ရန်ကုန်တိုင်း ဒဂုံဆိပ်ကမ်းမြို့နယ် စက်မှုဇုန် ၁ မှာ လောင်ကျွမ်းခဲ့တဲ့ မီးကြောင့် ဖယောင်းစက်ရုံ ၂ ရုံ ပျက်စီးဆုံးရှုံးခဲ့ပြီး ၅ ဦး ဒဏ်ရာရခဲ့တယ်လို့ မီးငြှိမ်းသတ်ခဲ့တဲ့ တောင်ဒဂုံမီးသတ်တပ်ဖွဲ့ အရန်တပ်ခွဲမှူး ဦးစံသိန်းက ပြောပါတယ်။
“အထဲကို ဝင်လို့မရတဲ့အခါကျတော့ ရေသယ်ရတာ ခက်တယ်။ မီးဖြန်းရတာ ခက်တယ်၊ နောက်တခါ ဖယောင်းစက်ရုံ ဖြစ်တဲ့အတွက်ကြောင့်မို့လို့ ဖယောင်းအရည်ပျော်ပြီးတော့ တော်တော်အန္တရယ်များများနဲ့လုပ်ရတာပါ။ လမ်းမှာ တွေ့တဲ့အတိုင်းပဲ မီးသတ်ကား အများကြီးက လိုသလောက် ဝင်လို့မရဘူး ဖြစ်နေတယ်” လို့ အရန်တပ်ခွဲမှူး ဦးစံသိန်းက ပြောပါတယ်။
မီးလောင်မှုဖြစ်ပွားရာကို ရန်ကုန်တိုင်းတတိုင်းလုံးက ကြက်ခြေနီတပ်ဖွဲ့ဝင် ၁၅၀ ကျော် လာရောက်ကူညီနေပြီး ရှေးဦးသူနာပြုစုနည်းနဲ့ ကျန်းမာရေးစောင့်ရှောက်မှုတွေ ဆောင်ရွက်ပေးနေတယ်လို့ ဒဂုံဆိပ်ကမ်းမြို့နယ် မြို့နယ်ကြက်ခြေနီတပ်ဖွဲ့မှူး ဦးဇော်မျိုးထိုက်က ဆိုပါတယ်။
ဖယောင်းအရည်ပျော်ကျပြီး ထိခိုက်ဒဏ်ရာရရှိသူ အရေအတွက်ဟာ ည ၉ နာရီဝန်းကျင် မေးမြန်းချက်ရ ၅ ဦးလောက် ရှိနေပြီး အသေအပျောက် မရှိဘူးလို့ ဦးဇော်မျိုးထိုက်က ဆိုပါတယ်။
မြန်မာနိုင်ငံ မီးသတ်တပ်ဖွဲ့ကတော့ ဒဂုံဆိပ်ကမ်းမြို့နယ် စက်မှုဇုန် ၁ မှာ လောင်တဲ့မီးကို ညနေ ၇ နာရီလောက် စတင်သိရှိပြီး Level 2 အဆင့်ရှိတဲ့ မီးသတ်ယာဉ်တွေ စတင်စေလွှတ်ခဲ့တယ်လို့ ထုတ်ပြန်ထားပါတယ်။
ညနေ ၇ နာရီခွဲမှာတော့ Level 3 အဆင့် စေလွှတ်ခဲ့သလို ည ၇ နာရီ ၅၀ မိနစ်မှာတော့ Level 4 အဆင့်မီးသတ်ယာဉ်တွေနဲ့ ထွက်ခွာငြှိမ်းသတ်ခဲ့ပြီး ည ၁၀ နာရီ ၃၅ မိနစ်မှာ မီးငြိမ်းသွားတယ်လို့ ထုတ်ပြန်ထားပါတယ်။
DVB
No comments:
Post a Comment