ဒက္ခိဏသီရိမြို့နယ်ရဲတိရွာကိုအခြေပြုပြီးလယ်ယာစိုက်ပျိုးရေးအလုပ်သမားသမဂ္ဂတခု မေ၂၄ရက်နေ့ကဖွဲ့စည်းခဲ့သည်။
သမဂ္ဂအမှုဆောင်အဖွဲ့ဝင်၇ဦးကို ရွေးချယ်တင်မြှောက်ကြကြောင်းအလုပ်အမှုဆောင်အဖွဲ့ဝင်ဦရီမောင်ကဧရာဝတီသို့ပြောသည်။
´ သမဂ္ဂဖွဲ့စည်းတဲ့နေ့က အဖွဲ့ဝင် ၆၀ တက်ရောက်ပါတယ်။ အများဆန္ဒ အရ ဦးလှမြင့်ကို ဥက္ကဌ တင်ကြပြီးတော့ အတွင်းရေးမှူးက ဦးကျော်ရွှေ ဖြစ်ပါတယ်။ ဘဏ္ဍာရေးမှူးကတော့ ဦးကျော်စိုးပါ။ မေလ ၂၄ ရက်နေ့မှာ ရန်ကုန်က အလုပ်သမားအရေး နားလည်ကျွမ်းကျင်တဲ့ လူကြီးတွေက ကမကထပြု အကူအညီ ပေးပြီး ကျနော်တို့ ဖွဲ့စည်းလိုက်တာ ဖြစ်ပါတယ်´ ဟု ဆိုသည်။
ကျန် အမှုဆောင်အဖွဲ့ဝင်များမှာ ဦးကျော်ဝင်း ဦးရီးမောင် ဦးမောင်မောင်နှင့် ဦးမင်းစိုးတို့ ဖြစ်ကြသည်။
နေပြည်တော်တွင် သမဂ္ဂ လိုအပ်ပုံကိုလည်း ဦးမောင်ရီက ရှင်းပြသည်။ နေပြည်တော် တည်ဆောက်ရေးလုပ်ငန်း စတင်စဉ်ကတည်းက ဒေသခံများ၏ ဘိုးဘွားပိုင် လယ်မြေ ဥယျာဉ်နှင့် ရွာအများအပြားကို သိမ်းပိုက်ခြင်း ခံခဲ့ရသည်ဟု သူက ဆိုသည်။
´ကျနော်တို့ မိရိုးဖလာ လယ်သမားတွေပါ။ လယ်ကလွဲပြီး ဘာမှ မလုပ်စားတတ်ပါဘူး။ ဒီလယ် ဒီမြေကို ထွန်ယက်ပြီးမှ ကျနော်တို့ဘ၀ ရှင်သန်ရတာပါ။ စစ်တပ်က ကျနော်တို့ လယ်တွေသိမ်းတုန်းက တဧက ၃ သိန်းခွဲ ပေးတယ်ဗျာ။ ကျနော့မှာ သားထောက် သမီးခံလည်း ရှိတာ မဟုတ်တော့ ဒီ ပိုက်ဆံကုန်သွားရင် ဘာဆက်လုပ်ရမလဲ။ တောင်းဘဲ စားရမလား။ အသက်တွေကလည်း ကြီးပြီ။ ဒါကြောင့် ကျနော်တို့ရဲ့ အခက်အခဲကို ဖြေရှင်းနိုင်ဖို့ဆိုရင် သမဂ္ဂ လိုတယ်။ နောင်ကို ကိစ္စတခုပေါ်လာရင် အများအတွက် သမဂ္ဂအားနဲ့ ဖြေရှင်းနိုင်မယ်လို့ ယုံကြည်လို့ ဒီသမဂ္ဂမှာ ၀င်ပါ လုပ်ဆောင်တာ ဖြစ်ပါတယ်´ဟု ဆိုသည်။
ဦးသိန်းစိန် အစိုးရလက်ထက်တွင် သမဂ္ဂများကို တရားဝင် ဖွဲ့စည်းခွင့် ပြုထားသဖြင့် မိမိတို့ အဖွဲ့ကို မှတ်ပုံတင်ရန် အစီအစဉ် ရှိကြောင်း ၎င်းက ဆက်ပြောသည်။
သမဂ္ဂ စနစ်တကျ ဖွဲ့စည်းနိုင်ရေးအတွက် ရန်ကုန်မှ လာရောက် အကူအညီပေးသောအဖွဲ့မှာ လွတ်လပ်သော အလုပ်သမား သမဂ္ဂများ ဖြစ်မြောက်ရေး ကော်မတီ ဖြစ်ကြောင်း သိရသည်။
သမဂ္ဂဖွဲ့ရေးအစီအစဉ်ကို ကျေးရွာအုပ်ချုပ်ရေးမှူးက ပြဿနာရှာခြင်းမရှိဟု ကော်မတီဝင် ဒေါ်အိရွှေစင်ညွန့်က ပြောသည်။
´ကျမတို့ ကော်မတီက အကြံပေးခြင်း လမ်းညွှန်ကူညီခြင်း စတဲ့ ကမကထပြုမှုတွေနဲ့ ဖွဲ့ဖြစ်တာ ဒီအဖွဲ့နဲ့ဆိုရင် သမဂ္ဂ ရှစ်ခုကို ဖွဲ့စည်းပြီးသွားပါပြီ။ တချို့ကလည်း တရားဝင် မှတ်ပုံတင်ကျပြီးသွားပြီ။ တချို့လည်း ကြိုးစားတုန်းပေါ့။ ကျမတို့ ကြုံရတဲ့ အခက်အခဲနဲ့ စိန်ခေါ်မှုကတော့ ပြည်သူတွေဟာ အကြောက်တရား လွှမ်းမိုးခံနေရဆဲနဲ့ သမဂ္ဂဘာကြောင့် ဖွဲ့ရတယ်။ သူတို့အတွက် သမဂ္ဂ ဘာကြောင့်လိုအပ်တယ်ဆိုတာကို မသိကြသေးတဲ့ စိန်ခေါ်ချက်ပါဘဲ။ သမဂ္ဂကို ဖွဲ့စည်းဖို့အတွက် အစက ဆောက်လုပ်ရေးဘက်ကရော လယ်ယာစိုက်ပျိုးရေးဘက်ကပါ လူ ၂၀၀ လောက် တက်ဖို့ ရှိပေမဲ့ ခုနပြောတဲ့ အချက်တွေကြောင့် လူ ၆၀ လောက်ဘဲ တက်ဖြစ်ကြတယ်။ ဒီတက်တဲ့လူအားလုံးကတော့ ဒီရဲ့ အဖွဲ့ ၀င်တွေ ဖြစ်ပါတယ်။ ဒီမှာ မှတ်သားစရာ ထူးခြားချက်က ကျေးရွာအုပ်ချုပ်ရေးမှူးကိုယ်တိုင် လယ်မြေ အသိမ်းခံထားရသူ ဖြစ်နေတယ်။ ဒါကြောင့် သူက ဘာမှ ကျမတို့ကို ဟန့်တား တာ နှောက်ယှက်တာ မလုပ်ပါဘူး´ ဟု သူက အကျယ်တ၀င့် ရှင်းပြသည်။
ဧရာဝတီ(Blog)
No comments:
Post a Comment