နိုင်ငံလုံးဆိုင်ရာ ပညာရေး ညီလာခံ၌ ဒေသဆိုင်ရာ ပညာရေး ဆွေးနွေးပွဲများမှ ရလဒ်များအား ကဏ္ဍ ၁၃ ခုဖြင့် ဆွေးနွေး

Tuesday, June 11, 2013
မြန်မာနိုင်ငံ၏ ပညာရေး ပြုပြင်ပြောင်းလဲမှုအတွက် အထောက်အကူ ပြုစေမည့် နိုင်ငံလုံးဆိုင်ရာ ပညာရေး ညီလာခံအား ပြည်နယ်နှင့် တိုင်းဒေသကြီးများအလိုက် ဒေသဆိုင်ရာ ပညာရေး ဆွေးနွေးပွဲများမှ ထွက်ပေါ်လာသည့် ရလဒ်များမှ ယင်းပညာရေး ညီလာခံတွင် ကဏ္ဍ(၁၃)ခုဖြင့် ထည့်သွင်း ဆွေးနွေးခဲ့ကြောင်း သိရသည်။
အဆိုပါ နိုင်ငံလုံးဆိုင်ရာ ပညာရေး ညီလာခံကို ရန်ကုန်၊ မျက်မမြင်ကျောင်း (ခ၀ဲခြံ)၊ မရမ်းကုန်းမြို့နယ်တွင် ၂၀၁၃ ခုနှစ်၊ ဇွန် ၈ ရက်မှ ၉ ရက်အထိ နှစ်ရက်ကြာ ကျင်းပပြုလုပ်ခြင်းဖြစ်ပြီး ၎င်းညီလာခံတွင် ကလေးသူငယ်များ ရှေးဦးသင် ပညာရေး၊ မသင်မနေရ အခြေခံပညာရေး (မူလတန်းမှ အလယ်တန်း)၊ အခြေခံ အထက်တန်း ပညာရေး၊ အဆင့်မြင့် ပညာရေး၊ ကျောင်းပြင်ပ ပညာရေး၊ ပုဂ္ဂလိက ကျောင်းနှင့် ပုဂ္ဂလိက တက္ကသိုလ်များ၊ ဘုန်းတော်ကြီးသင်ကျောင်း ပညာရေး၊ ဘာသာရေး အသင်းအဖွဲ့များမှ ဖွင့်လှစ်ထားသည့် ကျောင်းများ၊ အစိုးရ မဟုတ်သော အဖွဲ့အစည်းများမှ ဖွင့်လှစ်သည့် အခမဲ့ပညာဒါန ကျောင်းများ၊ ဆရာ၊ ဆရာမများ၏ အခန်းကဏ္ဍ၊ ပညာရေး အထူးလိုအပ်ချက်၊ တိုင်းရင်းသား ဘာသာစကား သင်ကြားရေး၊ စစ်ပြေးဒုက္ခသည်နှင့် ရွှေ့ပြောင်း အလုပ်သမားများ၏ ပညာရေးဟူသည့် ကဏ္ဍ(၁၃)ရပ်အား ဆွေးနွေးခဲ့သည်။
''မြန်မာနိုင်ငံရဲ့ ပညာရေး ပြုပြင်ပြောင်းလဲမှု လုပ်ငန်းစဉ်တွေမှာ အထောက်အကူ ပြုစေဖို့အတွက် ဒီညီလာခံကို ကျင်းပရတာပါ။ ညီလာခံမှာ ပညာရေး အဆင့်မြင့်မားဖို့အတွက် အဓိက လိုအပ်ချက်တွေကို ကဏ္ဍ ၁၃ ရပ်ခွဲပြီး ဆွေးနွေးပါတယ်။ ဒီဆွေးနွေးပွဲ ရလဒ်တွေကို ပြည်သူ့လွှတ်တော် အမျိုးသား ပညာရေး မြှင့်တင်မှုကော်မတီသို့ တင်သွင်းသွားမှာ ဖြစ်ပါတယ်'' ဟု ပညာရေးစနစ် ပြုပြင်ပြောင်းလဲရေး နိုင်ငံလုံးဆိုင်ရာ ကွန်ရက်မှ အဖွဲ့ဝင် ဒေါ်ဟောင်စိုင်းက ဆိုသည်။
နိုင်ငံလုံးဆိုင်ရာ ပညာရေးညီလာခံ မကျင်းပမီ ဒေသဆိုင်ရာ ပညာရေး ဆွေးနွေးပွဲများအား ပဲခူး၊ မန္တလေး၊ မုံရွေး၊ ပခုက္ကူ၊ ထားဝယ်၊ မြစ်ကြီးနား၊ တာချီလိတ်၊ တောင်ကုတ်၊ လားရှိုး၊ ဘားအံ၊ မော်လမြိုင်၊ မြိတ်၊ တောင်ငူ၊ ပေါင်းတည်၊ တောင်ကြီး၊ ဟင်္သာတ၊ ကျောက်ဖြူ၊ သံတွဲ၊ စစ်တွေ၊ ကော့သောင်း၊ လွိုင်ကော်၊ မုံရွာနှင့် ကလေး စသည်တို့တွင် ပြုလုပ်ခဲ့ခြင်းဖြစ်သည်။
ယင်းညီလာခံသို့ ပညာရေး အဖွဲ့အစည်းများ၊ ဗုဒ္ဓဘာသာ ဘုန်းတော်ကြီးသင် ပညာရေးကျောင်းများ၊ ခရစ်ယာန် ဓမ္မတက္ကသိုလ်များ၊ မူဆလင်ဘာသာဝင်ကျောင်း ဆရာများ၊ ကျောင်းသားသမဂ္ဂများ၊ ပညာဒါနကျောင်းများ၊ ပုဂ္ဂလိကကျောင်းများ၊ လူငယ်အဖွဲ့အစည်းများ၊ နိုင်ငံရေးပါတီများနှင့် ပညာရေး ပြုပြင်ပြောင်းလဲရေး အတွက် စိတ်ဝင်စားသော တစ်သီးပုဂ္ဂလများနှင့် လွှတ်တော်ကိုယ်စားလှယ်များ အသီးသီး တက်ရောက် ဆွေးနွေးခဲ့ကြသည်။