အပြီးတိုင် ထုတ်ဝေခွင့် ပိတ်သိမ်းမည်ဟု သတိပေးခံရသော ရန်ကုန်တိုင်းမ်နှင့် ဗီးနပ်စ်သတင်းဂျာနယ်
ယခင်စစ်အစိုးရ၏ ဒုတိယခေါင်းဆောင် ဒု ဗိုလ်ချုပ်မှူးကြီး မောင်အေးသည် ဇူလိုင်လ ၈ ရက်နေ့က လေဖြတ်ဝေဒနာခံစားရပြီး စင်ကာပူနိုင်ငံတွင် ဆေးဝါးကုသမှုခံယူရန် ထွက်ခွာသည်ဆိုသောသတင်းကို သတင်းဂျာနယ်များတွင် လုံးဝ ဖော်ပြခြင်းမပြုရန် စာပေစိစစ်ရေးဌာနက သတင်းဂျာနယ်များကို တရားဝင် တားမြစ်ခဲ့ကြောင်း၊ သို့ရာတွင် ဇူလိုင် ၉ ရက်နေ့ထုတ် ရန်ကုန်တိုင်းမ်သတင်းဂျာနယ်နှင့် ဗီးနပ်စ်သတင်းဂျာနယ်များတွင် ယင်းသတင်းကို အကျယ်တ၀င့် ရေးသားဖော်ပြခဲ့သည့်အတွက် စာပေစိစစ်ရေးက ဂျာနယ်တာဝန်ရှိသူများကို ခေါ်ယူတွေ့ဆုံပြီး သတိပေးလက်မှတ်ထိုးခိုင်းကြောင်း၊ နောက်တကြိမ် စာပေစိစစ်ရေးက ခွင့်ပြုမှုမရှိသော သတင်းများကို ထည့်သွင်းပါက ဂျာနယ်ထုတ်ဝေခွင့် လုံးဝ ရုပ်သိမ်းသွားမည်ဟု တရားဝင် အသိပေးပြောဆိုကြောင်း သိရှိရသည်။
“ဦးမောင်အေးသတင်း ထည့်တဲ့ ဂျာနယ်နှစ်စောင်ကို တရားဝင် သတိပေးတယ်။ အခုတကြိမ်က နောက်ဆုံး သတိပေးအနေနဲ့ ခေါ်သတိပေးတယ်။ ခွင့်ပြုပေးမထားတဲ့ သတင်းတွေထည့်ရင် နောက်တကြိမ်ဆိုရင် လုံးဝ ထုတ်ဝေခွင့် ရပ်ဆိုင်းမယ်ပေါ့။
အဲဒါ ခေါ်ပြောတယ်။ သက်ဆိုင်ရာတာဝန်ခံတွေကို ခေါ်ပြီး စာပေစိစစ် ညွှန်ကြားရေးမှူးကိုယ်တိုင် သတိပေးတာပါ” ဟု
ပြန်ကြားရေးဝန်ကြီးဌာန၊ စာပေစိစစ်ရေးနှင့်မှတ်ပုံတင်ဌာနမှ စာစစ်မှူးတဦးက ဧရာဝတီသို့ အတည်ပြုပြောသည်။
ဧရာဝတီက သက်ဆိုင်ရာ ဂျာနယ်တာဝန်တချို့ကို ဆက်သွယ်မေးမြန်းရာ စာပေစိစစ်ရေးက နောက်တကြိမ် စည်းကမ်းဖောက်ဖျက်လျှင် ထုတ်ဝေခွင့် လုံးဝရပ်ဆိုင်းသည်အထိ အရေးယူမည်ဟု ပြောဆိုမှု မှန်ကန်ကြောင်း အတည်ပြု ပြောဆိုသော်လည်း လတ်တလော အနေအထားတွင် စာပေစိစစ်ရေးဌာန၏ ထိန်းချုပ်မှုအောက်တွင် ဂျာနယ်များ ထုတ်ဝေနေရသည့်အတွက် အသေးစိတ် အချက်အလက်များကို ထုတ်ဖော်မပြောလိုကြောင်း ပြောဆိုကြသည်။
ဦးမောင်အေးသတင်း ထည့်သွင်းမှုကြောင့် သတင်းဂျာနယ်များ ထုတ်ဝေခွင့် ရပ်ဆိုင်းခံရမည်ဟု သတိပေးခံရမှုအပေါ်
ပြည်တွင်းသတင်းသမားအများစုက ဒီမိုကရေစီမဆန်သော လုပ်ရပ်အဖြစ် ရှုမြင်ကြသည်။
“ဒီမိုကရေစီအစိုးရလို့ခေါ်တဲ့ အစိုးရတက်ပြီးတော့ The Voice ဂျာနယ် တရားစွဲခံရတယ်။ လျှပ်တပြက်ဂျာနယ် အပိတ်ခံရတယ်၊ တရားစွဲခံရတယ်။ အခုတခါ ဦးမောင်အေးသတင်းထည့်လို့ ရန်ကုန်တိုင်းမ်နဲ့ ဗီးနပ်စ်ဂျာနယ် အပိတ်ခံရမယ်လို့ ခြိမ်းခြောက်ခံရတယ်။ ဒါတွေကိုကြည့်ရင် ဘယ်မှာလဲ သတင်းလွတ်လပ်ခွင့်။ ဘယ်မှာလဲ စာနယ်ဇင်းလွတ်လပ်ခွင့်။
ဦးမောင်အေး ကျန်းမာရေးမကောင်းလို့ မကောင်းဘူးလို့ ရေးတာပဲ။ အဲဒါဘယ်လောက်များ ထိခိုက်သွားသလဲ။ တဖက်က စဉ်းစားကြည့်ရင် ဒီစစ်အစိုးရ ခေါင်းဆောင်ဟောင်းတွေက လက်ရှိအစိုးရအပေါ်မှာ ထိန်းချုပ်ထားဆဲဆိုတာကို ပြတာပဲ” ဟု ၀ါရင့်သတင်းသမားတဦးက သုံးသပ်သည်။
ပြန်ကြားရေးဝန်ကြီးဌာန၀န်ကြီး ဦးကျော်ဆန်းက ဇွန်လကုန်တွင် စာပေစိစစ်ရေး ဖျက်သိမ်းမည်ဟု သတင်းမီဒီယာများကို
ကတိပြု ပြောဆိုခဲ့ပြီဖြစ်သော်လည်း လက်ရှိအချိန်အခြေအနေတွင်မူ စာပေစိစစ်ရေးက ယခင်ထက်ပင် ပိုမိုတင်းကျပ်လာကြောင်း သိရှိရသည်။
“ဂျာနယ်တွေအားလုံးက စာပေစိစစ်ရေးအောက်မှာ အလုပ်လုပ်နေရဆဲပဲ။ အရင်ထက်စာရင် လုပ်ခွင့်ပိုရတာလာ မှန်ပေမယ့် စနစ်ကတော့ အရင်စစ်အစိုးရ လက်ထက်ကလိုပဲ။ တင်းကျပ်မှုတွေ ခံနေရတုန်းပဲ။ အရင်ထက်တောင် ပိုဆိုးလာတယ်။
တရားစွဲတာတွေတောင် ပါလာတယ်။ သတင်းသမားတွေကို တရားဝင် ထောင်ချဖို့အထိ လုပ်လာတယ်” ဟု ဂျာနယ်တာဝန်ခံအယ်ဒီတာတဦးက ဆိုသည်။
ပြန်ကြားရေးဝန်ကြီးဌာနမှ တာဝန်ရှိသူများ၏ အဆိုအရ ဇူလိုင်လကျင်းပသည့် လွှတ်တော်အစည်းအဝေးများတွင် ပုံနှိပ်မီဒီယာဥပဒေကြမ်းကို တင်ပြမည်ဖြစ်ကြောင်း သိရှိရသည်။
ပုံနှိပ်မီဒီယာဥပဒေကြမ်းသည် သတင်းသမားများ ပါဝင်ရေးဆွဲနိုင်ခြင်းမရှိဘဲ ပြန်ကြားရေးဝန်ကြီးဌာနကသာ ရေးဆွဲအကောင်အထည်ဖော်ခြင်းဖြစ်သည်။
ဧရာဝတီ(org)
No comments:
Post a Comment