ရန်ကုန်တိုင်းဒေသကြီး တိုက်ကြီးမြို့နယ် ဥက္ကံမြို့မှာ မနေ့က
ဖြစ်ပွား ခဲ့တဲ့ အကြမ်းဖက်မှုတွေရဲ့ နောက်ဆက်တွဲအနေနဲ့ ဒီနေ့အစောပိုင်းက
အကြမ်းဖက် တိုက်ခိုက်ခံရတဲ့ အစ္စလာမ်ဘာသာဝင် တစ်ဦး သေဆုံးခဲ့ရပြီးတော့ ကျန်နှစ်ဦးဟာလည်း ရန်ကုန်ပြည်သူ့ဆေးရုံကြီးမှာ အရေးပေါ် ကုသမှု ခံယူနေကြရတယ်လို့ ဥက္ကံဒေသခံ ရဲစခန်း က ပြော ပါတယ်။ မနေ့က ဖြစ်ခဲ့တဲ့ ဥက္ကံမြို့က အကြမ်းဖက်မှုကြောင့် အိမ်ခြေ ရာဂဏန်းနီးပါး ပျက်စီး ခဲ့ရပြီး ဒေသ တွင်းနေထိုင်သူ ၅၀၀ ကျော်ဟာလည်း နေအိမ်စွန့်ခွာ ထွက်ပြေးနေရတယ်လို့ ကူညီပေးရေး အဖွဲ့ အစည်းတွေက ပြောပါတယ်။ အပြည့်အစုံကိုတော့ ရန်ကုန်အခြေစိုက် ဗွီအိုအေသတင်းထောက် ကိုအောင် ရဲမောင်မောင် က သတင်းပေးပို့ခဲ့ပါတယ်။
ရန်ကုန်တိုင်း၊ တိုက်ကြီးမြို့နယ် ဥက္ကံမြို့က အကြမ်းဖက်မှုကြောင့် အစ္စလာမ်ဘာသာဝင် တစ်ဦးဖြစ်တဲ့ ကိုဇော်ဇော်နိုင် သေဆုံးသွားခဲ့ပြီး ကျန်အစ္စလာမ်ဘာသာဝင် ၂ ဦးဖြစ်တဲ့ ကိုတင်ဝင်းနဲ့ ကိုအီစမိုင်တို့ ဟာ လည်း အရေးပေါ် ကုသမှုတွေ ခံနေရဆဲ ဖြစ်တယ်လို့ ဥက္ကံမြို့နယ် ရဲစခန်းက တာဝန်ကျ ရဲအရာရှိ တစ်ဦး က ဗွီအိုအေ မေးမြန်းမှုကို ဖြေကြားခဲ့တာပါ။
“ကိုတင်ဝင်းရယ်၊ ကိုအီစမိုင်ရယ်က အခုလက်ရှိ ဆေးရုံမှာရှိတယ်။ ကိုဇော်ဇော်နိုင် ၂၉ နှစ်ကတော့ ဆုံးသွားပြီ။” မနေ့က ဆူပူမှုတွေနဲ့ သွေးထွက်သံယို ဖြစ်ရပ်တွေအပြီး ဒီနေ့ အစောပိုင်းက လူတစ် ဦး သေဆုံးခဲ့ရတဲ့ ဥက္ကံမြို့နယ်အတွင်းမှာ လုံခြုံရေးအခြေအနေတွေ တိုးမြှင့်ထား ပြီးတော့ ဒေသ ဆိုင်ရာ အခြေအနေကလည်း တည်ငြိမ်မှုတွေ ရှိတယ်လို့ တာဝန်ကျ ရဲအရာရှိက အခုလို ပြန် လည်ဖြေကြားခဲ့ပါသေးတယ်။
မနေ့ကမနက် အစောပိုင်း ၉ နာရီလောက်က ဗုဒ္ဓဘာသာ ကိုယ်ရင်ငယ်တစ်ပါးဖြစ်တဲ့ အရှင်ပုည ကို ဈေးဝယ်သူ မူဆလင်အမျိုးသမီး မ၀င်းဝင်းစိန် က မော်တော်ဆိုင်ကယ်နဲ့ မတော်တဆ ပွတ်တိုက်မိရာ ကနေ တောက်လျှောက်ဆိုသလို ဘာသာရေးအသွင်ဆောင်တဲ့ ပဋိပက္ခတွေ စတင်ဖြစ်ပွား
လာခဲ့ရတာပါ။
ဆူပူလှုပ်ရှားပြီး အကြမ်းဖက် လုပ်ရပ်တွေမှာ ပါဝင်ခဲ့တဲ့ လူ ၁၅ ဦးကိုလည်း မြို့နယ်ရဲစခန်းမှာ အမှုဖွင့် ထားတာ တွေ့ရတယ်လို့ ဥက္ကံမှာ ဒုက္ခသည်အရေး ကူညီနေတဲ့ BG လူမှုအဖွဲ့အစည်းရဲ့ ဥကံ္ကမြို့နယ် တာဝန်ခံ ကိုသက်ဦး က ပြောပါတယ်။
ဆိုင်ကယ်နဲ့ ပွတ်တိုက်လိုက်တဲ့ မ၀င်းဝင်းစိန်ကိုလည်း ဥက္ကံမြို့နယ် ရဲစခန်းက ပြစ်မှုအမှတ် ၁၁၂/၂၀၁၃၊ ရာဇ၀တ်မှုပုဒ်မ ၂၉၅ နဲ့ အမှုဖွင့် အရေးယူထားပါတယ်။ ဗုဒ္ဓဘာသာ အများစုက အဲ့ဒီဒေသအတွင်းမှာရှိတဲ့ မူဆလင်လူနည်းစုတွေရဲ့ နေအိမ်တွေကို ဖျက်စီးတာတွေ လုပ်ဆောင်လာပြီးတော့ ဗလီ၊ စာသင်ကျောင်း၊ ဈေးဆိုင်နဲ့ နေအိမ်အချို့ကိုလည်း ဖျက်စီးခဲ့တယ်လို့ ဒုက္ခသည်တွေအရေး ကူညီဆောင် ရွက်ပေးနေတဲ့ တိုက်ကြီးဒေသခံ ကိုသက်ဦး က ပြောပါတယ်။
“အပျက်အစီးစာရင်းကတော့ ဈေးဆိုင် ၂၃ ဆိုင် ပျက်စီးတယ်။ နောက် ဗလီတစ်လုံးပေါ့။ စာသင်ကျောင်း က ၂ ကျောင်း၊ နေအိမ် ၅၃ လုံး ပျက်စီးတယ် အဲ့ဒါတွေက ကျနော်တို့ မြို့ပေါ်မှာပေ့ါနော်။” ဥက္ကံမြို့က မူဆလင် ဈေးဆိုင်ပိုင်ရှင်တဦးနဲ့ ဗုဒ္ဓဘာသာဝင် ဇနီးသည်တို့ကတော့ မနေ့တုန်းက တိုက်ခိုက်ဖျက်စီး မှုတွေအတွက် တုန်လှုပ်မိတဲ့အကြောင်း ပြောပါတယ်။
“နေ့လည် ၁ နာရီဝန်းကျင်ပေါ့ ရွာခံနဲ့ ဘေးလူက ဒီလောက်မဟုတ်ပါဘူး။ ရွာခံက များတာကိုး။ ရွာခံနဲ့ဆိုရင် အယောက် ၄၀၊ ၅၀ လောက်ရှိမယ်။ ဘယ်လိုမှလည်း မပြောပြတတ်ပါဘူး။ ဘယ်သူနဲ့မှလည်း ရန်ငြိုးမရှိပါဘူး။ ကိုယ့်ဗုဒ္ဓဘာသာ ကိုယ်လုပ်၊ အဖိုးကြီးကလည်း သူ့ မူဆလင်အလုပ်ကို သူ့ဟာသူ လုပ်ဆိုတော့။ အကုန်လုံးလိုက်လျောပေးတယ် ကိုယ်တွေကို။ သားတွေ ရှင်ပြု၊ ပဉ္ဇင်းခံ၊ ပဉ္ဇင်းခံတာတောင် မှ နှစ်ခါရှိသွားပါပြီ။”
ဥက္ကံမြို့ပေါ်မှာ အပျက်အစီးတွေ ရှိခဲ့လို့ ဥက္ကံမြို့နဲ့ ဆက်စပ်နေတဲ့ခြောက်တဲပင်ရွာ၊ ကျွဲပုံးရွာနဲ့ ပနီပင်ရွာတွေကတော့ မီးရှို့ခံခဲ့ရတယ်လို့လည်း က်ိုသက်ဦး က ပြောပါတယ်။ “ရွာက ခြောက်တဲရွာမှာရှိတဲ့ ၁၅ လုံးက မီးလောင်တယ်။ နောက်တခါ ကျွဲပုံးက ၅၆ လုံး၊ ပနီပင်က ၇ လုံး၊ နောက်တခါကျတော့ အဲ့ဒီ ပနီပင်မှာက အိမ် ၆ လုံး အဖျက်စီးခံရတယ်။”
ဥက္ကံမြို့အတွင်းမှာ အခုလို အကြမ်းဖက်မှု ဖြစ်ရပ်တွေ တင်းမာနေချိန်မှာပဲ ရန်ကုန်က ရွှေည၀ါ ဆရာတော်ကြီးကိုယ်တိုင်က နှစ်ဘက်အကြားပြေလည်မှုရရှိဖို့အတွက် ကြားဝင် ညှိနှိုင်းပေးတာတွေ လည်း ဆောင်ရွက်ပေးခဲ့ရတာပါ။ နှစ် ဘက်ဘာသာဝင်တွေအကြား အခုလို ဘာသာရေးပေါ် အခြေပြုထားတဲ့ အမုန်းတွေ နဲ့ ရန်ငြိုးတွေ ရှိနေရင် တိုင်းပြည်ရှေ့ခရီးအတွက် စိုးရိမ်ကြောင်း လည်း ရွှေည၀ါ ဆရာတော်ကြီးက မိန့်ပါတယ်။
“ဒီလိုမျိုး လူမျိုးရေး ပဋိပက္ခတွေက ဆက်လက်ဖြစ်ပွားနေမယ်ဆိုရင် နေရာ အနှံ့အပြား မီးကူးသွားရင် ငါတို့လည်း မတတ်နိုင်တော့ဘူး။ အဲ့ဒါဆိုရင်တော့နောက်ပြန်လှည့်သွားမယ့် လမ်းစဉ်ကြီးက အကြိုက်တွေ့သွားမှာပေ့ါ။ အဲ့တော့ ပြောချင်တာက စစ်ဖိနပ်အောက် မင်းတို့ ပြန်ရောက်ချင်သလား။ မင်းတို့ သားသမီးတွေကို အဲ့ဒီ စစ်ဖိနပ်အောက် ထိုးထည့်ပြီး သေသွားချင်သလား။ ကျုပ်တို့ ဒီပဋိပက္ခတွေ ဟာ သေကြေမှု အဆိုးတွေဘက်ကို မရောက်စေချင်ဘူးလေ။”
နောက်ဆုံး အခြေအနေအရ တိုက်ကြီးမြို့ပေါ်မှာ ရှိနေတဲ့ စစ်တပ်နဲ့ ရဲတွေကပဲ ဒေသတွင်း လုံခြုံရေးတွေ ကို အဓိက တာဝန်ယူထားပြီးတော့ ဆူပူမှုတွေ ထပ်မဖြစ်အောင် လုံခြုံရေးကို ထိန်းသိမ်းနေရတယ် လို့ လည်း ဥက္ကံဒေသခံတွေက ပြောပါတယ်။
ပြီးခဲ့တဲ့ မတ်လအတွင်းမှာလည်း မိတ္ထီလာမြို့မှာ ထိခိုက်သေဆုံးမှုတွေ ကြုံခဲ့ရတဲ့အထိ ဆူပူမှုတွေ ဖြစ်ပွား ခဲ့ပြီးနောက် ပဲခူးတိုင်းဒေသကြီး အနောက်ခြမ်းမှာလည်း ဖြစ်ပွားခဲ့တာပါ။ အဲ့ဒီတုန်းက ဆူပူအကြမ်းဖက် လုပ်ရပ်အချို့ကို စတင် ဖန်တီးခဲ့သူတွေနဲ့ ကိုယ်တိုင် ကျူးလွန်ခဲ့သူတွေကို အာဏာပိုင်တွေက အရေးယူမှုတွေဆောင်ရွက်နေသ လို၊ နိုင်ငံတော်သမ္မတ ဦးသိန်းစိန်ကလည်း လူမျိုးရေး၊ ဘာသာရေးကို အခြေခံတဲ့ ပြဿနာတွေ ထပ်မဖြစ်ဖို့နဲ့ လူမျိုးရေး၊ ဘာသာရေးကို အကြောင်းပြုပြီး ဆူပူအောင် လှုံ့ဆော်သူတွေကို ဥပဒေအရ ထိထိရောက်ရောက် အရေးယူမယ်ဆိုပြီးတော့လည်း တရားဝင် ပြောထား
တာလည်း ဖြစ်ပါတယ်။
VOA
No comments:
Post a Comment