ထိုင်းနိုင်ငံ
မဲဆောက်မြို့ ဈေးအတွင်း မေလကုန်ပိုင်းကတွေ့ရသည့် လန်ချားနှင့် ပစ္စည်း
သယ်ပို့ အလုပ် လုပ်နေသော မြန်မာ အလုပ်သမား တချို့
ထိုင်းနိုင်ငံတွင် တရားမ၀င် အလုပ်လုပ်ကိုင်နေသည့် ရွှေ့ပြောင်း အလုပ်သမား
၎ သိန်းခန့်သည် လာမည့် ဒီဇင်ဘာလအတွင်း ၎င်းတို့၏နိုင်ငံများသို့
ပြန်ပို့ခံရဖွယ်ရှိသည်ဟု ထိုင်းအလုပ်သမား ၀န်ကြီးဌာန က ပြောကြားလိုက်သည်။
ရွှေ့ပြောင်း အလုပ်သမား အရေးနှင့် ပတ်သက်၍ ပြီးခဲ့သည့် တနင်္ဂနွေနေ့တွင်
ထိုင်း အလုပ်သမားဝန်ကြီး Padermchai Sasomsap က ပြောကြောင်း ယမန်နေ့ထုတ်
ဘန်ကောက်ပိုစ့် သတင်းစာတွင် ဖော်ပြထား သည်။
ယင်း အလုပ်သမားများကို ထိုင်းအစိုးရအနေနှင့် Nationality Verification
Process (NVP) နိုင်ငံသား စိစစ်ရေး လုပ်ငန်းစဉ်အရ လူဦးရေ ၁၇ သိန်း
ရှိသည့်အနက် ၁၃ သိန်း အတည်ပြုပေးထားပြီး ကျန်ရှိသည့် လူ (၄) သိန်းသည်
နောက်ဆုံးသတ်မှတ် ပေးထား သော ဒီဇင်ဘာလ ၁၄ ရက်နေ့ မတိုင်ခင် မှတ်ပုံတင်ရန်
ပျက်ကွက်ပါက ပြန်ပို့ခံရမည် ဖြစ်ကြောင်း ၎င်းက ဆိုသည်။
“အလုပ်သမားဝန်ကြီးဌာနအနေနဲ့မှတ်ပုံတင်ရေးလုပ်ငန်းစဉ်မှာပူးပေါင်းဆောင်ရွက်မှုတွေမလုပ်ရင် ရွှေ့ပြောင်း အလုပ်သမား တွေ ကို
မိခင်နိုင်ငံကို ပြန်ပို့သွားမှာ ဖြစ်ပါတယ်”ဟု Padermchai က ဆက်ပြောသည်။
လူ့အခွင့်အရေးနှင့်ဖွံ့ဖြိုးမှုဖောင်ဒေးရှင်း(HRDF)မှမစ္စတာအန်ဒီဟောလ်က ပြန်ပို့ခံရနိုင်ဖွယ်ရှိသည့် ရွှေ့ပြောင်း အလုပ်သမား ၄ သိန်း စာရင်း၌
မြန်မာနိုင်ငံသား ၂ သိန်းခန့် ပါဝင်နေသည်ဟု ကြားသိရကြောင်း ဧရာဝတီ သို့
ပြောသည်။
ရွှေ့ပြောင်း အလုပ်သမားများအတွက် နိုင်ငံသား စိစစ်ရေးအစီအစဉ်ကို ယခုနှစ်
ဇွန်လ ၁၄ ရက်နေ့မှ စတင်၍ ဒီဇင်ဘာလ ၁၄ ရက်နေ့အထိ ၆ လ သက်တမ်းတိုးရန်
ထိုင်းအစိုးရအနေနှင့် ခွင့်ပြုပေးထား
ခြင်း ဖြစ်သည်။
အလုပ်သမား လက်မှတ် ပြုလုပ်ထားသူတိုင်းသည် ယာယီ နိုင်ငံကူးလက်မှတ်
ပြုလုပ်ရန်အတွက် နိုင်ငံ သားစိစစ်ရေး အစီအစဉ်၌ ပါဝင်ရမည်ဖြစ်ကြောင်း
ထိုင်းအစိုးရက ထုတ်ပြန်ကြေညာထားသည်။
ထို့ကြောင့် ရွှေ့ပြောင်း အလုပ်သမားများ အလုပ်လုပ်ကိုင်နေကြသည့်
ဘန်ကောက်၊ မဟာချိုင်း၊ စမွတ် ပရာကန်၊ စူရက်ဌာနီ၊ ရနောင်း၊ မဲဆောက်နှင့်
ချင်းမိုင်မြို့များတွင် နိုင်ငံသားစိစစ်ရေးအတွက် ရုံးများ
ဖွင့်လှစ်ပေးခဲ့သည်။
နိုင်ငံသားစိစစ်ရေးလုပ်ငန်း အစီအစဉ်ကို လာအိုနှင့် ကမ္ဘောဒီးယား
နိုင်ငံသားများအတွက် ၂၀၀၆ ခုနှစ်
နှင့် မြန်မာနိုင်ငံသားများ အတွက် ၂၀၀၉
ခုနှစ် သြဂုတ်လအတွင်း၌ စတင်လုပ်ဆောင်ပေးခဲ့ကြောင်း သိရသည်။
ရွှေ့ပြောင်းအလုပ်သမားများကို ပြန်ပို့မည်ဟုထိုင်းအစိုးရအနေနှင့်
ပြောကြားသော်လည်းထိုင်းနိုင်ငံ တောင်ပိုင်း ရနောင်းမြို့နယ်အတွင်း
လာရောက် အလုပ်လုပ်ကိုင်နေသည့် မြန်မာနိုင်ငံသားများ ပြည်တော်ပြန်မှုကြောင့်
ထိုင်း စီးပွားရေးလုပ်ငန်းရှင် တချို့ အ လုပ်သမား ရှားပါးမှုနှင့်
စတင်ကြုံတွေ့နေရသည်။
လတ်တလော ကာလအတွင်း၌ပင် မြန်မာအလုပ်သမားများ တဖြည်းဖြည်း
ပြည်တော်ပြန်နေသည်ဟု ရနောင်းခရိုင် ခရီးသွားလုပ်ငန်း ကော်မတီအကြီးအကဲတဦးဖြစ်သည့် နိုင်နစ်အွန် တိန်ခစ်က ပြောကြား
ကြောင်း ထိုင်းသတင်းများတွင်
ယမန်နေ့က ဖော်ပြ ထား သည်။
“အခုဆိုရင် ထိုင်းနိုင်ငံမှာ အလုပ်လာလုပ်တဲ့ သူတွေ ပြည်တော်ပြန်ဖို့
စီစဉ်နေကြတယ်၊ ကြားရသလောက် ဒီမတိုင်ခင် ပြန်ကြတဲ့ သူ တွေလည်း ရှိတယ်၊
လတ်တလော တချို့လုပ်ငန်းတွေမှာဆိုရင် အလုပ်သမား ရှားပါးတဲ့ ပြဿနာတွေ
ကြုံနေရပြီ”ဟု ၎င်းက ဆို သည်။
ထိုင်းနိုင်ငံ အနှံ့ ဆောက်လုပ်ရေး၊ အိမ်ဖော်၊ ရေလုပ်သား၊ စားသောက်ဆိုင်
စသည့် လုပ်ငန်းများတွင် အလုပ်လုပ်ကိုင်နေသည့် မြန်မာ ပြည်သား စုစုပေါင်း ၂
သန်းမှ ၄ သန်း အထိရှိနိုင်ကြောင်း အလုပ်သမား အဖွဲ့များက ခန့်မှန်းထားကြသည်။
