆိုပါမီးဖွားစရိတ် အာမခံအပြင် ကျန်းမာရေးနှင့် လူမှုရေးစောင့်ရှောက်မှု အာမခံ၊ အလုပ်လုပ်နိုင်စွမ်းမရှိမှု အကျိုးခံစားခွင့်၊ အသက်ပြည့် အငြိမ်းစား အကျိုးခံစားခွင့်နှင့် ကျန်ရစ်သူပင်စင် အကျိုးခံစားခွင့်၊ အလုပ်လက်မဲ့ အကျိုးခံစားခွင့်၊ အလုပ်တွင် ထိခိုက်မှု အကျိုးခံစားခွင့်၊ အခြားလူမှုဖူလုံရေးစနစ် (အိမ်ရာစီမံကိန်းများ) အာမခံစနစ်များ ပါဝင်သည့် ၂၀၁၂ ခုနှစ် လူမှုဖူလုံရေး ဥပဒေကို ယခုနှစ်ကုန်ပိုင်းတွင် စတင်အကောင်အထည်ဖော် ဆောင်ရွက်မည် ဖြစ်ကြောင်း လူမှုဖူလုံရေးအဖွဲ့ထံမှ သိရှိရသည်။
မီးဖွားခွင့် အကျိုးခံစားခွင့် ကောင်းမွန်သဖြင့် စိတ်ဝင်စားသော်လည်း အာမခံကြေး ၁၂ ရာခိုင်နှုန်းမှာ များလွန်းကြောင်း လှိုင်သာယာမြို့နယ်ရှိ ဖိနပ်စက်ရုံတစ်ရုံမှ အမျိုးသမီး အလုပ်သမားတစ်ဦးက ဆိုသည်။
လူမှုဖူလုံရေးကြေး ထည့်သွင်းထားသူများကို ကလေးမွေးဖွားစဉ် ခွင့်သုံးလ သတ်မှတ်ပေးရန် ၊ ကလေးမွေးဖွားသည့် အမျိုးသမီး၏ ခင်ပွန်းက အာမခံကြေး ထည့်ဝင်ထားသူဖြစ်လျှင် ထိုအမျိုးသားကိုခွင့်ရက် နှစ်ပတ်ရရှိရန် အလုပ်ရှင်နှင့် ညှိနှိုင်းစီစဉ်ပေးသွားမည် ဖြစ်ကြောင်း၊ အဆိုပါ အမျိုးသား၏ ခွင့်ရက် နှစ်ပတ်အတွက် လုပ်ခ၏ ၇၀ ရာခိုင်နှုန်းကို ခံစားခွင့် ရရှိမည်ဖြစ်ကြောင်း ဒေါက်တာလွင်လွင်ဦးလှိုင်က ဆိုသည်။
၁၉၅၄ လူမှုဖူလုံရေး ဥပဒေအရ အမျိုးသမီးလစာမှ လစဉ် ၄ ရာခိုင်နှုန်းကို လူမှုဖူလုံရေးကြေးအဖြစ် ထည့်သွင်းရပြီး မီးဖွားစရိတ်အဖြစ် တစ်ရက်လုပ်ခ၏ ၇၀ ရာခိုင်နှုန်း ခံစားခွင့်နှင့် မွေးဖွားလာသည့် ကလေးကို ခြောက်လ အခမဲ့ဆေးကုသခွင့် ပေးခဲ့သည်။
လူမှုဖူလုံရေး ဥပဒေသစ်ကို ကျင့်သုံးရာတွင် လူမှုဖူလုံရေးကတ်များကို စက္ကူကတ်အစား Smart Card အဖြစ်ပြောင်းကာ အသုံးပြုသွားမည် ဖြစ်ကြောင်း၊ ယင်းစနစ်ဖြင့် လုပ်ဆောင်ရန် ကနဦးလုပ်ငန်းစဉ် ဖြစ်သည့် အလုပ်သမားများ၏ ကိုယ်ရေးအချက်အလက် ထည့်သွင်းခြင်း (Data Entry Project) နှင့် အလုပ်သမား လက်ဗွေနှိပ်ခြင်းများကို စတင်လုပ်ဆောင်နေပြီ ဖြစ်ကြောင်း လူမှုဖူလုံရေးအဖွဲ့ထံမှ သိရှိရသည်။
မြန်မာနိုင်ငံတွင် လူမှုဖူလုံရေး ထည့်သွင်းသည့် အလုပ်သမား ၆၄၀,၀၀၀ ကျော်ရှိသည်။

ဟိန်းသွင်ထက်
The Voice Weekly