ပင်လယ် ရေကြောင်းမှ တရားမဝင် ကုန်သွယ်မှု တားဆီးရေး လုပ်ငန်းကို သြဂုတ် ၁၂ ရက်တွင် စတင် ဆောင်ရွက်မည်

Monday, August 12, 2013
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ပြည်ထောင်စု ဝန်ကြီး ဦးဝင်းမြင့်သည် စားသုံးသူ ကာကွယ်ပေးရေးနှင့် တရားမဝင် ကုန်သွယ်မှု တားဆီး ထိန်းချုပ်ရေး ကိစ္စရပ်များဆောင်ရွက်ရန် တာဝန် ပေးအပ်ထားသည့် Mobile Team (ရန်ကုန် ဆိပ်ကမ်း နယ်မြေ)မှ တာဝန် ရှိသူများအား ယနေ့နံနက် ၉ နာရီတွင် ရန်ကုန်မြို့ နန်းသီတာ ဆိပ်ကမ်း၌ တွေ့ဆုံပြီး မြန်မာ တစ်နိုင်ငံလုံး ကုန်သွယ်မှု ပမာဏ၏ ၈ဝ ရာခိုင်နှုန်းကို ပင်လယ် ရေကြောင်းမှ တစ်ဆင့် ဆောင်ရွက်လျက် ရှိရာတွင် တရားမဝင် ကုန်သွယ်မှုများကို နည်းမျိုးစုံဖြင့် လုပ်ဆောင် နေကြသည်ကို သိရပါသည်။ သို့ဖြစ်၍ ပထမဆုံး အနေဖြင့် Mobile Team ဖြင့် ပင်လယ် ရေကြောင်းမှ တရားမဝင် ကုန်သွယ်မှု တားဆီးရေး လုပ်ငန်းကို သြဂုတ် ၁၂ ရက် (တနင်္လာနေ့)တွင် ဆောင်ရွက်တော့မည် ဖြစ်ပါကြောင်း၊ အခုလို ဆောင်ရွက်ရသည့် ရည်ရွယ်ချက်များမှာ တရားဝင် ကုန်သွယ်မှု လမ်းကြောင်းပေါ်သို့ ရောက်ရှိရေး၊ မှန်မှန် ကန်ကန် ဆောင်ရွက်သည့် ကုန်သည်များနှင့် ကုန်ထုတ်လုပ်သူများ အတွက် အခွင့်အရေး တန်းတူရရှိရေး၊ စားသုံးသူ အကာအကွယ် ပေးရေးနှင့် နိုင်ငံတော်၏ အခွန် ဘဏ္ဍာများ ဆုံးရှုံးမှုများကို ကာကွယ်ပေးရေး စသည်တို့ကို ဦးတည်ပြီး အောင်မြင်အောင် ကြိုးပမ်းကြဖို့ လိုပါကြောင်း၊

ယခုလို ပထမဆုံး အကြိမ် လုပ်ဆောင်ရသည့် လုပ်ငန်း ဖြစ်တဲ့အတွက် လုပ်ငန်းတာဝန်များ ထမ်းဆောင်ရာမှာ အခက်အခဲ အတားအဆီးများနှင့် စိန်ခေါ်မှုများကို ကြုံတွေ့ရမှာ ဖြစ်ပါကြောင်း၊ တွေ့ကြုံရသည့် အခြေအနေနှင့် သတင်း အချက်အလက် များကို တာဝန်ရှိသူများထံ အချိန်နှင့် တစ်ပြေးညီ သတင်းပို့ကြရန် အထူး လိုအပ်ပါကြောင်း၊ အထူး မှာကြား လိုသည်မှာ လက်တွေ့ တာဝန် ထမ်းဆောင်ကြသည့်အခါ လာဘ်ပေး လာဘ်ယူမှု ကင်းရှင်းစွာဖြင့် ပေးအပ်ထားသော တာဝန်များကို အောင်မြင်အောင် ထမ်းဆောင်ပြီး မိမိတို့ ဌာန၏ ဂုဏ်၊ နိုင်ငံတော်၏ ဂုဏ်တို့ကို မြှင့်တင်ရန် ဆောင်ရွက်ကြရန် မှာကြားခဲ့ကြောင်း သတင်းရရှိသည်။