တပေါင်းပွဲတော်

တပေါင်းလသည် မြန်မာ လများတွင် ဆယ့်နှစ်လမြောက် ဖြစ်၍ တစ်နှစ် တာ၏ နောက်ဆုံးလ ဖြစ်သည်။ တပေါင်းလ၏ ပထမ လဝက် သည် ဆောင်းရာသီတွင် ကျရောက်၍ ဒုတိယ လဝက် သည် နွေရာသီ တွင် ကျရောက်ကာ ဆောင်းကူးနွေစ သာယာလှသော လရာသီ ဖြစ် သည်။
တပေါင်းလ၏ အဓိပ္ပာယ်ကို မြန်မာလ အမည်များ စာအုပ်တွင်-

(၁) ပူပန်ခြင်းကောင်းသောလ ဟတပသျှား [(သက္ကတ) = တပေါင်း]။

(၂) ပူသောနွေရာသီသို့ ကျရောက်သောလ [တပ(ပါဠိ)=တပေါင်း]

(၃) ထန်းချက်လ၊ ထန်းရည်ကိုကျို၍ ထန်းလျက်ချက်သောလ [တာလ-တာလ်တန်း=

တ(ထန်း)+ပေါင်း =ချက်သောလ] ဟုဖော်ပြထားသည်။

မြန်မာနိုင်ငံတွင် တပေါင်းလသို့ရောက်လာသည့်အခါ မြစ်များ၊ ချောင်းများ၌ ရေစစ်ကာ သဲခုံ၊ သောင်ခုံ ဖြူဖြူဖွေးဖွေး ကလေးများ ထိုမှ ဤမှပေါ်ထွန်း လာလေ့ရှိသည်။ ထို့အပြင် ထိုရာသီ သည် လယ်ထွက်ယာထွက် သီးနှံများကို ရောင်းချချိန် ဖြစ်သဖြင့် တောင်သူ ဦးကြီးတို့ ငွေစရွှင် သည့်ရာသီ ဖြစ်ပေသည်။ လယ်ယာ လုပ်ငန်းများ ပြီးစီး၍ လုပ်ငန်းခွင်မှ အနား ယူချိန်လည်း ဖြစ်သည်။ ယင်းသို့ အကြောင်း ညီညွတ်သော အချိန်ဖြစ်၍ မြန်မာ ဘုရင်များသည် ထိုလတွင် သဲပုံ စေတီပွဲကို ရာသီပွဲ အဖြစ် သတ်မှတ်၍ ရွှေနန်းတော်ကြီး မှသည် ကျေးလက်တောရွာ ကလေးများ အထိ ခြိမ့်ခြိမ့်သဲ ဆင်နွှဲကျင်းပ ခဲ့ကြသည်။ သဲပုံစေတီ ပွဲတော်ကား ဗုဒ္ဓဘာသာမှ ဆင်းသက်လာသည့် မြန်မာ့ ယဉ်ကျေးမှု ပွဲတော် ဖြစ်သဖြင့် မြန်မာ နိုင်ငံတွင် ဗုဒ္ဓသာသနာ စတင်ထွန်းကား လာချိန်ကပင် ရှိခဲ့သော ပွဲတော်ဟု ယူဆရပေသည်။

http://bit.ly/14ghMmq